Noqa Pablo, Jesucristupa apostolnin kanäpä Tayta Dios akramashqa kaptinmi qamkunaman kay cartata cartakaykämü. Jesucristo munanqannö kawarmi Tayta Diospana kaykäyanki. 2 Yayantsik Tayta Dios y Señor Jesucristo kuyapäyäshurniki alli kawayänaykipä yanapaykuyälläshuy.

3 ¡Señor Jesucristupa Taytan Dios alabashqa kaykullätsun! Jesucristucho kashqami gloriacho kaykaq imaykaläya bendicionninkunata qomashqantsik. 4 Kay patsata manarä kamarmi Jesucristuman churamarnintsik Tayta Dios akramashqantsik paypa ñöpancho jutsaynaq y santu kanantsikpä. 5 Kuyamarnintsikmi kikin munanqannö destinamarqantsik Jesucristo raykuq wamran kanantsikpä. 6 Kuyay Tsurinwan tsaynö destinamanqantsikpitami imaypis payta alabashun.

7 Kuyapäkuq karmi Tsurinpa yawarninwan rantimarnintsik llapan jutsantsikpita perdonamashqantsik.^† 8 Pasaypa kuyamarnintsik y yachayta qaramarnintsikmi 9 runakuna mana musyayanqanta Tayta Dios musyatsimashqantsik. 10 Tsaymi musyatsimashqantsik ciëlucho kaqkunata y kay patsacho kaqkunatapis pay destinanqan junaq Jesucristupa makinman llapanta churananpä kanqanta.

11 Kikin yarpanqannö llapantapis ruraq karmi noqantsiktapis Jesucristucho kashqa Tayta Dios destinamashqantsik herenciantsikta^† chaskinantsikpä. 12 Paymi kamakätsishqa Israel runakuna Jesucristuman puntata yärakur payta alabayänanpä. 13 Qamkunapis alli willakuyninta wiyarmi Jesucristuman yärakur salvakuyashqayki. Tsaynöpami awninqan Espíritu Santuwan^† shonquykikunata Tayta Dios sellayäshushqayki.^† 14 Espíritu Santuta qaramarnintsikmi Tayta Dios musyatsimantsik herenciantsikta qaramänantsikpä kanqanta y wamran kanantsikpä rantimanqantsikta. Tsaynö salvamanqantsikpitami imaypis payta alabashun.

15 Tsaymi Señor Jesucristuman shumaq yärakur wawqikunawan panikunawan kuyanakuyanqaykita musyar 16 qamkunapä Tayta Diosta mañakur imaypis agradëcikü. 17 Tsaynöllami Señornintsik Jesucristupa Taytan munayyuq Tayta Diosta mañakü Espíritu Santuwan tantiyatsiyäshuptiki payta reqiyänaykipä. 18 Shonquykikunacho tsaynö tantiyatsiyäshuptikimi musyayanki Tayta Dios qayashurniki imapä salvayäshunqaykita, pasaypa alli herenciata chaskiyanqaykita^† 19 y payman yärakuqkunata munayninwan shumaq yanapanqanta. 20 Tsay munayninwanmi Jesucristuta kawariskatsimur gloriacho derëchanman jamatsishqa.^† 21 Tsaynöpami Jesucristuta Tayta Dios churashqa kay vïdacho y wak vïdachöpis munayyuq kananpä. Tsaymi angelkunapitapis, supaykunapitapis y pïmaypitapis mas munayyuq kaykan.

22 Tsaynö munayyuq kaptinmi llapan imaykatapis paypa munayninman Tayta Dios churashqa.^† Iglesiata kuyarmi payta churashqa llapanpapis mandaqnin kar uman kananpä. 23 Noqantsiknami iglesian kar cuerpun kaykantsik.^† Tsaymi pay munanqannö kawanantsikpä imaypis yanapaykämantsik. Paypa munayninchömi llapan imaykapis kaykan.