Salmo 9 (9a)
Ñakaycho kaqkunata Tayta Dios yanapanqan
(1) Cantaqkunapa mandaqninpämi. Kënata y arpata tukayllapa cantayanki. David qellqanqan salmu.
1 (2) Tayta Dios, llapan shonqüwanmi alabashayki.
Mantsakaypä ruranqaykitami willakushä.
2 (3) Yanapamanqaykita tantiyarmi pasaypa kushikü.
Poderyuq Tayta Diosllä, qamllatami imaypis alabashayki.
3 (4) Yanapamaptikimi conträkuna qeshpiyan.
Qeshpiykäyanqanchömi wanuyanpis.
4 (5) Trönuykiman jamaykurmi conträkunata juzgashqayki.
Manakaqta niyämaptinpis janämi shärishqayki.
5 (6) Juk nación runakunatami ollqutupashqayki.
Jutsata rurar kawaq runakunatami wanutsishqayki.
Paykunataqa manami pipis yarpanqanatsu.
6 (7) Conträ runakuna llapanmi ushakäyashqa.
Markankunapis chipyaqmi ushakäyashqa.
Markankunapa jutinkunapis qonqakashqanami kaykan.
7 (8) Tayta Diosqa imayyaqpis mandamaqnintsik reymi kaykan.
Paymi trönunman jamaykur runakunata juzganqa.
8 (9) Llapan runakunatami imanöpis kawayanqanman tupu juzganqa.
Llapan naciontami mayqanpapis janan mana shäriypa juzganqa.
9 (10) Tayta Diosmi imaynaqkunapa janan shärin.
Ñakayaptinpis paymi yanapan.
10 (11) Tayta Dios, ashishuqnikikunatami imaypis yanapanki.
Tsaymi makikicho kawaqkuna qamllaman yärakayämun.
11 (12) Sióncho taq Tayta Diosta alabashun.
Yanapamanqantsikta maytsay nacionkunachöpis willakushun.
12 (13) Wanutsikuq runakunataqa Tayta Dios juzganmi.
Ñakaqkuna waqayanqanta wiyar yanapanmi.
13 (14) Tayta Diosllä, kuyapaykallämay.
Conträkuna ñakatsimaptin yanapaykallämay.
Wanutsiyämänanta ama munaykullaytsu.
14 (15) Siónpa punkunkunaman aywaykurmi pïmaytapis willashä alabayäshunaykipä.
Salvamanqaykipitami kushishqa alabashayki.
15 (16) Juk nación runakunaqa kikin uchkunqan pözuman jeqaqnömi kaykäyan.
Trampata churayanqanman kikin jatikaqnömi kaykäyan.
16 (17) Tsaynöpami Tayta Dios tantiyatsimantsik mana cäsukuq runakunata castigaykanqanta.
Castigashqa kayänanpäqa kikinkunami jutsayuq kaykäyan. Higaión. Selah
17 (18) Jutsata rurar kawaq runakuna y Diosta mana cäsukuq runakunaqa wanurmi ushakäyanqa.
18 (19) Muchuqkunataqa Tayta Dios manami chipyaqtsu qonqaykunqa.
Imay karpis salvanqami.
19 (20) Tayta Dios, juklla yanapaykullay.
Runakuna llutanta rurayänanta ama kachapaykullaytsu.
Juk nación mana criyiq runakunata ñöpaykicho juzgaykullay.
20 (21) Tayta Dios, mantsakäyänanpä juzgaykullay.
Ushakaqlla kayanqanta tantiyaykatsillay. Selah