Davidpita aywaraq runa mandamaqnintsik kananpä ninqan
11
Troncunpita jacha sheqllimuqnömi mandamaqnintsik yurinqa.Payqa Isaípitaa aywaraqmi kanqa.†
2 Tayta Diospa Espïritunmi paycho kanqa.
Tsaymi tantiyakuq y yachaq kanqa,
yätsikuq y munayyuq kanqa,
musyaq y Tayta Diospita mantsapakuq kanqa.
3 Tayta Diospita mantsapakur pay munanqannöllami kawanqa.
Payqa manami rikaskillartsu pitapis juzganqa.
Tsaynöpis manami ninshi ninshillawantsu pitapis jutsayuq kanqanta ninqa.
4 Pïninpis mana kaqkunapami janan shärinqa.
Imaynaqkunatapis llapan nacionnintsikchömi respitatsinqa.
Parlaykuptillanmi runakuna wanuyanqa.
Mana alli runakunatapis juk pükayllami ushakätsinqa.†
5 Tseqllanta jinchi watarkurmi Tayta Dios munanqannölla imaypis mandar rasun kaqllata ruranqa.†
6 Tsay witsanqa atuqwan üshapis juntumi puriyanqa.
Tigriwan kapishpis juntumi punuyanqa.
Becërruwan leonpis añawmi puriyanqa.
Tsaykunataqa wamrallami mitsinqapis.
7 Wäkapis ösuwan juntumi qewata mikuyanqa.
Wawankunapis juntumi punuyanqa.
Leonpis törunömi qewata mikunqa.
8 Cobra ninqan culebrapab qeshun jananchömi chuchuykaq wamrapis pukllanqa.
Tsayrä wasqishqa wamra culebrapa qeshunman makinta jatiptinpis manami imananqapistsu.
9 Tayta Dios mandanqan sagrädu jirkanchöqa mananami pipis llutankunata ruranqanatsu ni pitapis ñakatsinqanatsu.†
Lamarcho yaku junta kanqannömi Tayta Diosta reqiqkunapis kay patsacho junta kayanqa.†
10 Tsay witsanmi Isaípita aywaraq runata Tayta Dios churanqa llapan nación runakunata mandananpä.†
Payta reqiyänanpämi llapan marka runakuna aywayta munayanqa.
Pay tanqan nacionpämi pïmaypis parlayanqa.
Juklä nacionpita Israel runakuna kutiyämunanpä ninqan
11 Tsay witsanmi juklä nacionkunacho mashtakashqa kaykäyanqanpita kuyanqan runakunata Tayta Dios yapay qorimunqa.
Tsaymi kutitsimunqac Asiriapita, Egiptupita, Patruspita, Etiopíapita, Elampita, Sinarpita, Hamatpita y lamar kuchuncho kaq nacionkunapitapis.
12 Maytsay nacionkunapitapis Israel runakuna kutiyämunanpämi bandërata jawiyanqa.
Wakcho kaycho mashtakashqa kaykaqtami Judá runakunatapis qorimunqa.
13 Nacionninkunaman kutiykamur Efraínd runakuna mananami Judá runakunawan chikinakuyanqanatsu.
Judá runakunata chikiqkuna llapanmi ushakäyanqa.
Judá runakunapis manami Efraín runakunata chikiyanqanatsu.
14 Tsaypa trokinqa Judá runakunapis Efraín runakunapis qorikaskirmi rupay jeqanan kaqlächo kaykaq Filistea nacionta atacayanqa.
Rupay yarqamunan kaqlächo taqkunatapis vincirmi imaykanta apakuyanqa.
Edom nacionpis y Moab nacionpis paykunapa makinkunachömi kayanqa.
Amón nación runakunapis paykuna niyanqantami rurayanqa.
15 Nacionninman kutiyämunanpämi Puka Lamar chawpinpa päsayänanpäpis Tayta Dios nänita kichapaskinqa.
Éufrates mayuta päsayänanpämi tsay mayu jananpa makinta joqarkunqa.
Makinta joqarkur pasaypa wayratsimurmi tsay mayuta qanchisman rakirinqa.
Tsaypami runakuna llanqinkunatapis mana jipiypa päsayanqa†
16 Asiriacho taq Israel runakunapis jatun nänipami kutiyämunqa.
Egiptupita yarqamur jatun nänipa shayämunqannömi kutiyämunqa.†