Jutsata mana ruranantsikpä ninqan
4
Noqantsik raykuq Jesucristo kay patsacho ñakashqa kaykaptinqa qamkunapis ñakayänaykipä listu kaykäyay. Jesucristuman criyikuyanqaykipita ñakarqa jutsa ruraypäqa manami yarpäyankinatsu. 2 Tsaynö kawarmi llutan ruraykunaman umayki churakashqanatsu kawayanki, tsaypa trokinqa kay patsacho kawayanqaykiyaq Tayta Dios munanqannömi kawaykäyanki. 3 Ñöpataqa wakin runakunanöllami jutsata rurar warmipis ollqupis jukwan jukwan kakuyashqayki, mana allikunata rurayashqayki, upyallaman churakashqa kawayarqayki y ïdulukunatapis adorayashqayki. Kananqa amana tsaynö kawayaynatsu.4 Ñöpata kawayanqaykinö manana kawayaptikimi amïguykikuna mana tantiyar manakaqman churayäshunki. 5 Paykunataqa kawaqkunata y wanushqakunata juzgaq Tayta Diosmi cuentata mañanqa. 6 Llapan runakunata juzgananpä kaptinmi Jesucristupa alli willakuyninta willakuyarqan. Tsaymi chaskikuqkuna wanushqana kaykarpis Tayta Diospa ñöpanchöna kawaykäyan.
Yanapanakunapä ninqan
7 Kay patsa ushakänanpä wallkallanami pishin. Tsaynö kaykaptinqa Tayta Dios munanqannö kawayänaykipä yarpachakur imay hörapis Tayta Diosta mañakuyay. 8 Imanö karpis llapan shonquykikunawan kuyanakuyay. Rasunpaypa kuyakuq runaqa imata rurayaptinpis perdonanmi.† 9 Pipis wayikikunaman chämuptin mana parlakachayllapa patsatsiyanki.†
10 Tayta Diosmi kuyapäyäshurniki imaykaläya yachayta qarayäshushqayki. Tsay yachayta chaskiyanqaykiman tupu jukniki juknikipis yanapanakuyanki. Tsaynö yanapanakurqa Tayta Dios munanqannömi kawaykäyanki. 11 Willakuyänaykipä yachayta chaskishqa kaykarqa Tayta Diospa willakuyninta willakuyay. Wakinta yanapayänaykipä yachayta chaskishqa kaykarqa Tayta Dios yanapayäshunqaykinö yanapayay. Tsaynöpami Jesucristo raykuq Tayta Dios llapanchöpis alabashqa kanqa. ¡Tayta Diosqa imayyaqpis munayyuqmi! ¡Payqa imayyaqpis alabashqa kaykullätsun! Amén.
Ñakarpis kushikunantsikpä ninqan
12 Kuyay wawqikuna panikuna, imayka pruebakunata päsarpis ama llakikur niyaytsu: “¿Imanirtä kayjinanpa ñakaykä?” 13 Tsaypa trokinqa Jesucristo ñakanqannö ñakarpis kushikuyay. Tsaynö ñakarpis kay patsaman chipipirrä kutimunqan junaqqa pasaypami kushikuyanki.† 14 Tayta Diospa munayyuq Espïritun qamkunawan kaykaptinqa Jesucristuman criyikuyanqaykipita ashlliyäshuptikipis kushikuyay. [Ashlliyäshurnikiqa Jesucristutami manakaqman churaykäyan. Qamkunami itsanqa payta alabaykäyanki.]
15 Runa mayikikunata wanutsiyanqaykipita, suwa kayanqaykipita, imaykamanpis llutalla jatikäyanqaykipita o imatapis llutankunata rurayanqaykipita ñakarqa penqakuypämi kayanki. 16 Jesucristuman criyikuyanqaykipita ñakarqa ama penqakuyaytsu. Tsaypa trokinqa salvayäshunqaykipita Tayta Diosta kushishqa alabayay.
17 Jesucristuman yärakuqkuna ñakayänanpä kaq tiempu chämushqanami. Noqantsikcho ñakaykuna qallaykuykaptinqa Tayta Diospa alli willakuyninta mana cäsukuq runakuna ¡imanörä ñakayanqa! 18 Tayta Diosta cäsukur kawaqkunapis ñakarrä salvakuykäyaptinqa Diosta mana cäsukuqkuna ¡imanörä kayanqa!
19 Tayta Dios munanqannö kawayanqaykipita ñakarpis kamamaqnintsik Tayta Diosman yärakur allikunata imaypis rurayanki. Payqa ima päsayäshuptikipis manami qonqäyäshunkitsu.