Judá nacionta Asiria runakuna atacayänanpä ninqan
8
Tayta Diosmi nimarqan: “Pïmaypis liyinanpä jatun tablaman qellqay Maher-salal-hasbazta”.a2 Nimanqannö qellqanäpämi sacerdöti Uríasta† y Jeberequíaspa tsurin Zacaríasta testïgupä churashqä.
3 Tsaypitanami warmï profetïsa qeshyaq rikakur ollqu wamrata qeshyakurqan. Tsaymi Tayta Dios nimarqan: “Tsay wamrapa jutinta churapay Maher-salal-hasbaz jutin kananpä. 4 Tsay wamra ‘mamä, papä’ niyta manarä pashtatsiptinmi Damascuta y Samariata vinciskir Asiria nacionpa mandaqnin rey tsay markakunapita llapan riquëzankunata apakunqa”.
5 Tsaypitami yapay Tayta Dios nimarqan: 6 “Siloé raqracho alli yakunö kaykaptïmi Judá runakunaqa Rezínta y Remalíaspa tsurinta† mantsar noqaman yärakayämunnatsu. 7 Tsaynö kayaptinmi Asiria nacionpa mandaqnin reyta kachamushä Judá nacionta ushakätsinanpä. Soldädunkunawan shamurmi Éufrates mayu bötiypa bötir aywar imaykatapis ushakätsinqannö Judá runakunatapis atacar ushakätsiyanqa. 8 Mayu jakar runata kunkanyaq tsariqnö y älanta mashtaskir anka aywaqnömi entëru nacionta soldädukuna tsapaskiyanqa. ¡Emanuel, nacionnikita tsaynömi rurayanqa!”
Atacaqnin nacionkuna ushakäyänanpä ninqan
9 Juklä nación runakuna, wiyayämay.
Pasaypa ushakätsiyänaykipä qorikarpis kikikikunami ushakäyanki.
Ushakätsiyänaykipä kamarikuyaptikipis kikikikunatami ushakätsiyäshunki.
10 Imata rurayänaykipä willanakuyanqaykipis manami kamakanqatsu.
Imata rurayänaykipä yarpäyaptikipis manami rurakanqatsu.
Tsaynö kanqa Tayta Dios noqakunawan kaptinmi.b
Tayta Diosman yärakuyänanpä ninqan
11 Judá runakuna yarpäyanqannö mana yarpänäpämi Tayta Dios shumaq tantiyatsimar nimarqan:
12 “Reypa contran shäriykäyanqanta yarparmi runakuna juknö juknö parlaykäyan.
Tsaynö parlayaptinpis ama criyinkitsu.
Paykuna mantsayanqantapis ama mantsankitsu.†
13 Tsaypa trokinqa munayyuq y santu kanqäta tantiyar cäsukamanki.
Runakunapita mantsapakunaykipa trokinqa noqapita mantsapakunki.
14 Tsaynö kaptikiqa ima desgraciapitapis tsapäshaykimi.
Israel runakunapä y Judá runakunapämi itsanqa tinkakätsikuq y ishkitsikuq ruminö kashä.†
Jerusaléncho taq runakunapäpis mällanö y trampanömi kashä.
15 Paykunapita atskaqmi llutskayanqa, ishkiyanqa y wanuyanqa.
Wakintanami prësu tsariyanqa.
16 Revelanqäta qellqarkur mana oqrakänanpä shumaq siguray.
Nirkur shumaq cuidayänanpä cäsukamaqkunata entregay”.
17 Jacobpita aywaraqkunata Tayta Dios mana yanapaptinpis noqaqa paytami imaypis shuyäshä.
Imanö kaptinpis payllamanmi yärakushä.
18 Tayta Dios qaramanqan wamräkunawanmi kaycho kaykä.†
Israelchömi noqatapis y tsurïkunatapis señal kayänäpä churayämashqa.
Payqa Sión jirkancho taq llapanta mandaq Tayta Diosmi kaykan.
Suerti qatiqkunawan y brüjukunawan mana rikatsikuyänanpä ninqan
19 Wakinkuna niyäshunki: “Imata ruranantsikpä kanqanta musyanantsikpä suerti qatiqkunawan, brüjukunawan y adivïnukunawan rikatsikushun”.
Tsaynö niyäshuptikiqa niyanki: “¡Imanirtä wanushqakunapa almanta tapukushwan! Tsaypa trokinqa kuyanqan runakuna kaykarqa ¿manaku kikin Tayta Diosta tapukushwan?”
20 ¡Tayta Diospa leyninkuna y yachatsikuyninkuna imata ninqantapis yarpäyay! Runakuna niyäshunqaykiman Tayta Dios ninqankuna mana tinkuptinmi musyayanki tsay niyäshuqnikikuna imatapis mana tantiyaq kayanqanta.
21 Paykunaqa llakishqa y mallaqllami maypapis puriyanqa.
Mallaqaywan pasaypa ajanarmi reyta maldicionayanqa.
Tsaynöllami ciëlupa rikaykur Tayta Diostapis maldicionayanqa.
22 Kay patsacho imata ashirpis munayanqanta tariyänanpa trokinmi ñakayllata tariyanqa.
Ima ruraytapis mana kamäpakurmi pasaypa tsakaykaq paqaschönö kayanqa.