Mayor wawqikunapä ninqan
5
Mayor wawqikuna, noqapis qamkunanö mayor wawqimi kaykä. Tsaynöpis Jesucristo ñakanqankunata kikïmi rikashqä. Jesucristo kutimur llapantsiktami qorikamäshun. Tsaymi qamkunata yätsï: 2 Tayta Diosman yärakuqkunata rikayänaykipä churashqa kaykarqa üsha mitsiqkuna üshankunata rikayanqannö shumaq rikayay. Qelanaykar rikayänaykipa trokinqa llapan voluntänikiwan rikayay.† Ama qellaypä raykuqllaqa rikayankitsu, tsaypa trokinqa Tayta Dios munanqannö kushishqa rikayanki.3 Yaqa patronnöqa wawqikunata panikunata mana alli ama rikayankitsu, tsaypa trokinqa allita rurar kawayay paykunapis rikayäshurniki allita rurar kawayänanpä. 4 Tsaynö kawarmi pastorkunapa pastornin Jesucristo† kutimuptin imayyaqpis mana ushakaq corönata chaskiyanki.
Tayta Diospa munaynincho kawanantsikpä ninqan
5 Chölukuna jipashkuna, mayor wawqikunata cäsukuyay. Llapaykipis mana yachaq tukullar respitanakuyay. Yachaq tukuqkunataqa Tayta Dios manami yanapantsu. Qollmi shonqu kaqkunatami itsanqa kuyapar yanapan.† 6 Tsaynö kaykaptinqa munayyuq Tayta Diosta cäsukur mana yachaq tukuypa kawayay. Paymi tiempu chämuptin respitashqa kayänaykipä churayäshunki.† 7 Tayta Dios yanapaykäyäshuptikiqa llapan llakikuynikikunatapis paypa makinman churaykuyay.†
8 Shumaq tantiyakurnin maya mayalla kawayay. Chikimaqnintsik diabluqa imayka mallaqashqa leonnömi pitapis jutsata ruratsinanpä qayararrä puriykan. 9 Yärakuq mayintsikkuna maytsaychöpis qamkunanö ñakaykäyanqanta musyaykarqa Tayta Diosman yärakur diabluta ichipäyay.
10 Noqantsik raykuq Jesucristo wanushqa kaptinmi kuyapäkuq Tayta Dios qayamashqantsik gloriacho imayyaqpis kawanantsikpä. Tsaymi kay patsacho ñakashqapis Tayta Dios yanapamäshun jutsata mana ruranantsikpä, pay munanqannö kawanantsikpä y payman shumaq yärakunantsikpä. 11 ¡Tayta Dios munayyuq kanqanpita imayyaqpis alabashqa kaykullätsun! Amén.
Cartapa ushanan
12 Wawqintsik Silvanuwanmi† kay cartata cartakaykäyämü. Payqa Tayta Dios munanqannömi imaypis kawan. Kay cartächömi qamkunapä qellqaykämü Tayta Dios kuyapäyäshunqaykita tantiyakuyänaykipä. Payman imaypis yärakuyay.
13 Babiloniachoa criyikuq mayintsikkunami winchikuyninkunata apatsikayämushunki. Paykunatapis qamkunatapis Tayta Diosmi akrayäshushqayki. Tsaynöllami kuyanqä wawqintsik Marcuspis† winchikayämushunki.
14 Jukniki juknikipis qaqllaykikunacho mutsanakur winchinakuyay. Jesucristucho kaqkuna alli kawaycho kaykuyällay. [Amén.]