4 Wamrayuqkuna, wamraykikunata ama ajanätsiyaytsu.^† Tsaypa trokinqa Señornintsik Jesucristo munanqannö kawayänanpä shumaq tantiyatsiyay.

5 Wätaykuna, kay patsacho patronnikikunata cäsukur mandayäshunqaykita llapan voluntänikikunawan rurayay. Jesucristuta cäsukuyanqaykinölla patronnikikunatapis cäsukuyay. 6 Patronnikikuna rikayäshunqayki hörallaqa ama aruq tukuyaytsu, tsaypa trokinqa Jesucristupa sirviqnin kar llapan voluntänikikunawan aruyay. Tsaynöpami Tayta Dios munanqanta rurayanki.

7 Patronnikikuna mandayäshunqaykita llapan voluntänikikunawan rurayay. Manami runakunallapätsu aruykäyanki, tsaypa trokinqa Señornintsik Jesucristupämi. 8 Wätay mana wätay kashqapis allita ruranqantsikpitami gloriacho Jesucristo premiuta qaramäshun.^†

9 Patronkuna, qamkunapis wätaynikikunata alli rikayay. Qayapäyänaykipa trokinqa alli shimillaykikunapa parlapäyay. Tantiyakuyay wätay karpis o patrón karpis ciëlucho kaykaq patronnintsikpa munaynincho kaykanqantsikta.^† Payqa llapantsiktapis tsaynöllami rikamantsik.^†

10 Wawqikuna panikuna, Señornintsik Jesucristo munayninwan yanapaykäyäshuptikiqa firmi kawayay. 11 Diabluta ichipäyänaykipä Tayta Dios kamaripäyäshunqaykita jatikuyay.^† 12 Noqantsik manami runa mayintsikwantsu pelyaykantsik, tsaypa trokinqa munayyuq supaykunawanmi. Paykunaqa mana rikakaq karpis entëru patsachömi imaykatapis mana allikunata ruraykäyan. 13 Tsaynö kaykaptinqa Tayta Dios kamaripäyäshunqaykikunata jatikuyay. Tsayta jatikuyaptikimi supaykuna shamurpis vinciyäshunkitsu.

14 Wachukuykiqa rasun kaqta parlayanqaykimi.^†

Chalëcuykiqa allikunata rurayanqaykimi.^†

15 Bötasnikiqa Jesucristupa willakuyninta willakuyanqaykimi.^†

16 Escüduykiqa Tayta Diosman llapan shonquykikunawan yärakuyanqaykimi. Tsay escüduwanmi nina tsariykaq flëchawannö Satanás atacayäshuptikipis tsapakuyanki.^†

17 Cascuykiqa Tayta Dios salvayäshunqaykimi.^†

Espädaykiqa Tayta Diospa palabranmi. Tsaywanmi Espíritu Santu imaypis yanapayäshunki.^†

18 Imay hörapis Espíritu Santu tantiyatsiyäshunqaykinö Tayta Diosta mañakuyay. Imaypis mana ajayaypa rugakuyay. Yärakuq mayikikunapäpis mana qonqaypa mañakuyay.

19 Noqapäpis Tayta Diosta mañakuykuyällay willakur shumaq parlanäpä y pitapis mana mantsariypa Jesucristupa alli willakuyninta willakunäpä. 20 Tayta Diospa willakuqnin kar willakuyninta willakunqäpitami prësu wichqaraykä. Tayta Diosta mañakuyay mana mantsariypa pitapis willanäpä.^†

21 Kuyay wawqintsik Tíquico^† chämurmi willayäshunki imanö kaykanqäta y imata ruraykanqätapis. Paypis Señor Jesucristupa willakuqninmi kaykan. 22 Tsaymi payta kachaykämü imanö kaykanqätapis willayäshunaykipä. Paymi shakyätsiyäshunki Tayta Diosman shumaq yärakuyänaykipä.^†

23 Tayta Dios y Señor Jesucristo yanapaykuyälläshuy payman yärakur kuyanakuyänaykipä y alli kawayänaykipä. 24 Señor Jesucristuta llapan shonqunwan kuyaqkunata Tayta Dios kuyapar imaypis yanapaykullätsun. [Amén.]