Jutsata Acán ruranqan
7
Judá trïbupitami Acán jutiyuq runa karqan. Paymi karqan Carmipa tsurin, Zabdipa willkan y Zerapa shurukta willkan. Acánqa Jericó markacho kaqta llapanta rupatsiyänanpä Josué nikaptinmi allinnin kaqta pakayllapa kikinpä apakurqan. Tsaynö apakuptinmi Tayta Dios pasaypa ajanar Israel runakunapa contran rikakurqan.2 Jericó markapitami runakunata Josué kacharqan Hai markata rikapakayämunanpä. Hai markaqa Bet-elpita rupay yarqamunan kaqläpa y Bet-avén marka cercanchömi karqan. Tsaymi paykunaqa aywar Hai markata rikapakayämurqan. 3 Kutiykamurmi Josuéta willayarqan: “Llapantsikqa ama aywashuntsu. Ishkay waranqa (2,000) o kimsa waranqa (3,000) runakunallawanmi Hai runakunata ushakätsishun. Tsay markachöqa wallkallami runakuna taykäyan”.
4 Tsaynö niyaptinmi Hai markata ushakätsiq kimsa waranqatanö (3,000) runakunata Josué kacharqan. Tsaynö kaptinpis Haicho taq runakuna paykunata vinciskirmi qatikachäyarqan. 5 Hai markapa punkunpita hasta rumita jipikuna partiyaq qatikacharmi uraypa qeshpiptin kimsa chunka soqta (36) runakunata wanutsiyarqan. Tsaymi Israel runakuna mantsarir pelyayta valurayarqannatsu.
6 Tsaynö vinciyaptinmi Josué y mayor runakuna llakikurnin latsapankunata rachiyarqan y allpatapis umankunaman wiñakuyarqan. Nirkurnami patsa tsakanqanyaq Tayta Diospa babulnin ñöpanman lätakaykuyarqan. 7 Tsaychömi Josué nirqan: “Tayta Dios, kay markakunacho taq amorreo runakuna wanutsiyämänanpä kaptinqa ¿imapärä Jordán mayutapis tsimpatsiyämarqayki? Tsaypa trokinqa Jordán mayupa wak tsimpallancho kachaykayämankiman karqan. 8 Tayta Dios, conträkuna vinciykämaptinqa kanan ¿imatarä Israel mayïkunata nishä? 9 Kananqa tsayta wiyaykur kay particho taq cananeo runakuna qorikaykur chipyaqchi ushakätsiskayämanqa. Tsaynö ushakätsiyämaptinqa ¿imanöparä runakuna musyayanqa llapanpä munayyuq kanqaykita?”
10 Josué tsaynö niptinmi Tayta Dios nirqan: “¿Imanirtä lätaraykanki? ¡Shäriy! 11 Ninqäta mana cäsukamarmi Israel runakuna jutsayuq kaykäyan. Jericó markacho llapanta rupatsiyänanpä nikaptïpis† suwakuskirmi toldunkunaman apaykur pakaraykätsiyan. Tsaynö rurayashqa jutsata ruraykäyanqanta musyaykarmi. Tsaynöpami paykunawan pactu ruranqäta manakaqman churayashqa. 12 Tsaymi contraykikunawan pelyaytapis mana kamäpakur qeshpiyanki. Jutsayuq runata manarä wanutsiptikiqa qamkunata yanapanäpa trokin ushakätsiyäshaykimi.
13 “Juklla aywar runakunata willay kanan purificakuskir waray junaq ñöpäman shayämunanpä. Qamkunapa Diosniki karmi noqa nï: ‘Llapanta rupatsiyänaykipä nikaptïpis wayikikunapa aparmi jutsayuq kaykäyanki. Jutsayuq runata manarä wanutsirqa manami contraykikunatapis ushakätsiyta kamäpakuyankitsu’.
