Rey Jabínta y yanapaqninkunata Josué vincinqan
11
Israel runakuna tsaynö rurayanqanta musyaskirmi Hazor markapa mandaqnin rey Jabín willakuqta kacharqan Madón markapa mandaqnin rey Jobabman, Simrón markapa mandaqnin reyman y Acsaf markapa mandaqnin reymanpis aywar pelyar Israel runakunata atacar yanapayänanpä. 2 Tsaynöpis kacharqan norti kaqlä jallqakunacho kaykaq markakunapa mandaqnin reykunaman, Cineret qochapita sur kaqlä Arabá pampacho kaykaq markakunapa mandaqnin reykunaman, Sefelacho kaykaq markakunapa mandaqnin reykunaman y Dorlächo kaq markakunapa mandaqnin reykunamanpis. Dor markaqa rupay jeqanan kaqlä costachömi kaykan. 3 Tsaynöllami kacharqan Jordán mayu wak tsimpancho y kay tsimpancho taq cananeo runakunapa mandaqnin reykunaman, amorreo runakunaman, heteo runakunaman, ferezeo runakunaman, jallqakunacho taq jebuseo runakunaman y Mizpacho kaq Hermón jirka chakincho taq heveo runakunamanpis.4 Tsaynö qayatsiptinmi llapan reykuna soldädunkunawan, cawallunkunawan y guërrapä ruratsiyanqan carrëtankunawanpis aywayarqan. Llapan qorikarmi lamar kuchuncho aqushanörä yupaytapis mana atipaypä kayarqan. 5 Llapan tsay soldädukunami Israel runakunata atacayänanpä Merom raqra ñöpanman qorikäyarqan.
6 Tsaymi Josuéta Tayta Dios nirqan: “Tsay runakunata ama mantsaytsu. Waray junaqmi kaynö höra llapan contrayki soldädukunata wanutsiyänaykipä qamkunapa makikikunaman churamushä. Cawallunkunapa ankunkunatapis kachätsiyanki y guërra carrëtankunatapis llapanta rupatsir ushakätsiyanki”.
7 Tsaynö niptinmi Josuéqa soldädunkunawan Merom raqracho contrankunata illaqpita atacayarqan. 8 Tayta Diosmi yanaparqan llapanta ushakätsiyänanpä. Tsaymi qatikachäyarqan hasta jatun Sidón markayaq y hasta Misrefot-maimyaq. Tsaynöllami rupay yarqamunan kaqläpa qatikachäyarqan hasta Mizpa pampayaq. Tsaynö pelyar manami ni jukllayllatapis kawaykaqtaqa jaqiyarqantsu. 9 Tayta Dios ninqannöllami contrankunapa cawallunkunapa ankunkunata kachätsiyarqan y guërra carrëtankunatapis rupatsir ushayarqan.
10 Tsaypita kutimurnami Josuéqa Hazor markata atacar mandaq reyta espädawan wanutsirqan. Ñöpataqa Hazor markapa mandaqnin reypa munayninchömi wakin reykunapis kayarqan. 11 Hazorcho taq llapan runakunata llapanta wanuskatsirmi markatapis rupatsir ushayarqan.
12 Tsaynöllami wakin markakunamanpis yaykur reykunatapis Josué wanutsir usharqan. Llapantapis rurarqan Tayta Diospa sirviqnin Moisés ninqannöllami. 13 Jirkankuna janancho shäritsiyanqan kaq markakunataqa manami rupatsirqantsu, tsaypa trokinqa Hazorllatami rupatsirqan. 14 Ushakätsiyanqan markakunapitaqa runakunata wanuskatsirmi uywankunata y llapan imaykankunatapis Israel runakuna kikinkunapäna apakuyarqan.
Moisés ninqankunata Josué cumplinqan
15 Sirviqnin Moisésta Tayta Dios ninqannöllami llapantapis Josué cumplirqan. 16 Tsaymi Neguevman, Gosén partiman, Sefelaman, Arabá pampaman y Israelcho llapan jallqakunaman Israel runakunawan Josué yaykuyarqan. 17 Tsaynöllami Seirlächo kaykaq Halac jirkapita hasta Líbano pampacho kaykaq Baal-gadyaq yaykur llapan markakunapa mandaqnin reykunata wanutsiyarqan. Baal-gadqa Hermón jirka chakinchömi kaykan. 18 Paykunata vincinanpäqa atska watami pelyayarqan.
19 Pactuta rurashqa karmi Gabaóncho taq heveo runakunataqa Josué wanutsirqantsu. Tsaypita kaqtaqa llapantami ushakätsirqan. 20 Puntataqa tsaycho taq runakunapa shonqunkunata Tayta Diosmi chukruyätsirqan Israel runakunapa contran shärir pelyayänanpä. Tsaynö kaptinpis Moisésta Tayta Dios ninqannöllami tsay runakunata mana kuyapaypa ushakätsiyarqan.†
21 Tsaynöllami anaceo runakunapa markankunatapis Josué chipyaq ushakätsirqan: Hebrónta, Debirta, Anabta, Israel jallqakunacho kaq markakunata y Judá jallqakunacho kaq markakunatapis.† 22 Tsaynöpami entëru Israelcho jukllayllapis anaceo runakuna kawaykar quëdayarqantsu. Gaza, Gat y Asdod markakunallachönami Anac runakuna kayarqan.
23 Moisésta Tayta Dios ninqannöllami llapan markakunatawan chakrakunata Josué qoriskir Israel trïbukunata rakiparqan. Tsaypitaqa guërra mana kaptin Israel runakuna añawnami kawakuyarqan.