Salmo 7
Chikiqninkunata juzgananpä Tayta Diosta mañakunqan
(1) Kay salmuta David cantarqan Benjamín trïbu Cus jutiyuq runa contran shärishqa kaptinmi.
1 (2) Tayta Diosllä, qamllamanmi yärakamü.
Chikimar qatikachämaqkunapita salvaykallämay.
2 (3) Mana tsapämaptikiqa león rachikachar ushaqnöchi ushayämanqa.
Qam mana salvamaptikiqa ¿pirä salvamanqa?
3 (4) Tayta Dios, ¿imatatä mana allita rurashqä?
¿Ima jutsatatä rurashqä?
4 (5) ¿Amïgütatsurä ajanätsishqä?
¿Conträ runakunatatsurä qallayätsishqä?
5 (6) Tsaynö kashqa kaptïqa conträkuna maypapis qatikachäyämätsun.
Taripaykayämar qarachashqa puritsiyämätsun.
Pasaypa penqakuyman churayämätsun. Selah
6 (7) Tayta Dios, ajarnin chikimaqnïkunapa contran shäriykullay.
Janä shärir paykunata castigaykullay.
7 (8) Maytsay nación runakuna puntaykiman qorikäyämutsun.
Paykunata juzganaykipä trönuykiman jamaykullay.
8 (9) Qammi maytsay nación runakunata juzganki.
Runakunapa contran imatapis mana rurashqa kaykaptïqa janä shäriykullay.
9 (10) Pïmaytapis mana janan shäriypa juzgaq Tayta Dios,
runakuna imata yarpäyanqantapis musyaykankimi.†
Jutsa ruraqkunaqa amana mas jutsata rurayätsunnatsu.
Jutsaynaq runakunataqa yanapaykullay.
10 (11) Mana allikunapita tsapämänanpä Tayta Diosmi escüdü kaykan.
Paymi alli shonqu runakunata salvan.
11 (12) Jutsata ruranqanman tupumi pitapis Tayta Dios castigan.
Payqa mana janan shäriypami jutsa ruraqkunata imaypis juzgan.
12 (13) Jutsa rurayta runa mana kachariptinqa castigananpä espädan aptashqami kaykan.
Flëchanwan flëchananpäpis kamarikushqami kaykan.
13 (14) Jutsa ruraqta ushakätsinanpämi armankuna kaykan.
Nina lunyaykaq flëchankunapis toqiraykanmi.
14 (15) Tantiyakuyay jutsata rurar kawaq runakuna imanö kawayanqantapis.
Paykunaqa mana allikunata rurayänallanpämi imaypis yarpachakuyan.
Runa mayintami imallachöpis engañaykäyan.
15 (16) Ñakayänanpä kikinkunami jutsayuq kaykäyan.
Kikinkuna uchkuyanqan pözuman jeqaqnömi kayanqa.
16 (17) Jutsata rurayanqanpita castïgumi paykunaman chanqa.
Runa mayinkunata ñakatsiyanqanpita kikinkunatami ñakatsiyanqa.
17 (18) Pïmaytapis mana janan shäriyllapa juzganqanpitami Tayta Diosta imaypis alabashä.
Poderyuq Tayta Diostami kushishqa imaypis alabashä.