2 Tayta Dios kuyakuq karmi churamashqa qamkunaman y wakin mana Israel runakunamanpis alli willakuyninta apanäpä.^† Tsay willakuytaqa musyayankinami. 3 Alli willakuyninta mana musyashqa kayaptinpis Tayta Diosmi tantiyatsimashqa tsay willakuy ima kanqantapis.^† Tsaynö tantiyatsimanqantami kay cartacho willaykä.

4 Kay cartata liyirmi tantiyayanki Jesucristupa willakuyninta willanqäta. 5 Tsay alli willakuytaqa manami unay runakuna musyayarqantsu. Kananrämi santu apostolkunata y profëtakunatapis Espíritu Santu tantiyatsiyämashqa. 6 Tsay willakuymi nin: Tayta Diospa alli willakuyninta chaskirmi mana Israel runakunapis salvacionta tariyanqa. Tsaymi Israel runakunata Tayta Dios awninqankunata mana Israel kaqkunapis chaskiyanqa. Tsaynöpami llapantsikpis tsay castanöllana kaykantsik.^† 7 Tsay alli willakuyninta willakunäpämi Tayta Dios kuyakuq kar munayninwan churamashqa.

8 Tayta Diosman llapan yärakuqkunapitapis mana väliqnin kaykaptïmi^† Tayta Dios kuyamar churamashqa Jesucristupa alli willakuyninta mana Israel runakunaman chätsinäpä. Tsay alli willakuymanqa manami ima riquëzapis tinkuntsu. 9 Unaypita mana musyayanqan willakuyta pïmaytapis willanäpämi llapantapis kamaq Tayta Dios churamashqa.

10 Tsaynöpami Jesucristuman yärakuqkuna salvakuyaptin supaykunapis y ciëlucho kaykaq llapan angelkunapis tantiyayan Tayta Dios shumaq yachaq kanqanta. 11 Tsaynö tantiyaykäyan unaypita patsa Tayta Dios yarpanqannö Señornintsik Jesucristo noqantsik raykuq wanushqa kaptinmi. 12 Tsaymi Jesucristuman yärakur Tayta Diosta mana mantsapaypana mañakuntsik.

13 Jesucristo salvamanqantsikta musyaykarqa mana Israel runakuna raykuq prësu wichqaraptïpis ama llakikuyaytsu. Llakikuyänaykipa trokinqa salvakuyänaykipä willakunqäpita kushikuyay.

14 Tsaymi qonqurikuykur [Señornintsik Jesucristupa] Yayan Tayta Diosta mañakü. 15 Paymi kamashqa ciëlucho kaqkunata y kay patsacho kaqkunatapis. 16 Paytami mañakü gloriacho riquëzankuna kanqanman tupu Espïritunwan poderta qarayäshunaykipä. 17 Tsaynöpis mañakuykä shumaq yärakuyaptiki Jesucristo shonquykikunacho tänanpämi. Tsaynöpami alli michïkushqa jachanö y alli cimientushqa wayinö kar paypa kuyakuynincho kawayanki.

18 Kuyakuynincho kawarmi llapan yärakuq mayintsikkunawan tantiyakuyanki Jesucristo pasaypa kuyamanqantsikta. Pay kuyakuq kanqanqa pasaypa anchu, largu, altu y jondumi. 19 Tsaymi Tayta Diosta mañakü kuyakuyninta tantiyatsiyäshunaykipä. Tsaynöpami Tayta Dios qamkunacho kar pay munanqannö kawayänaykipä imaypis yanapayäshunki.

20 ¡Tayta Diosta alabaykulläshun! ¡Pasaypa munayyuq karmi mañakunqantsikpita y yarpanqantsikpitapis masrä yanapamantsik! 21 ¡Iglesian kanantsikpä Jesucristo salvamanqantsikpita llapantsik mana ajayaypa imaypis alabaykulläshun! Amén.