14 “Waray tuta trïbunpa trïbunpa Israel runakuna ñöpäman shayämutsun mayqan trïbupis jutsayuq kanqanta ninäpä. Tsaymi tsay trïbu runakuna castanpa castanpa ñöpäman shäyämunqa mayqan castapis jutsayuq kanqanta ninäpä. Tsaypitanami tsay casta runakuna castanpa castanpa ñöpäman shäyämunqa mayqan castanpis jutsayuq kanqanta ninäpä. Tsay casta runakunanami cada ünun ñöpäman shäyämunqa mayqanpis jutsayuq kanqanta ninäpä. 15 Jutsayuq runa mayqan kanqanta niptï wayintapis tsurinkunatapis y llapan imaykantinta rupatsiyanki. Tsay runa pasaypa mana allita rurarmi Israel runakunawan pactu ruranqäta manakaqman churashqa”.
Acánta wanutsiyanqan
16 Tsaynö niptinmi waraynin junaq tsaka tsakalla llapan runakunata qoriykur Josué nirqan trïbunpa trïbunpa Diospa ñöpanmana shäyämunanpä. Tsaynö shäyämuptinmi Tayta Dios nirqan Judá trïbu jutsayuq kanqanta. 17 Judá trïbutanami Josué nirqan castanpa castanpa Diospa puntanman shäyämunanpä. Tsaymi Tayta Dios nirqan Zera ayllu jutsayuq kanqanta. Zera ayllu shamuptinnami nirqan Zabdi casta jutsayuq kanqanta. 18 Zabdi castapita ollqu kaqkuna shayämuptinnami Tayta Dios nirqan Acán runa jutsayuq kanqanta. Payqa karqan Carmipa tsurinmi. Tsaynöllami karqan Zabdipa willkan y Zerapa shurukta willkan. Paykunaqa kayarqan Judá trïbupitami.
19 Tsaymi Acánta Josué nirqan: “Tayta Diospa ñöpancho mana llullakuypa rasun kaqta willamay, hïju”.
20 Tsaynö niptinmi Acán nirqan: “Tayta Diosta mana cäsukurmi jutsata rurashqä. 21 Jericó markaman yaykurmi rikarqä Babiloniacho awashqa kuyayllapä jakuta, ishkay pachak (200) qellayta y juk taksha bärra qoritapis. Tsay qoriqa mediu kïlunömi lasan. Tsaykunata munaparmi pakayllapa apaskir toldü rurinman pampaykushqä. Qellaytaqa mas rurinmanmi pampaykushqä”.
22 Tsaynö niptinmi Acánpa toldunman runakunata Josué kacharqan. Tsaychömi llapan pakanqankunata y qellaytapis mas rurincho kaykaqta tariyämurqan. 23 Tsaykunata jipiskirmi Israel runakuna qorikäyanqanman aywar Josuéta entregayarqan. Tsayta chaskiskirnami Tayta Diospa ñöpanman churaykurqan.
24 Nirkurnami llapan Israel runakunawan Acánta, suwanqan qellayta, qorita, jakuta, warmi tsurinkunata y ollqu tsurinkunatapis Acor Pampaman apayarqan. Tsaynöllami paypa kaqtaqa llapanta apayarqan wäkankunata, üshankunata, cabrankunata, ashnunkunata y tolduntapis. 25 Tsayman pushaykurmi Josué nirqan: “¿Imanirtä kay desgraciaman jitarpayämashqayki? Kananqa kikikitami Tayta Dios desgraciaman jitarpushushqayki”.
Tsaynö niptinmi Israel runakunaqa Acánta, tsurinkunata y llapan uywankunatapis saqmaypa wanuskatsir rupatsiyarqan. 26 Nirkurnami rupatsiyanqan jananman tsaytsika rumikunata qotuyarqan. Tsay rumikunaqa kananyaqmi tsaycho qoturaykan. Tsay wanutsiyanqan junaqpitami tsay pampapa jutin Acor Pampab kaykan. Acánta wanuskatsiptinnami Tayta Diospa ajanaynin qallqurqan.