Judá nacionta üva chakraman tinkutsinqan
5
Amïgüpa jutinchömi üva chakrapä cantashä:Amïgüpami jirkancho alli wayuq üva chakran karqan.
2 Rumikunata jipiskirmi shumaq corralarqan.
Nirkur alli ñawiyuq üva plantakunatami tsayman plantarqan.
Üva chakra chawpinchönami täpananpä törrita sharkatsirqan.
Üvata pallaskir jarunanpäpis juk pözutami läjakunawan rurarqan.
Amïgüqa yarparqan mishkiq üva wayunanpä kanqantami.
Tsaynö yarpaptinpis pochquqtami üvan wayushqa.†
3 Tsaymi chakrapa duëñun nin:
“Jerusalén runakuna y Judá runakuna, kanan mä niyämay.
¿Üva plantäkunaku o noqaku mana allita rurashqä?
4 ¿Imatatä mas ruräman üva plantäta?
¿Imallarä pishishqapis tsay plantakunaman wiñanäpä?
Noqaqa yarparqä mishkiqta üva wayunanpä kanqantami.
Allita plantaykaptïpis pochquqtami wayushqa.
5 “Kanan willashayki üva chakräta imanö ruranäpä yarpaykanqätapis.
Däñu ushananpä manami cuidashänatsu.
Jarutakuyänanpämi pirqa corralnintapis taqurishä.
6 Tsunyaqtami jaqiykushä.
Manami pipis podapanqanatsu ni uryapanqanatsu.
Kashallanami shataypa juntanqa.
Mana tamyamunanpämi pukutaytapis nishä”.
7 Llapanta mandaq Tayta Diospa üva chakranmi Israel runakuna y Judá runakuna kaykäyan.
Tayta Dios paykunata kuyar leyninkunata cumpliyänanpä niptinpis wanutsinakuyllachömi kakuyan.
Yanapanakuyänanpä niptinpis ñakaqkuna waqayanqallanmi wiyakaykan.†
Judá runakunata castigananpä ninqan
8 ¡Allaw, imanörä kayanki, maytsaychöpis wayikunata rantiqkuna!
Chakrakunatapis wakcho kaycho rantirmi llapanpa duëñun tikraykäyanki.
Entëru nacionchöpis ¿qamkunallanaku tayta munayanki?
9 Llapanta mandaq Tayta Diosmi nimashqa:
“Wayikuna atskami ushakanqa.
Mayjina jatunkaray ni kuyayllapä kashqa kaptinpis manami pipis tanqanatsu.
10 Kimsa hectaria üvapitami juk uyllullata vïnuta jipiyanqa.
Chunka costal trïgu muruta mururpis juk costalllatami qoriyanqa”.
11 ¡Allaw, imanörä kayanqa tsaka tsakapita upyaqkuna!
Paykunaqa vïnuta upuykällarmi tsakäpakuyanpis.
12 Atska vïnuta upyar fiestata rurayanqancho arpa, salteriu, tambur, flauta waqanqanmi wiyakan.
Tayta Dios castigananpä kanqantami itsanqa ichikllatapis tantiyakuyantsu.
13 Mana tantiyakuq kayanqanpitami kuyanqä runakunata juklä nacionman prësu apayanqa.
Mandaqninkunapis marka runakunapis mallaqaywan y yakunaywanmi wanuyanqa.
14 Mandaq autoridäkunata y común runakunatapis sepultürami shiminta äyakurkur ultakurkunqa.
Fiestacho kushishqa kaykaqtami llapantapis tsaynö ultakurkunqa.
15 Tsayrämi runa tukuqkunapis penqakur umpuräyanqa.
16 Pïmaypis musyanqa llapanta mandaq Tayta Dios jutsaynaq santu kanqantami.
17 Juchutsishqa markakunacho pipis manana taptinmi qewallana wiñanqa.
Tsaymi tsay markakuna kanqancho üshakunata cabrakunata mitsikuyanqa.
18 ¡Allaw, imanörä kayanqa llullakuypa mana alli costumbrita apaykämuqkuna!
Paykunaqa waskawan qarachaqnömi imayka mana allikunata apaykäyämun.
19 Paykunami nikäyan:
“Israel runakunapa santu Diosnin castigamaynintsikta munarqa mä juklla castigamäshun.
Desgraciata apamuyta munarqa juklla apamutsun.
Imanö castigamänantsikpä kanqanta musyaytami munayä”.
20 ¡Allaw, imanörä kayanqa mana alli kaqta “allimi” niqkuna y alli kaqta “mana allimi” niqkuna!
Tsaynö karmi atsikyaptinpis “tsakanmi” nikäyan.
Tsakaptinpis “atsikyanmi” nikäyan.
Iwjiqtapis “mishkiqmi” nikäyan y mishkiqtanami “iwjiqmi” nikäyan
21 ¡Allaw, imanörä kayanqa yachaq tukuqkuna!
Paykunaqa kikillankunapämi yachaq kaykäyan.
22 ¡Allaw, imanörä kayanqa qoyay qoyay upyallar kakuqkuna,
machätsikuqkunata tallu talluykur upuqkuna!
23 Qellaypä raykuqmi jutsayuqtapis jutsaynaq kanqanta niyan.
Jutsaynaqtapis jutsayuq kanqantami niyan.
24 Llapanta mandaq Tayta Diospa leyninkunata manami cäsukuyantsu.
Israel runakunapa santu Diosninpa palabranta manakaqmanmi churaykäyan.
Tsaymi tsaki raprakunata laqwaypa laqwar nina rupaqnö Tayta Dios paykunata ushakätsinqa.
Tsaynöllami tsaki oqshaman nina tsarikurkuqnö ushakätsinqa.
Jawan ismushqa jacha ushakanqannö y waytan shushur allpaman tikranqannömi ushakäyanqa.
25 Tayta Diosmi pasaypa rabyashqa kaykan.
Kuyanqan runakuna kaptintsikpis castigamänantsikpämi kamarikushqana kaykan.
Tsayta musyarmi jirkakunapis pasaypa tsuktsukyäyan.
Wanutsinqan runakunatapis cällikunamanmi jitariyanqa.
Castigamashqapis Tayta Diospa rabyanayninqa manami qallqunqatsu.
Kanqallanmi castigamänantsikpä rikaraykämantsik.†
26 Tayta Diosmi karu nacioncho taq runakunata bandërawan sëñaypa qayanqa.
Mayjina karucho taqkunamanpis wichyakuskinqami.
Qayakunqanta wiyarmi atacamänantsikpä maytsaypitapis ras chäyämunqa.
27 Tsay runakuna manami pishipäyanqatsu ni ishkiyanqatsu.
Manami punuyanqatsu ni pununäyanqatsu.
Wachukunkunapis manami paskakanqatsu ni llanqinkunapis rachinqatsu.
28 Flëchankunapis awja puntami kayanqa.
Flëchakunankunapis kamarishqallanami kanqa.
Cawallunkunapa shillunkunapis chukru ruminömi kanqa.
Carrëtankunapa ruëdankunapis shukukuy wayranörämi tumanqa.
29 Tsay runakunaqa pasaypa qayararmi atacamäshun.
Leonkuna qayaräyanqannörämi wiyakanqa.
Uywata leonkuna apayanqannömi prësu apamäshun.
30 Tsay runakuna atacamäshun bunyaypa bunyar kuchunman lamar chaqnömi.
Patsapis tsakaqnörä tikraptinmi junaq kanqanpis musyakanqatsu.