Acazta Isaías willanqan
7
Jotampa tsurin y Uzíaspa willkan Acaz Judá nacionpa mandaqnin rey kaykaptinmi Siria nacionpa mandaqnin rey Rezínwan Israel nacionpa mandaqnin rey Peka soldädunkunawan aywayarqan Jerusalénta atacayänanpä. Peka Remalíaspa tsurinmi karqan. Chaykur mayjina atacarpis manami vinciyta kamäpakuyarqantsu. Kaychömi qellqaraykan manarä atacayaptin imanö kanqanpis.†2 Rey Acaztawan castankunatami willar niyarqan: “Siria nación runakunami Efraín runakunawana willanakuyashqa atacamänantsikpä”.
Tsaynö niyaptinmi rey Acaz y mandanqan runakunapis mantsariywan jachakuna wayrawan kuyuqnörä tsuktsukyäyarqan.
3 Tsaymi Isaíasta Tayta Dios nirqan: “Wamrayki Sear-jasubtab pushakurkur ayway rey Acazwan tinkunaykipä. Paywan tinkunki jana kaq estanquipita yaku yarqaykämuq sekyachömi. Tsay estanqui kaykan Taqshakuna Pampaman näni aywaqchömi.
4 “Tinkur reyta ninki: ‘Siria nacionpa mandaqnin rey Rezínwan Israel nacionpa mandaqnin rey Peka qampä pasaypa rabyashqa kayaptinpis ama yarpachakuytsu ni llakikuytsu. Paykunaqa mayjina rabyarpis mitsushqa yanta qoshniykaqnöllami kaykäyan.
5 “ ‘Tsay reykunaqa ushakätsishunaykipä willanakurmi niyashqa: 6 “Judá runakunata atacashun. Vinciskir tsay nacionpa mandaqnin rey kananpä Tabeelpa tsurinta churashun”.
7 “ ‘Paykuna tsaynö yarpäyaptinpis munaynincho tsararämaqnintsik Tayta Diosmi nin:
“ ‘¡Yarpäyanqannöqa manami imaypis päsanqatsu ni imapis kanqatsu!
8 Siria nacionpa capitalninqa Damasco markallami kaykan.
Damasco markacho reyqa Rezínllami kaykan.c
Kananpita soqta chunka pitsqa (65) watachömi Efraín nación chipyaq ushakanqa.
9 Efraín nacionpa capitalninqa Samaria markallami kaykan.
Y Samaria markacho reyqa Remalíaspa tsurillanmi kaykan.
Ninqäta mana criyirqa qamkunapis ushakäyankimi’ ”.
Emanuel yurinanpä willakunqan
10 Tayta Diosmi mastapis Acazta nirqan: 11 “Ninqäta cumplinäpä kanqanta musyanaykipä noqata mañakamay juk señalta rikatsinäpä. Mañakamanqayki señaltami kay patsachöpis o junaq ciëluchöpis rikatsishayki”.
12 Tsaymi Acaz nirqan: “Noqa manami ima señaltapis mañakushätsu ni Tayta Diosta probashätsu”.
13 Niptinmi Isaías nirqan: “Davidpita aywaraq Acaz, kanan shumaq wiyamay. Llapan mandashishuqniki castaykikunawan runakunata ajanätsir ¿manaku contentakuyanki? Kananqa ¿Tayta Diostapis ajanätsiytaku munaykäyanki? 14 Kananqa kikin Tayta Diosmi señalta rikatsiyäshunki. Juk virgen jipash qeshyaq rikakurmi ollqu wamrata qeshyakunqa. Tsay wamrapa jutintami churapanqa Emanuel jutin kananpä.d 15 Tsay wamra yarpayninman manarä charmi mantequïllatawan mielllata mikunqa.e 16 Tsay witsanmi mantsanqayki ishkay reykunapa nacionninkuna ushakäyanqa.
17 “Tayta Dios pasaypa ñakaykunata kachamuptinmi qampis, mandanqayki runakunapis y llapan castaykikunapis pasaypa ñakayanki. Efraín runakunawan Judá runakuna rakikäyanqan junaqpita patsa hasta kananyaq manami imaypis runakuna tsaynö ñakayashqatsu. Tsay ñakatsiyäshuqnikiqa Asiria nacionpa mandaqnin reymi kanqa.
18 “Tsay witsanqa Tayta Diosmi Egipto runakunata upukurutanörä y Asiria runakunata abëjatanörä kachamunqa. 19 Paykuna shamurmi tsunyaq raqrakunaman, machaykunaman, shata rurinkunaman y uywakuna yaku upukuyänan partikunamanpis churanakuyanqa.
20 “Shayämunanpämi Éufrates mayu tsimpanpita Asiria nacionpa mandaqnin reytawan soldädunkunatapis Tayta Dios minkakamunqa. Vinciyäshurnikimi kawaykar quëdaq runakunata pasaypa penqakatsir aqtsanta y penqaynincho kaykaq shaprantapis rutuyanqa. Tsaynöllami qaqllancho kaykaq shaprantapis püka pükaykur rutuyanqa.
21 “Tsay witsanmi kawaykar quëdaqkuna juk wäkata y ishkay üshallata wätayanqa. 22 Runakuna wallkaqlla kayaptinmi lichita upuyänanpä y mantequïllata mikuyänanpä aypanqa. Tsaymi mantequïllatawan abëjapa mishkinta pacha junta mikuyanqa.
23 “Tsaynöllami juk waranqa (1,000) üva plantaraykaq chakra kaptinpis y juk waranqa qellay chaniyuq chakra kaptinpis kashakunalla juntanqa. 24 Entëru nación muntiyaptinmi tsaychöqa flëchawan jirka uywata tsariyanqa. 25 Ñöpata lampawan aruyanqan alli chakrakunachöpis kashakunallanami juntanqa. Tsaymi tsaycho muruyanqanatsu, tsaypa rantinqa wäkakuna y üshakuna mikuyänan jirkakunallanami kanqa”.