Jericó markaman imanö yaykuyänanpä tantiyatsinqan
6
Israel runakunata mantsarmi Jericó markapa punkunta wichqayarqan. Tsaymi pipis yaykurqantsu ni yarqurqantsu. 2 Tsaynö kaptinpis Tayta Diosmi Josuéta nirqan: “Makikimanmi churashqä Jericó markata, mandaqnin reyta y soldädunkunatapis. 3 Tsaymi soldäduykikunawan cada junaq Jericó marka murälla waqtanpa soqta junaqyaq tumayanki. 4 Tsaynö rurarqa Pactu Babulpa ñöpanta qanchis sacerdötikuna aywayätsun cornëtakunata aptashqa. Qanchis kaq junaqchöqa cornëtakunata sacerdötikuna tukayämuptin qanchis kuti llapayki tumayanki. 5 Tsay junaq guërrapä tukanqannö sacerdötikuna tukayanqanta wiyaykur jinchi qayaräyanki. Tsaynö qayaräyaptikimi Jericó markata tsaparaq murälla kikillan juchunqa. Juchuskiptinmi juklla tsay markaman yaykuyanki”.6 Tsaymi sacerdötikunata qayaykur Nunpa tsurin Josué nirqan: “Jericó markata tumanantsikpä Pactu Babulta apayay. Apaqkunapa puntanta qanchis sacerdötikuna aywayätsun cornëtankuna aptashqa”.
7 Runakunatanami Josué nirqan: “Qamkunapis llapayki Jericó markata tumayay. Pelyayänanpä kamarikushqa runakunapis Tayta Diospa babulninpa puntanta aywayätsun”.
8 Josué parlayta ushaskiptinmi Tayta Diospa Pactu Babulninpa puntanta qanchis sacerdötikuna aywayarqan cornëtakunata tukaraykar. 9 Tukaykaq sacerdötikunapa puntantanami pelyayänanpä kamarikushqa runakuna aywayarqan. Babulpa qepantanami wakin runakunapis pelyayänanpä kamarikushqa aywayarqan. Tsaynö aywayaptinmi sacerdötikuna mana päraypa tukayarqan. 10 Manarä yarquyaptinmi Josué nirqan: “Upällallarä aywashun. ‘Qayaräyay’ niptïrämi llapan kallpaykikunawan qayaräyanki”.
Jericó markaman yaykuyanqan
11 Tsaynö niptinmi Tayta Diospa babulninta Jericó marka murälla waqtanpa tsay junaq juk kutilla tumatsiyarqan. Nirkurnami campamentunkunaman kutikuyarqan.
12 Tsaypita waraynin tutami tsaka tsakalla Josué sharkurqan. Sacerdötikunanami Tayta Diospa Pactu Babulninta apayänanpä umrukuyarqan. 13 Paykunapa puntantami qanchis sacerdötikuna cornëtakunata tukaraykar aywayarqan. Paykunapa puntantanami pelyayänanpä kamarikushqa runakuna aywayarqan. Wakin runakunanami Tayta Diospa babulnin qepanta aywayarqan. Tsaynö llapan aywayaptinmi cornëtakunata mana päraypa tukayarqan. 14 Jericó markata tsaynö tumaskirmi tsay junaqpis campamentunkunaman kutikuyarqan. Tsaynöllami soqta junaqyaq tumayarqan.
15 Qanchis kaq junaqmi itsanqa tsaka tsakalla markata yapay tumayänanpä aywayarqan. Tsay junaqqa qanchis kutimi tumayarqan. 16 Qanchis kaq tumaycho cornëtata tukaskiyaptinmi runakunata Josué nirqan: “¡Qayaräyay! ¡Tayta Diosmi kay markata makintsikman churamushqa! 17 Kay markata chipyaq rupatsishun.† Tsaynö rupatsishqaqa Tayta Diospä sacrificiumi kanqa. Rikapakuq kachanqantsik runakunata pakanqanpitami prostitüta Rahabtawan wayincho kaykaqkunallata kawaykaqta jaqishun. 18 Tsay markacho kaqkunataqa mayjina alli kaptinpis ama imatapis apakushuntsu, tsaypa trokinqa llapanta rupatsir ushashun. Imallatapis apakuyaptikiqa maldición llapantsikmanmi chämunqa. 19 Qoripita, qellaypita, broncipita y fiërrupita kaqkunatami itsanqa Tayta Diospä qorinqantsik kaqman churashun”.
20 Cornëtakunata sacerdötikuna tukayaptin y Israel runakuna qayaräyaptinmi marka tsaparaq murälla illaqpita juchurqan.† Juchuskiptinnami markaman yaykuskir 21 runakunata, warmikunata, jövinkunata, awkinkunata, wäkakunata, üshakunata, ashnukunatapis espädawan wanutsiyarqan.
22 Rikapakuq kachanqan ishkay runakunatami Josué nirqan: “Prostitüta Rahabta awniyanqaykinölla wayinman aywayay llapan castankunatawan jipiyämunaykipä”.
23 Tsaynö niptinmi Rahabpa wayinman aywar kikinta, mamanta, taytanta, turinkunata y tsay wayicho kaykaq llapan castankunatapis jipiyämurqan. Nirkurnami Israel runakunapa campamentunpita jukläman pushayarqan.
24 Tsaypitanami Jericó markacho kaqkunata llapan imaykantinta rupatsir ushayarqan. Qellayta, qorita, broncita y fiërrukunatami itsanqa Tayta Diospa wayinpä qoriyanqan kaqman churayänanpä qoriyarqan. 25 Jericóman rikapakuq kachanqan runakunata pakanqanpitami Rahabta† y castankunata Josué wanutsirqantsu. Tsaypita patsami kananyaq Rahabpa castankuna Israel runakunacho taykäyan.
26 Tsaypitaman Josué jurar nirqan: “Jericó markata yapay sharkatsiyta munaq runaqa maldicionashqami kanqa. Tsaymi marka murällata sharkatsiq runapa mayor kaq tsurin wanunqa. Tsaynöllami marka yaykuna punkuta churaq runapa qepa kaq tsurinpis wanunqa”.†
27 Josuéta Tayta Dios yanapanqan maytsaychöpis musyakarqanmi.