Salmo 8
Tayta Dios munayyuq kanqan y runakunata kuyanqan
(1) Cantaqkunapa mandaqninpämi. Üvata jarur cantayanqayki tönuwan kay salmuta cantayanki. David qellqanqan salmu.
1 (2) Tayta Diosllä, kay patsacho imaykapäpis munayyuqmi kaykanki.
Ciëluchöpis qammanqa manami pipis tinkuntsu.†
2 (3) Pishi wamrakuna y chuchuykaq wamrakunapis alabayäshunkimi.†
Tsayta rikarmi contrayki shäriqkuna penqakur upällakuyan.
3 (4) Ciëlutapis dëduykiwanmi rurashqayki.
Killata y qoyllurkunatapis makikiwanmi kamashqayki.
“¿Imanatä runa kaykan tsayjinanpa paypä yarpachakunaykipä?
¿Imanatä runa kaykan pasaypa kuyanaykipä?”†
5 (6) Runata kamashqayki cäsi angelnö munayyuq kananpämi.
Reytanömi churashqayki munayyuq y respitashqa kananpä.
6 (7) Llapan kamanqaykitapis munayninmanmi churashqayki.
Kay patsacho kaqkunataqa llapantami makinman churashqayki:†
7 (8) üshakunata, wäkakunata, jirka uywakunata,
8 (9) pajaqkunata, lamarcho pescädukunata
y tsaycho tukuy casta kawaqkunatapis.
9 (10) Tayta Diosllä, kay patsacho imaykapäpis munayyuqmi kaykanki.