2
Jesucristupa willakuyninta chaskikushqana kaykarqa llutan ruraykunata kachariyay. Ama llullakuyaytsu, ama pitapis allish tupäyaytsu, ama chikinakuyaytsu, ni wasarima kayaytsu. 2 Llullu wamra chuchunanqannö qamkunapis llapan shonquykikunawan Tayta Diospa palabranta yachakuyay. Tsaynöpami wamra wiñar tantiyakunqannö Tayta Dios munanqannö kawayänaykipä tantiyakuyanki. Tsaypämi Tayta Dios salvayäshushqayki. 3 Tsaynö yachakuyänaykipämi Tayta Dios kuyakuq kanqanta tantiyayashqayki.†Cimientucho allinnin ruminö Jesucristo kanqan
4 Jesucristuta runakuna mana alli rikayaptinpis cimientucho allinnin ruminö kananpämi Tayta Dios churashqa. Tsaynö kaykaptinqa Jesucristuman yärakuyay. 5 Qamkunapis ruminö kayaptikimi Tayta Dios churaykäyäshunki templun kayänaykipä y payta sirviq santu sacerdötikuna kayänaykipä. Tsaymi altarman churashqa sacrificiunö kar llapan shonquykikunawan payta sirviyänayki. Jesucristo yanapayäshuptiki sirvirmi Tayta Diospa shonqunpänö kayanki.
6 Jesucristupämi Tayta Diospa palabran kaynö nin:
“Siónmanmi cimientupä allinnin rumita churä.
Tsay rumiqa akrashqami kaykan.
Pipis payman yärakuq kaqqa manami manakaqllapätsu yärakunqa”.†
7 Yärakuqkunapäqa kushikuypämi Jesucristo kaykan. Mana yärakuqkunapämi itsanqa Tayta Diospa palabrancho nin: “Wayi shäritsiqkuna ‘kay rumiqa manami allitsu’ nir jitariyanqanmi wayi esquïnan cimientuchöna churaraykan”.†
8 Mastami nin: “Tinkakätsikuq y ishkitsikuq ruminömi kashä”.†
Jesucristuman mana yärakuqkunaqa Tayta Diospa palabranta mana cäsukurmi tsay rumicho tinkakaqnö kaykäyan. Tsaynö kayänanpämi destinashqa kayarqan.
9 Qamkunami itsanqa kaykäyanki Tayta Dios akranqan runakuna, payta sirviq sacerdötikuna, kuyanqan santa nación runakuna† y paypa munaynincho kaykaq runakuna.† Tsakäpakushqanö kayanqaykipitami aktsinman jipiyäshushqayki† kuyakuq kanqanta pïmaytapis willayänaykipä. 10 Ñöpataqa manami Diospa wamrantsu kayashqayki. Kananmi itsanqa wamranna kaykäyanki. Ñöpataqa manami kuyapäyäshushqaykitsu. Kananmi itsanqa kuyapäyäshushqaykina.†
Tayta Dios munanqannö kawanantsikpä ninqan
11 Kuyay wawqikuna panikuna, kay patsacho qorpanölla kayaptikimi† qamkunata rugä llutan yarpaynikikunata mana rurayänaykipä. Tsay yarpaykunaqa contraykikunami kaykan. 12 Jesucristuman mana yärakuqkunawan alli kawayay. Alli kawayanqaykita rikarmi manakaqkunata kanan parlarpis Jesucristo kutimunan junaq Tayta Diosta alabayanqa.
Autoridäkunata cäsukunantsikpä ninqan
13 Señor Jesucristuta manakaqman mana churayänanpä llapan mandayäshuqnikikunata cäsukuyay nación mandaq rey kaptinpis 14 y autoridäkuna kayaptinpis. Autoridäkunatami rey churashqa mana alli ruraqkunata castigayänanpä y alli ruraqkunapa favornin kayänanpä. 15 Tayta Diosqa munan allita rurar kawayänaykitami. Tsaynö kawayaptikiqa Diosta mana cäsukuq runakuna wasaykita manami rimayanqanatsu.
16 Munayanqaykinö kawayänaykipä librimi kaykäyanki. Librina karpis jutsata ama rurayankitsu. Tsaypa trokinqa Tayta Diosta sirvir pay munanqannö kawayay. 17 Llapan runakunata respitayay. Yärakuq mayikikunawan kuyanakuyay. Tayta Diospita mantsapakur kawayay. Reyta respitayay.
Patronninta cäsukuyänanpä ninqan
18 Wätaykuna, patronnikikuna alli runa kaptinpis o yaqa kaptinpis respitar cäsukuyay. 19 Tayta Dios munanqannö kawayanqaykipita jutsayuqtanö ñakatsiyäshuptikipis ama qallayäyaytsu. Mana qallayaypa kawarqa allitami ruraykäyanki. 20 Llutanta rurayanqaykipita ñakarqa ¿ima allitatä ruraykäyanki? Allikunata rurayanqaykipita ñakarmi itsanqa Tayta Dios munanqannö kawaykäyanki.
21 Tsaynö ñakayänaykipämi Tayta Dios qayayäshushqayki. Jesucristo noqantsik raykuq ñakashqa kaptinmi musyantsik pay ñakanqannö noqantsikpis ñakanantsikpä kanqanta. 22 Payqa manami ima jutsatapis rurarqantsu ni pitapis llullaparqantsu.† 23 Runakuna ashlliyaptinpis manami imatapis nirqantsu. Ñakatsiyaptinpis manami juraparqantsu, tsaypa trokinqa pitapis mana jananpaypa juzgaq Tayta Diospa makinmanmi kachaykurqan.†
24 Jesucristo cruzcho ñakarmi noqantsik raykuq jutsantsikpita wanurqan. Tsaynö wanurqan noqantsikpis jutsa ruraypä wanur Tayta Dios munanqannö kawanantsikpämi. Yawarninta jicharmi alliyätsimashqantsik.a † 25 Ñöpataqa oqrakashqa üshanömi karqantsik.† Kananmi itsanqa Jesucristupa makinchöna kaykantsik. Paymi mitsimaqnintsik y alli rikamaqnintsik.