Tayta Dios kuyamarnintsik salvamanqantsik
2
Ñöpataqa qamkuna jutsa rurayllacho kar imayka wanushqanömi kayashqayki.a 2 Wakin runakunanöllami Tayta Diosta mana cäsukur Satanáspa munaynincho kawayashqayki. 3 Tsaynöllami noqantsikpis shonquntsik munanqanta rurar y mana allikunata yarpar kawarqantsik. Tsaynö kawanqantsikpitami wakin runakunatanö Tayta Dios castigamänantsikpäna karqan.†4 Tsaynö kaykashqapis Tayta Dios kuyapäkuq karmi pasaypa kuyamashqantsik. 5 Tsaymi jutsa ruraycho imayka wanushqanö kaykashqapis Jesucristuta wanunqanpita kawaritsimur noqantsiktapis wanushqanö kanqantsikpita kawaritsimashqantsik.† Kuyapäkuq kayninwanmi salvamashqantsik. 6 Jesucristuwan kawaritsimanqantsiknömi gloriacho paywan jamatsimashqantsik. 7 Tsaynö jamatsimashqantsik Jesucristucho kashqa pasaypa kuyapämanqantsikta shamuq watakunacho pïmaypis tantiyakunanpämi.
8-9 Tayta Dios kuyapäkuq karmi Jesucristuman yärakushqa salvacionta qaramashqantsik. Manami kikintsikpitatsu ni allita ruranqantsikpitatsu salvacionta tarishqantsik, sinöqa Tayta Diospitami. Tsaymi ni pipis alabakur ninmantsu: “Allillata ruranqäpitami Tayta Dios salvamashqa”. 10 Jesucristucho kashqami allikunata rurar kawanantsikpä mushuq kawayta Tayta Dios qomashqantsik. Tsaynö kawanantsikpäqa unaypita patsami destinamashqantsik.
Israel y mana Israel runakunatapis Jesucristo amistatsinqan
11 Ñöpata imanö kayanqaykitapis ama qonqäyaytsu. Israel runakunaqa señalakushqa karmi señalakunni kayaptiki manakaqman churayäshurqayki. 12 Jesucristupa willakuyninta manami musyayarqaykitsu. Israel runa mana kayaptikimi Tayta Dios awninqanta chaskiyänaykipä ruranqan pactukunapis qamkunapätsu karqan. Kay patsacho Diosniynaq y oqrakashqami kawayarqayki.
13 Tayta Diospita karucho kashqa karpis Jesucristucho karnami yawarninta jichanqanpita Tayta Diospa ñöpanchöna kaykäyanki. 14 Jesucristo tsaynö salvayäshushqayki alli kawayta qaramaqnintsik karmi.† Mana rikanakunanpä tsaparaq pirqata juchutsiqnömi Israel runa o mana Israel runa kaptintsikpis juk castanölla kanantsikpä qorimashqantsik. 15 Tsaynö qorimashqantsik Israel runakunapa leyninkunata, mandamientukunata y reglamentukunata anularmi.† Jesucristucho mushuq runa kanantsikpämi Israel runakunatapis mana Israel runakunatapis qorimashqantsik. 16 Cruzcho wanurmi Tayta Dioswan amistatsimashqantsik mana chikinakur allina kawanantsikpä.†
17 Kay patsaman Jesucristo shamurmi Tayta Diospa munaynincho alli kawanantsikpä willakuyta willakurqan. Tsay willakuyqa Tayta Diospita karucho kaykaq mana Israel runakunapä y paypa ñöpancho kaykaq Israel runakunapämi.† 18 Tsaymi Israel runa y mana Israel runa kashqapis Tayta Diosta imay hörapis mañakunantsikpä Jesucristo raykuq Espíritu Santu yanapaykämantsik.
Tayta Dios täkunan templu kanqantsik
19 Tsaynö kaptinmi qamkunaqa mana Israel runakuna karpis jäpanatsu kaykäyanki, tsaypa trokinqa Tayta Diospa wamrankunana karmi llapan salvashqa kaqkunawan tsay castallana kaykäyanki.
20 Alli cimientushqa wayinömi kaykäyanki. Tsay wayipa cimientunqa apostolkuna y profëtakuna yachatsiyanqankunami. Jesucristunami wayipa esquïnancho mas allinnin kaq rumi kaykan.†