Rey yurinanpä ninqan
9
(8.23) Ñakaqkunapä patsa tsakashqanö kaptinpis manami tsaynöllatsu imayyaqpis kanqa. Zabulón trïbu y Neftalí trïbu runakunata penqakuyman Tayta Dios churashqa kaptinpisa shamuq watakunacho paykunapä kushikuymi kanqa.Paykuna täyanqan partiqa Galilea partimi kaykan. Tsaypami päsan lamar kuchunpa aywaq nänipis y Jordán mayupis. Tsaychömi mana Israel runakunapis taykäyan.†
2 (1) Tsakäpakushqanö kawarpis atsikyayta rikaqnömi salvacionninta rikayanqa.
Tsakaykaqchönö kawayaptinpis salvacionninqa aktsinömi kanqa.†
3 (2) Kuyanqayki runakunatami yanapashqayki.
Kushikuytapis shonqunkunamanmi churashqayki.
Cosëcha witsan kushikuqnörämi ñöpaykicho kushikuyanqa.
Riquëzata rakipänakur kushikuqnömi kushikuyanqa.
4 (3) Chikiqninkunata ushakätsirmi paykunapa munayninpita salvanki.
Unay castankunata madianita runakunapa munayninpita jipinqaykinömi yapaypis salvanki.†
5 (4) Guërra manana kaptinmi soldädukuna jatikuyanqan bötaskunatapis kayayanqa.
Guërracho pelyayanqan yawarllana latsapankunatapis kayayanqa.
6 (5) Tayta Dios tsaynö salvamäshun juk wamra yuriptinmi.
Paymi yurinqa wiñarkur mandamaqnintsik kananpä.
Paypa jutinmi kanqa Almiraypä Tantiyatsimaqnintsik,
Chikiqninkunata Vinciq Dios,
Imayyaqpis Kawaq Taytantsik
y Alli Kawayta Qaramaqnintsik.
7 (6) Rey David jamaranqan trönuman jamaykurmi imayyaqpis mandamäshun.
Munaynincho karmi imaypis alli kawashun.
Tayta Dios munanqannölla mandarmi alli kaqllata imaypis ruranqa.†
Llapanta mandaq Tayta Dios kuyamarnintsikmi tsaynö kananpä kamakätsinqa.
Israel nacionta Tayta Dios castigananpä ninqan
8 (7) Jacobpita aywaraq Israel runakunata castigananpä kanqantami Tayta Dios willakatsishqa.
Willakatsinqannöllami castiganqa.
9 (8) Tsaytaqa Samaria markacho taqkuna y Efraín runakunab llapanpis tantiyayanqami.
Paykunami runa tukurnin niyan:
10 (9) “Ladrilluwan shäritsinqantsik wayintsikta juchutsiyaptinpis llaqllashqa rumikunawannami yapay shäritsishun.
Sicómoro jachata mutuyaptinpis cedrutami plantashun”.
11 (10) Tsaynö nikäyaptinmi rey Rezínta† atacayänanpä Asiria runakunata Tayta Dios kachamunqa.
12 (11) Rupay yarqamunanpitami Siria runakunatapis kachamunqa.
Rupay jeqanan kaqläpitanami filisteo runakunatapis kachamunqa.
Paykunami Israel runakunata juk amuy mikukurkuqnölla ushakätsiyanqa.
Tayta Dios tsaynö castigarpis jinallami ajanashqa kanqa.
Yapay castigananpäpis listumi kaykan.
13 (12) Tsaynö castigaptinpis runakuna manami tantiyakuyanqatsu.
Llapanta mandaq Tayta Diosmanpis manami yärakuyanqatsu.
14 (13) Tsaymi Tayta Dios juk junaqllacho Israel nacionpa umantawan chupanta roqurinqa.
Palmatapis muturinqa y utututapis achurinqa.c
15 (14) Israel nacionpa umanqa kaykan mayor runakunawan mandaqkunami.
Chupannami kaykan llulla profëtakuna.
16 (15) Israelcho mandaqkuna engañakuq kayaptinmi runakuna oqrakashqanö kayan.
17 (16) Llapan runakunapis mana yärakuypä, mana allita ruraqlla y manakaqkunata parlaqllami kaykäyan.
Tsaymi chölukunatapis, waktsakunatapis y viüdakunatapis mana kuyapaypa Tayta Dios castiganqa.
Paykunata tsaynö castigarpis jinallami rabyashqa kanqa.
Yapay castigananpäpis listumi kaykan.
18 (17) Runakuna mana allita rurayanqanqa shatatapis kashatapis lunyaypa lunyar rupaq ninanömi kaykan.
Muntita rupaptin qoshni shäriqnömi kaykan.
19 (18) Tsaymi llapanta mandaq Tayta Dios rabyashqa castigaptin entëru nacioncho rupaq ninanö kanqa.
Oqshata nina lunyar ushaqnömi runakunatapis ushakätsinqa.
Tsay witsanqa runa mayinta manami pipis kuyapanqatsu.
20 (19) Derëchancho tarinqanta mikurpis jinallami mallaqaykäyanqa.
Itsuqnincho tarinqanta mikuyaptinpis manami pachankuna juntanqatsu.
Tsurinkunatapis mana kuyapaypami mikuyanqa.
21 (20) Manasés runakunawan Efraín runakunami maqanakuyanqa.
Ishkan qorikaykurmi Judá runakunawanpis guërrata rurayanqa.
Tsaynö pelyayanqa Tayta Dios paykunata castigar kamakätsiptinmi.
Tsaynö castigarpis jinallami rabyashqa kanqa.
Yapay castigananpäpis listumi kaykan.