Salmo 5
Tayta Dios tsapänanpä mañakunqan
(1) Cantaqkunapa mandaqninpämi. Kënata tukar cantayanki. David qellqanqan salmu.
1 (2) Tayta Dios, mañakamunqäta wiyaykallämay.
Shonqullächo rugakamuptïpis wiyaykallämay.
2 (3) Llakikur mañakamunqäta cäsuykallämay.
Qammi mandamaqnï rey y Diosnï kaykanki.
Qamllatami imaypis mañakushayki.
3 (4) Tsaka tsakallami qamman mañakamü.
Tuta tutallami qamman rugakamü.
Mañakamunqäta wiyamänaykitami shuyä.
4 (5) Taytay, runakuna mana allita rurayaptin manami kushikunkitsu.
Jutsata rurar kawaq runakunataqa manami ñöpaykimanpis chaskinkitsu.
5 (6) Orgullösu kaqkunataqa manami rikaytapis munankitsu.
Llutan ruraq runakunataqa chikinkimi.
6 (7) Llullakuqkunataqa ushakätsinkimi.
Sakyapakuq y wanutsikuqkunataqa manami chaskinkitsu.
7 (8) Noqatami itsanqa kuyapäkuq kar wayikiman yaykamunäpä chaskimanki.
Sagrädu templuyki kaqläpa rikaykamurmi llapan shonqüwan adorashayki.
8 (9) Tayta Dios, allillata ruraq kar conträkunapita tsapaykallämay.
Munanqaykinö kawanäpä alli nänipa pushaykallämay.a
9 (10) Chikimaqnïkunaqa manami rasun kaqta imaypis parlayantsu.
Shonqunkunachöpis jutsa rurayllapämi yarparaykäyan.
Shiminkunapis kicharaykaq sepultüranömi.
Llullakuytaqa imaykanöpami yachayan.†
10 (11) Tayta Dios, paykunataqa castigaykullay.
Llutan yarpayninkunata manakaqman churaykullay.
Paykunaqa contraykimi rikakuyashqa.
Mana wanakuypa jutsata rurayanqanpita mañakuyäshuptikipis ama cäsuytsu.
11 (12) Qamman yärakamuqkunaqa kushikuyätsun.
Alli rikanqaykipita imaypis alabaykuyälläshuy.
Kuyashuqnikikunaqa imaypis kushishqa kawayätsun.
12 (13) Tayta Dios, qam munanqaykinö kawaq runakunamanmi bendicionnikita churanki.
Paykunata kuyaparmi imayka escüdunö kaykanki.