2 Mana yachaq tukur kawayay, pïmaypäpis alli shonqu kayay y kuyanakur pacienciakuyay.^† 3 Espíritu Santu yanapayäshunqaykinölla yärakuq mayikikunawan juk shonqulla añaw kawayay.

7 Juk cuerpulla kashqapis juknintsik juknintsiktami Jesucristo kuyakuq kar churamashqantsik payta sirvinantsikpä. 8 Tsaymi Tayta Diospa palabrancho nin:

9 Junishpa witsanqanta niptinmi tantiyantsik Jesucristo kay patsaman shamunqanta. 10 Kay patsaman urämurmi ciëlumanna kutishqa. Llapanpä munayyuq karmi llapantapis makincho tsararan.

11 Paymi wakinta churashqa apóstol kayänanpä, wakinta profëta kayänanpä, wakinta alli willakuyninta willakuyänanpä y wakintana mitsikuqnö kar yachatsikuq kayänanpä. 12 Paykunatami Jesucristo churashqa yärakuq mayinkunata parlapar yachatsiyänanpä. Tsaynö yachatsiyaptinmi kamarikushqa kaykäyanqa Tayta Dios munanqanta rurar Jesucristupa cuerpun iglesiata^a llapanchöpis yanapayänanpä. 13 Tsaynö kaptinqa llapantsik juk shonqulla kar y Tayta Diospa Tsurinman yärakur Jesucristo kawanqannö noqantsikpis kawashun.

14 Tsaynö kawarqa manami pishi wamranönatsu kashun pipis mana allikunata yachatsir criyitsimänantsikpä. Tsaynöpis manami päjata wayra wakman kayman apanqannönatsu kashun. 15 Tsaypa trokinqa juknintsik juknintsikpis kuyanakur rasun kaqta imaypis parlashun. Tsaynöpami Jesucristo kawanqannö noqantsikpis kawashun.

Jesucristo umantsik kaptin 16 y noqantsik cuerpun kashqami juknintsik juknintsik yanapanakunantsikpä churamantsik. Tsaymi moquntsikkuna tsararänakunqannö yanapanakur^† kuyanakunantsikpä tantiyakushun.

17 Tsaynö kaptinmi Señor Jesucristupa apostolnin kar qamkunata yätsï Tayta Diosta mana cäsukuq runakunanö mana kayänaykipä. Paykunaqa upa yarpayninchömi 18 manakaqkunata yarpachakur kaykäyan. Juiciuynaq y chukru shonqu karmi Tayta Dios munanqannötsu kawayan. 19 Paykunaqa shonqunkuna munanqanta rurarmi penqakuyninkunapis kantsu. Jukwan jukwan kakurmi imaykaläya melanaypä jutsata rurayan.^†

20 Qamkunaqa manami tsaynö kawayänaykipätsu Jesucristupa willakuyninta yachakuyashqayki. 21 Jesucristupa alli willakuyninta rasunpaypa chaskikushqa kaykarqa y pay munanqannö kawayänaykipä yachakuykarqa 22 ñöpata kawayanqaykinö amana kawayaynatsu, tsaypa trokinqa makwa latsapata jitariqnö unay kawaynikikunata jaqiriyay.^† Ñöpataqa allita rurayanqaykita yarparmi shonquykikuna munanqannö llutankunata rurayarqayki. 23 Kananqa Espíritu Santu tantiyatsiyäshunqaykinölla kawayay. 24 Tayta Dios kanqannö qamkunapis kayänaykipämi mushuq kamanqan runana kaykäyanki. Tsaynö kaykarqa Tayta Dios munanqannö jutsaynaq kawayänaykipä mushuq kawaytana kawayay.^†

25 Ama llullapänakuyaytsu.^† Llapaykipis juk castanölla kaykarqa^† rasun kaqllata parlayay.

26 Ajanarpis jutsata ama rurayaytsu.^† Qoyayninpa ajashqalla ama kayaytsu. 27 Ajashqalla karqa shonquykikunatami diabluta kichapaykäyanki.

28 Ñöpata suwakushqa karqa amana suwakuyaynatsu. Suwakuyänaykipa trokinqa aruyay. Tsaynöpami imallaykikunapis kanqa muchuqkunata yanapayänaykipä.

29 Ama imatapis llutankunata parlayaytsu. Tsaypa trokinqa runa mayikita shakyätsiyänaykipä alli kaqkunallata parlayay.

30 Llutankunata rurar Espíritu Santuta ama llakikatsiyaytsu. Paymi shonquykikunata sellayäshushqayki^† Jesucristo kutimunan junaq salvashqa kayänaykipä.

31 Ama pitapis nanaparäyaytsu, ajapäyaytsu ni qayapäyaytsu. Ama pipa wasantapis rimayaytsu ni manakaqkunata parlayaytsu. 32 Tsaynö kawayänaykipa trokinqa jukniki juknikipis kuyanakur kawayay. Jesucristo wanunqanpita Tayta Dios perdonayäshunqaykinölla perdonanakuyay.^†