Gilgalcho Israel runakuna señalakuyanqan y Pascuata rurayanqan
5
Amorreo runakunapa mandaqnin reykunami musyayarqan Israel runakuna tsimpayänanpä Jordán mayuta Tayta Dios tsakitsinqanta. Tsay reykunaqa Jordán mayu tsimpan rupay jeqanan kaqläpami täyarqan. Tsaynöllami musyayarqan Mediterráneo Lamar kuchuncho taq cananeo runakunapa mandaqnin reykunapis. Tsayta musyaskirmi pasaypa mantsarirnin Israel runakunawan pelyaq aywaytapis munayarqantsu.2 Jordán mayuta tsimpaskiyaptinmi Josuéta Tayta Dios nirqan: “Rumipita cuchillukunata ruraskir Israel runakunata señalatsinki taytankunanö señalashqa kayänanpä”.
3 Tsaynö niptinmi rumipita cuchillukunata ruraykur Aralot jirkacho Israel runakunata Josué señalatsirqan. 4 Tsaynö señalatsirqan Egiptupita yarqamuq runakuna tsunyaq jirkacho wanur ushakäyashqana kaptinmi. Tsay wanuq runakunaqa Egiptupita yarqamur guërraman aywayänanpä kallpankunachönami kayarqan. 5 Tsay runakuna señalashqa kayaptinpis tsunyaq jirkacho yuriqkuna señalanni kayaptinmi Josué señalatsirqan.
6 Egiptupita yarqamur guërraman aywayänanpä kallpankunacho kaq runakunaqa chusku chunka (40) wata tsunyaq jirkapa purirninmi wanuyarqan. Tsaynö wanuyarqan Tayta Diosta mana cäsukuyanqanpitami. Tsaymi paykunata Tayta Dios nirqan unay castankunata awninqan nacionman mana yaykuyänanpä kanqanta.† Tsaychöqa lichipis abëjapa mishkinpis yakunörämi atska kaykan. 7 Egiptupita yarqamuq runakuna wanushqana kayaptinmi paykunapa tsurinkunata Josué señalatsirqan. Paykunatami Tayta Dios churarqan wanuq runakunapa trokin awninqan nacionta chaskiyänanpä. Nänicho yurishqa karmi tsay junaqyaq señalanni kayarqan.† 8 Llapanta señalaskiyaptinnami alliyäyanqanyaq campamentullacho quëdakuyarqan.
9 Tsaypitanami Josuéta Tayta Dios nirqan: “Señalashqana karmi Egiptucho wätay kayanqanpita penqakuyanqanatsu”.
Tayta Dios tsaynö ninqanpitami kananyaq tsay partipa jutin Gilgal.a
10 Gilgalqa Jericó pampachömi kaykan. Israel runakuna tsaycho kaykarmi wata qallaykunan killacho chunka chusku junaq tardi Pascua fiestata† rurayarqan. 11 Tsaypita waraynin junaqnami levadüraynaq tantata mikuyarqan y trïgu kamtsatapis uchuyarqan. Tsaykunaqa patsancho wayuq mikuykunami karqan. 12 Tsay junaqpitami mikuyänanpä maná karqannatsu.† Tsaymi Canaáncho chakrakuna wayunqallantana mikuyarqan.
Josuéta Tayta Diospa soldädunkunapa mandaqnin yuripanqan
13 Jericó marka cercancho puriykanqanchömi Josué rikarqan espädan aptashqa ichiraykaq runata. Tsaymi ñöpanman witiykur tapurqan: “¿Qamqa kaykanki favornïkunaku o conträkunapa favorninku?”
14 Tsay runanami nirqan: “Manami mayqaykipapis favornikikunatsu kä. Noqaqa Tayta Diospa soldädunkunapa mandaqninmi kä”.
Tsaynö niptinmi Josuéqa patsaman lätakaykur tsay soldäduta nirqan: “Taytay, sirviqnikimi kä. ¿Imatä willamänaykipä kaykan?”
15 Tsaynö niptinmi Tayta Diospa soldädunkunapa mandaqnin nirqan: “Jatiranqayki llanqikita juklla jipiy. Sagrädu partichönami ichiraykanki”.
Tsaynö niptinmi Josuéqa llanqinta juklla jipirqan.