10
¡Allaw, imanörä kayanki, mana allita rurar tsapakuyänallaykipä leyta ruraqkuna!Qamkunaqa tsay leykunawanmi runakunata pasaypa ñakatsiyanki.
2 Imaynaqkunatapis manami cäsuyankitsu.
Paykuna demandakuyaptinpis manami arreglayankitsu.
Viüdakunapa imaykantapis qechuykäyankimi.
Waktsakunatapis suwapaykäyankimi.
3 Tayta Dios castigayäshunqayki junaq ¡imatarä rurayanki!
Ushakätsiyäshunaykipä karu nacionpita chäyämuptin washäyäshunaykipä ¡pimanrä qellukäyanki!
Riquëzaykikunatapis ¡maymanrä pakayanki!
4 Ima ruraytapis mana kamäpakuykaqtami wakinnikita prësu tsariyäshunki y wakinnikita wanutsiyäshunki.
Tayta Dios tsaynö castigayäshurnikipis jinallami rabyashqa kaykanqa.
Yapay castigayäshunaykipäpis listumi kaykan.†
Asiria nacionta castigananpä kanqanta Tayta Dios willanqan
5 ¡Allaw, imanörä kanqa Asiria nacionpa mandaqnin rey!†
Tsay rey imayka wirukuna tukrünö kaptinmi pitapis ajanätsimaq kaqtaqa paywan castigatsï.
6 Mana cäsukayämar ajanätsimaq nación runakunamanmi payta mandä.
Paykunata vinciskirmi cällicho mitutanö jarukachaskir imaykankunatapis apan.
7 Tsayta rurananpä kachaptïpis tsay reyqa manami cäsumantsu.
Tsaytaqa suëñuyllanchöpis manami yarpantsu.
Tsaypa trokinqa maytsay nacionkunata illakätsiyllatami yarpan.
8 Tsaymi payqa nin:
“Capitannïkunapis reykunanöllami munayyuq kaykäyan.
9 Calno markatapis Carquemis markatanöllami ushakätsishqä.
Hamat markatapis Arfad markatanöllami ushakätsishqä.
Samaria markatapis Damasco markatanöllami ushakätsishqä.
10 Vincinqä nación runakuna adorayanqan ïdulukuna munayyuq kaptinpis vincishqämi.
Jerusaléncho y Samariacho adorayanqan ïdulukuna munayyuq kayanqanpitapis tsay ïdulukunaqa mas munayyuqmi kayarqan.
Tsaynö kaptinpis llapantami vincishqä.
11 Ïdulunkunaman yärakuykaptinpis Samariata vincinqänölla ¿manatsurä Jerusaléntapis ïduluntinta vincïman?”
12 Tsaynö parlar runa tukunqanpita y munayyuq tukur ollqunqanpitami Asiria nacionpa mandaqnin reyta Tayta Dios castiganqa. Sión jirkancho y Jerusaléncho taykaq runakunata castigayta ushaskirmi paytapis castiganqa.† 13 Tsay reyqa runa tukurmi nishqa:
“Munayyuq kar y yarpayyuq karmi llapantapis rurashqä.
Nacionkunapa lindërunkunatapis illakätsishqämi.
Llapan riquëzankunatapis apakamushqämi.
Puëdiq kaynïwanmi reykunatapis vincishqä.
14 Qeshucho runtuta tariskir apaqnömi juklä nación runakunapa riquëzankunatapis chipyaq apakamushqä.
Tsaynö ruraptï manami pipis michämashqatsu ni rimamashqatsu”.
15 ¿Jächaqa tsararaqninpita mas munayyuqtsurä?
Trosadörapis sutaqninpita manami mas munayyuqtsu.
Tukrupis manami tukrukuqninta munanqanpa apantsu.a
16 Tsaymi llapanta mandaq Tayta Dios Asiria soldädunkunata qeshyawan castiganqa.
Alliman churananpa trokinmi nina rupaqnö fiebri qeshyawan castiganqa.
17 Santu Tayta Diosqa Israel runakunapa salvaqnin karmi aktsinö kaykan.
Kananqa nina lunyaypa lunyar rupaykaqnömi kanqa.
