3 Tayta Dios kuyanqan santu runakuna kaykarqa fornicación jutsata ama rurayaytsu, ayrajashqa ama kayaytsu, ni ima jutsatapis ama rurayaytsu. Tsaykunapäqa parlayllapis ama parlayaytsu. 4 Llutankunata, manakaqkunata ni llutan yarpayman apakuq brömakunatapis ama parlayaytsu. Tsaypa trokinqa Tayta Diosta imaykapitapis agradëcikuyay.

5 Shumaq tantiyakuyay: fornicación jutsata ruraqkuna y ayrajashqa kaqkunaqa Tayta Diospa y Jesucristupa mandakuyninman manami yaykuyanqatsu. (Ayrajashqa kaqkunaqa ïduluta adoraqnömi kaykäyan.) 6 Mana cäsukur jutsa ruraqkunataqa Tayta Diosmi ajarnin castiganqa. Tsaynö kaykaptinqa jutsata rurayänaykipä pipis parlapäyäshuptiki ama cäsupäyankitsu. 7 Wakin runakuna jutsata rurayaptinpis qamkunaqa ama rurayankitsu.

8 Ñöpataqa qamkunapis jutsata rurarmi tsakaycho kaykaqnö kawayarqayki. Kananmi itsanqa Jesucristuta chaskikushqa kar atsikyaqchöna kawaykäyanki. Tsaynö kaykarqa Tayta Dios munanqannö qoyay qoyay kawayay. 9 Atsikyaqchöna kawarmi^a kuyapäkuq kayanki, allillatana rurayanki y rasun kaqllatana parlayanki. 10 Tayta Dios munanqannö kawayänaykipä imaypis yarpachakuyay.

11 Tayta Diosta mana cäsukuq runakuna llutankunata rurayaptinpis qamkunaqa ama rurayaytsu. Tsaypa trokinqa llutan ruraykunata kachariyänanpä tantiyatsiyanki. 12 Paykuna pakayllapa jutsata rurayanqanqa pasaypa penqakuypämi kaykan. Tsaykunataqa ama parlayllapis parlayaytsu. 13 Atsikyaptin ima kanqanpis rikakanqannömi paykuna jutsata rurayanqanpis musyakanqa.

14 Jutsa ruraqkuna tantiyakuyänanpämi juk parlapis nin:

15 Tsaynö kaykaptinqa imanö kawaykäyanqaykitapis tantiyakuyay. Mana tantiyakuq runanö kawayänaykipa trokinqa yachaq runanö kawayay. 16 Runakuna mana allita rurar kawayaptinpis qamkunaqa allikunallata imaypis rurayay. 17 Mana tantiyakuq runanöqa ama kawayaytsu. Tsaypa trokinqa Señornintsik munanqannö kawayänaykipä shumaq yarpachakuyay.

18 Ama upyayaytsu. Machashqa runaqa llutankunatami ruran. Tsaypa trokinqa Espíritu Santupa munaynincho kawayay. 19 Salmukunata, cantukunata y cörukunata cantar llapan shonquykikunawan Tayta Diosta alabayay. 20 Ima kaptinpis Señornintsik Jesucristupa jutincho Tayta Diosta agradëcikuyay.^†

21 Jesucristupita mantsapakur juknintsik juknintsikpis respitanakur kawashun.

22 Warmikuna, Señor Jesucristuta cäsukuyanqaykinölla runaykikunatapis cäsukuyay.^† 23 Warmiqa runanpa munayninchömi kaykan. Tsaynöllami iglesiapis Jesucristupa munaynincho kaykan. Iglesianami paypa cuerpun y paymi iglesiapa salvaqnin.^† 24 Tsaynö kaykaptinqa Jesucristuta iglesian cäsukunqannö warmipis runanta imaykachöpis cäsukutsun.

25 Runakuna, iglesiata Jesucristo kuyanqannö warmikikunata kuyayay.^† Iglesiata kuyarmi wanuymanpis Jesucristo charqan. 26 Tsaynö wanurqan payman yärakuqkuna Tayta Diospa palabranwan mayllashqa kar santu kayänanpämi. 27 Tsaymi kikinpa ñöpanman pushanqa atsikyaypa atsikyaykaqta, jutsaynaqta, santuta y pay munanqannö kaykäyaqta.^†

28 Pipis warminta kuyarqa kikinpa cuerpuntapis kuyanmi. Tsaymi cuerpunta kuyanqannölla warmintapis kuyanan. 29 Manami pipis cuerpunta maltratantsu, tsaypa trokinqa allita mikurmi shumaq cuidan. Tsaynöllami Jesucristupis iglesianta cuidan. 30 Noqantsikmi Jesucristupa cuerpun, [aytsan y tullun] kaykantsik.^†

31 Tayta Diospa palabranchöpis kaynömi qellqaraykan: “Mamanpita y taytanpitami runa yarqukun warminwan mana rakikaypa tänanpä. Tsaynö täkurnami ishkanpis jukllayllanö kayanqa”.^†

32 Tsay qellqaraykaqqa Jesucristuwan jukllayllanö kanqantsiktami tantiyatsimantsik. Tsaynö tantiyatsimanqantsikqa pasaypa kushikuypämi. 33 Tsaymi yapaypis nï: Cuerpuykikunata kuyayanqaykinölla warmikikunatapis kuyayay. Warmikunapis runankunata respitayätsun.