Noqa Pedrumi, Jesucristupa apostolnin kar, kay patsacho qorpanölla kayaptiki kay cartata cartakaykämü. 2 Tayta Dios unaypita patsa reqiyäshurnikimi Espíritu Santuwan akrayäshushqayki Jesucristuta cäsukuyänaykipä y yawarninta jichanqanpita perdonashqa kayänaykipä. Tayta Dios kuyapäyäshurniki alli kawayänaykipä yanapaykuyälläshuy.

3 ¡Señornintsik Jesucristupa Taytan Diosta alabaykulläshun! Kuyapäkuq kayninwanmi mushuq kawayta qaramashqantsik yapay yurishqanöna kanantsikpä.^† Jesucristo kawarimushqa kaptinmi musyantsik noqantsikpis kawaskamur gloriaman chänantsikpä kanqanta. 4 Gloriaman charnami Tayta Dios shuyätsimanqantsik herenciata chaskishun. Tsay herenciaqa manami imaypis ushakanqatsu, ismunqatsu ni illakanqatsu. 5 Tayta Diosman yärakuyaptikimi munayninwan yanapayäshunki Jesucristo kutimuptin kamarinqan salvacionta chaskiyänaykipä.

6 Tsayta musyarmi kay patsacho kawayanqaykiyaq pasaypa ñakarpis kushishqa kawaykäyanki. 7 Qorita tsullutsirrä püru kanqanta musyanqantsiknömi qamkunapis ñakaykunawanrä musyayanki Tayta Diosman llapan shonquykikunawan yärakuyanqaykita. Yärakuynikikunaqa qoripitapis masmi välin. Tsaymi imayka ñakaycho karpis Tayta Diosman yärakuyaptikiqa kay patsaman Jesucristo kutimur alabayäshunki, alli rikayäshunki y alliman churayäshunki.

8 Jesucristuta mana rikashqa karpis paytami kuyaykäyanki.^† Tsaymi payman yärakurnin kushishqa kawaykäyanki. Tsaynö kushikuyanqaykitaqa manami imanöpapis tantiyayta kamäpakuyankitsu. 9 Tsaynö kushikuyanki Jesucristuman yärakur salvacionta tariyanqaykipitami.

10 Tayta Dios kuyakuq kayninwan salvamänantsikpä kanqantaqa profëtakunapis shumaq tapukuykurmi willakuyarqan. 11 Tsaynö willakuyänanpämi Jesucristupa Espïritun paykunata tantiyatsirqan Cristo ñakar wanunanpä kanqanta y kawarkamur llapanpä munayyuq kananpä kanqanta. Tsaynöpami profëtakuna musyayta munayarqan Cristo pï kanqanta y imay shamunanpä kanqanta. 12 Tsay profëtakunatami Espíritu Santu tantiyatsirqan paykuna kawayanqan witsan shamunanpa trokin shamuq watakunachörä shamunanpä kanqanta.

Jesucristo shamushqana kaptinmi kananqa ciëlupita shamuq Espíritu Santupa munayninwan Jesucristupa alli willakuyninta willakuykäyan. Jesucristo noqantsik raykuq wanur salvamanqantsiktami angelkunapis imaykanöpa tantiyayta munayan.

13 Tsaynö kaykaptinqa shumaq tantiyakur Tayta Dios munanqannö kawayay. Jesucristo kutimur Tayta Diospa ñöpanman qorimänantsikpä kanqanta ama qonqäyaytsu.

14 Tayta Diospa wamran kaykarnaqa payta cäsukur munanqannö kawayay. Jesucristuman manarä yärakur kawayanqaykinöqa ama kawayaynatsu. 15 Tsaypa trokinqa akramaqnintsik Tayta Dios santu kanqannö qamkunapis santu kayay. 16 Tayta Diospa palabranchöpis kaynömi qellqaraykan: “Noqaqa santumi kä. Qamkunapis santu kayay”.^†

17 Pipapis mana janan shäriypa juzgaq Tayta Diosta “Taytallä” nikarqa kay patsacho qorpanölla kawayanqaykiyaq paypita mantsapakur kawayay. 18 Unay castaykikuna kawayanqannömi qamkunapis jutsata rurar kawayashqayki. Tsaynö kaykäyaptiki manami qellaywantsu ni qoriwantsu Tayta Dios rantiyäshushqayki, 19 tsaypa trokinqa Jesucristupa chaniyuq yawarninwanmi. Sänu carnishta sacrificiupä pishtayaptin yawarninta jichanqannömi Jesucristupis noqantsik raykuq yawarninta jichashqa.

20 Kay patsata manarä kamar Tayta Dios destinashqa kaptinmi noqantsik kawanqantsik witsan Jesucristo kuyamarnintsik shamushqa. 21 Pay raykuqmi Tayta Diosman yärakuykäyanki. Wanunqanpita kawaskatsimurmi gloriacho munayyuq kananpä Tayta Dios qorikushqa.

22 Willakuyninta^a cäsukuyaptikimi kuyanakur kawayänaykipä Tayta Dios purificayäshushqayki. Tsaynö kaykaptinqa llapan shonquykikunawan jukniki juknikipis kuyanakur kawayay. 23 Tsaynö kawayänaykipämi yapay yurishqanö kayanki.^† Manami mamaykikunapitatsu ni taytaykikunapitatsu tsay kawayta chaskiyashqayki, sinöqa Diospa palabranta chaskiyanqaykipitami. Paypa palabran kawaq karmi imaypis ushakanqatsu.