Tsaymi kashakunata nina rupar ushaqnö Asiria nacionpa soldädunkunata juk junaqllacho ushakätsinqa.
18 Asiriacho kuyayllapä muntikunata chipyaqmi ushakätsinqa.
Runakuna muruyanqanta y plantayanqantapis llapantami ushakätsinqa.
19 Tsaymi munticho jachakuna wallkallana quëdayaptin ayka kayanqanta wamrallapis yupaskinman.
Kawaykar quëdaq Israel runakuna Diosman yärakuyänanpä ninqan
20 Tsay witsanqa wallkaqllami Israel runakuna kawaykar quëdayanqa.
Paykunaqa mananami ushakätsiqnin Asiria runakunaman yärakuyanqanatsu.
Tsaypa trokinqa Israel runakunapa santu Diosninllamannami yärakuyanqa.
21 Wallkaqllami Tayta Diosman yapay yärakuyanqa.
Jacobpita aywaraq runakunapitaqa wallkaqllami munayyuq Tayta Diosman kutiyanqa.
22 Lamar kuchuncho aqushanörä kanan kaykarpis Israel runakunaqa wallkaqllami kawaykar quëdayanqa.
Wallkaqlla quëdananpämi nacionninkunata Tayta Dios ushakätsinqa.
23 Yarpanqannömi llapanta mandaq Tayta Dios llapanta ushakätsinqa.†
24 Llapanta mandaq Tayta Diosmi nin: “Sióncho taykaq kuyanqä runakuna, Asiria runakunata ama mantsayaytsu. Egipto runakuna unay castaykikunata ñakatsiyanqannö ñakatsiyäshuptikipis ama mantsayaytsu. 25 Kananpita manarä unaytami qamkunapä rabyashqa kaykanqä qallqunqa. Tsaypitaqa Asiria runakunatami ushakätsishä. 26 Paykunata pasaypa asutaptïmi madianita runakunata Oreb qaqacho Gedeón vincinqannö kanqa.† Tsaynöllami kanqa väräta lamar jananpa Moisés toqiptin Egipto runakunata jitarpukätsinqänö. 27 Tsay witsanqa atska qepita aparitsiqnö ñakatsiyäshuptikipis salvayäshaykimi. Yüguta matankätsiqnö katsiyäshuptikipis makinkunapita jipir bendicionnïta churamuptïmi alli kawayanki”.
Israel nacionta Asiria runakuna atacayanqan
28 ¡Asiria soldädukunaqa Ajat partimannami chäyashqa!
¡Tsaypita Migrón partipa aywar Micmas partimanpis chäyashqanami!
29 ¡Raqrata tsimparamurmi Geba partichöna patsakuyashqa!
Tsayta rikarmi Ramá runakuna pasaypa mantsariykäyan.
Saúlpa markan Gabaacho taqkunaqa qeshpirmi aywakuyashqa.
30 ¡Galimcho taqkuna, llapan kallpaykikunawan qayaräyay!
¡Laischo taqkunapis, tsayta wiyayay!
¡Allaw, imanörä kaykäyan Anatot markacho taqkuna!
31 Madmena runakuna mashtakaypa mashtakarmi qeshpiyashqa.
Gebimcho taqkunapis pakakuyashqami.
32 Kanan hörami Asiria runakuna Nob particho jamapaykäyan.
Tsaychömi kamarikuykäyan Jerusaléncho kaykaq Sión jirkanta atacaq yaykuyänanpä.
33 Tsaynö kaptinpis llapanta mandaq Tayta Diosmi Asiria runakunata ushakätsinqa.
Jatun qeruta muturiqnömi paykunata saqtarinqa.
Runa tukuyaptinpis jatusaq jachata mutur patsaman ishkitsinqannömi ushakätsinqa.
34 Jirakashqa muntitapis jächawan tsaquqnömi ushakätsinqa.
Líbanucho jatusaq qerukunata qapapaqtarä ishkitsiqnömi paykunatapis ushakätsinqa.