Salmo 6
Llakikur Tayta Diosta mañakunqan
(1) Cantaqkunapa mandaqninpämi. Puwaq cuerdayuq instrumentuta tukar cantayanki. David qellqanqan salmu.
1 (2) Tayta Dios, ajarninpis ama ñakaykatsillämaytsu.
Ajanashqa karpis ama castigaykallämaytsu.†
2 (3) Tayta Dios, kuyapaykallämay.
Pasaypa kallpaynaqmi kaykä.
Tayta Dios alliyaykatsillämay.
Entëru cuerpümi tsuktsukyaykan.
3 (4) Pasaypa llakishqami kaykä.
Tayta Dios, ¡imayyaqrä yanapamankitsu!
4 (5) Tayta Dios, kutimur yanapaykallämay.
Kuyapämar wanuypita salvaykallämay.
5 (6) Wanukuqkunaqa manami yarpäyäshunkinatsu.
Pamparaykarqa ¿pirä alabashunkiman?†
6 (7) Ikikyaypa ikikyarmi waqaykä.
Paqaskuna waqaptïmi jawnäpis weqïwan ushmashqa kaykan.
7 (8) Qoyay qoyay waqaptïmi ñawïpis shumaq rikannatsu.
Runakuna conträ shäriyaptinmi pasaypa waqayllawan ñawïtapis oqraykäna.
8 (9) Mana alli ruraqkuna, ¡ñöpäpita witikuyay!†
Tayta Diosmi waqanqäta wiyamashqa.
9 (10) Rugakunqätami Tayta Dios wiyamashqa.
Mañakunqätami Tayta Dios chaskimashqa.
10 (11) Conträkunaqa pasaypa mantsakar penqakushqami rikakuyanqa.
Paykunaqa illaqpitami aywakuyanqa.