Isaíasta Tayta Dios qayanqan
6
Rey Uzías wanunqan watachömi Tayta Diosta rikarqä ciëlucho kuyayllapä trönuncho jamaraykaqta. Tsay trönunpita patsami latsapanpa kuchun templu junta karqan. 2 Jamaraykanqan jananpami serafín angelkuna kaykäyarqan. Tsay serafín angelkunaqa cada ünunmi soqta älayuq kayarqan. Ishkay älankunawanmi qaqllankunata tsapakuyarqan. Ishkaywanmi chakinkunata tsapakuyarqan. Y ishkaykaqwannami pajayarqan. 3 Paykunami juknin juknin niyarqan:“¡Santu, santu, santu!†
¡Llapanta mandaq Tayta Diosqa santumi!
¡Paypa munayninqa maytsaychömi!”
4 Tsaynö niyanqan wiyakaptinmi templupa punkunkunapis tsuktsukyarqanrä y qoshninami templuman juntarqan.† 5 Tsaymi pasaypa mantsakashqa nirqä:
“¡Ay taytallay, tayta! ¡Kananqa wanushächi!
¡Llutankunata parlaq kaykar y llutan parlaq runakunawan takukaykarpis mandaq Reytami rikashqä!
¡Paymi llapanta mandaq Tayta Dios!”†
6 Tsaynö parlaykaptïmi juk serafín ángel pajamurqan. Paymi altarpita jipimunqan rawraykaq shanshata tenäzawan apamurqan. 7 Tsay shanshata shimïman töpaykatsirmi nimarqan: “Shimikita kay shansha töpaptinmi llapan jutsaykipita perdonashqa kanki”.
8 Tsaypitanami Tayta Dios kaynö parlaqta wiyarqä: “Willakuq aywananpä ¿pillatarä kachashä? ¿Pillarä willakuqnintsik kanqa?”
Tsaymi nirqä: “Taytay, kaychömi kaykä. Noqa aywashä ari”.
9 Tsaynö niptïmi nimarqan:
“Aywar tsay runakunata niy:
‘Mayjina wiyarpis manami tantiyayankitsu.
Mayjina rikarpis manami cuentata qokuyankitsu’.
10 “Tsay runakunapa shonqunkunata chukruyätsiy.
Rinrinkunatapis upayätsiy.
Ñawinkunatapis qaprayätsiy.
Tsaynöpami mana rikar, mana wiyar, mana tantiyakur jutsankunata kachariyanqatsu.a
Tsaynö kayaptinmi noqapis alliyätsishätsu”.b †
11 Tsaynö nimaptinmi tapurqä: “Tayta Dios, ¿imayyaqtä tsaynö willakushä?”
Tsaymi nimarqan: “Tsaynö willakunki markakuna ushakäyaptin ni juk runallapis wayincho mana täyanqanyaq y chakrakunapis pasaypa tsunyaq rikakunqanyaq. 12 Tsaynöpis willakunki runakunata jukläman prësu apatsinqäyaq y kay nación chipyaq tsunyanqanyaq.
13 “Kay nacioncho cada chunka runakunapita jukllayllapis sobraptinqa yapaymi ushakätsishä. Tsaynö kaptinpis roble jachata y encina jachata mutuptin troncun quëdanqannöllami noqa akranqä runakuna wallkaqlla quëdayanqa. Troncunpita lloqrurrä sheqllimuqnömi juk ishkay kawaykar quëdaqkunapita yapay mirayanqa. Tsay runakunaqa cäsukayämanqami”.