Runayuqkunata y warmiyuqkunata yätsinqan
3
Warmikuna, runaykikunata cäsukuyay Jesucristupa willakuyninman mana criyikushqa kayaptinpis.† Tsaynö kawayaptikimi mana willaykäyaptikipis tantiyakur criyikuyanqa. 2 Kuyayanqaykita y respitayanqaykita rikarmi tantiyakuyanqa.3 Kuyayllapä kayanqaykiqa manami aqtsaykikunata imaykaläyaman naqtsakuyanqaykitsu, qori adornukunata jatikuyanqaykitsu ni pasaypa chaniyuq latsapakunata jatikuyanqaykitsu. Tsaykunaqa janaykikunallatami shumaq rikakatsin.† 4 Tsaypa trokinqa qollmi shonqu kayanqayki y pïmaywanpis alli kawayanqaykimi kuyayllapäqa kaykan. Tsaynö kawayanqaykimi Tayta Diospa shonqunpänö kaykan.
5 Tayta Diosman yärakuq unay santa warmikunapis manami adornakuyänallanpätsu yarpachakuyaq, tsaypa trokinqa runanta respitar kawayänanpämi. 6 Tsaynöllami Sarapis runan Abrahamta cäsukur “papä” nir respëtuwan rikarqan. Runakuna chikiyäshuptikipis allillata rurarqa Saranömi kaykäyanki.
7 Runakuna, warmikita imanö kuyayänaykipäpis shumaq tantiyakuyay.† Tayta Dios kuyayäshurnikimi warmikikunatapis y qamkunatapis salvayäshushqayki. Warmikiqa delicädu väsunömi kaykan. Tsaynö kaykaptinqa respitarnin kuyayay. Warmikiwan mana alli kawayaptikiqa mañakuyanqaykitapis Tayta Dios manami wiyayäshunkitsu.
Kuyanakur kawanantsikpä ninqan
8 Llapaykipis juk shonqulla kuyapänakur y tsay castanölla kuyanakur pïmaywanpis shumaq kawayay. 9 Runa mayikikuna chikiyäshuptikipis ama chikiyaytsu. Ashlliyäshuptikipis ama ashlliyaytsu. Bendicionta chaskiyänaykipä Tayta Dios akrayäshunqaykita musyaykarqa chikishuqnikikunapis bendicionta chaskiyänanpä Tayta Diosta mañakuyay. 10 Tayta Diospa palabranchömi nin:
“Alli kawayta munarqa
y kushishqa kawayta munarqa
llutankunata ama parlayaytsu
Tsaynöpis ama llullakuyaytsu.
11 Llutankunata rurayänaykipa trokinqa allillata rurayay.
Rimanakuyänaykipa trokinqa pïmaywanpis alli kawayay.
12 Alli ruraqkunataqa Tayta Diosmi imaypis rikan.
Mañakuyanqantapis wiyanmi.
Mana alli ruraqkunatami itsanqa rikaytapis munantsu”.†
Ñakarpis mana llakikunantsikpä ninqan
13 Allillata ruraykäyaptikiqa ¿pirä mana allita rurayäshunkiman? 14 Allillata ruraykäyaptiki ñakatsiyäshuptikipis Tayta Diosmi yanapayäshunki.† Tsaymi pitapis mantsayankitsu ni chikiyäshuptikipis llakikuyankitsu. 15 Tsaypa trokinqa Jesucristoa mandashuqniki kanqanta tantiyar pay munanqannö kawayanki.†
Jesucristuman imanir yärakuyanqaykita pipis tapuyäshuptiki tantiyatsiyänaykipä imaypis listu kaykäyay. 16 Tantiyatsirqa alli shimillaykikunapa parlapäyanki. Tsaynöpis runa mayikikunawan shumaq kawayanki. Tsaynö kawayanqaykita rikarmi wasayki rimaqkunapis penqakuyanqa. 17 Llutanta rurayanqaykipita ñakayänaykipa trokin mas allimi kanman Tayta Dios munaptinqa allita rurayanqaykipita ñakayaptikipis.
18 Jesucristupis jutsaynaq kaykarmi jutsasapakuna raykuq ñakarqan. Tayta Diosman pushamänantsikpämi jutsantsikpita juk kutilla wanurqan. Wanuptinpis Espíritu Santumi kawaritsimurqan. 19 Espíritu Santupa munayninwanmi prësu wichqaraykaq espïritukunamanb willaq aywarqan. 20 Tsay espïritukunaqa Noé kawanqan witsan Diosta mana cäsukuqmi kayarqan. Tsay witsan runakuna jutsata rurayaptinpis Tayta Dios manami jukllatsu castigarqan, tsaypa trokinqa arca rurayta Noé ushanqanyaqmi shuyararqan. Tsay arcaman puwaq runakunallami yaykuyarqan. Paykunallami yaku aynatsiptin diluviupita salvakuyarqan.† 21 Tsay yakuqa bautizakunqantsik yakunömi. Bautismuqa manami cuerpuntsik limpiu kananpätsu, tsaypa trokinqa jutsantsikta kacharir Tayta Dios munanqannöna kawanantsikpämi. Tsaymi Jesucristo kawarimushqa kaptin salvakuntsik. 22 Paymi ciëluman kutir Tayta Diospa derëchanchöna kaykan. Tsaymi angelkunapis y mandaqkunapis paypa munaynincho kaykäyan.