Salmo 4
Tayta Diosta paqaspa mañakunqan
(1) Cantaqkunapa mandaqninpämi. Cuerdayuq instrumentuta tukar kay salmuta cantayanki. David qellqanqan salmu.
1 (2) Tsapämaqnï Tayta Dios, mañakamunqäta wiyaykallämay.
Conträ shäriyaptinmi janä shärishqayki.
Kananpis kuyapämar wiyaykallämay.
2 (3) Yachaq tukuq runakuna, ¡imayyaqrä manakaqkunata jitapäyämanki!
¡Imayyaqrä llutankunata yarpar llullakuyänallaykipä yarpachakuykäyanki! Selah
3 (4) Kay ninqäta tantiyakuyay:
Tayta Diosqa munanqannö kawaq kaqkunatami kuyan.
Tsaymi mañakuptï wiyaman.
4 (5) Rabyakurpis jutsata ama rurayaytsu.†
Tsaypa trokinqa cämaykikunacho shumaq yarpachakuyay. Selah
5 (6) Tayta Diospä sacrificiuta apar payman yärakuyay.
6 (7) Atska runakunami niyan:
“¿Pirä yanapamäshun alli kawayta tarinantsikpä?”
Tayta Dios, imaypis alli rikaykayällämay.
7 (8) Tsaytsika trïguta cosechar y atska üvata qorir runakuna kushikuyanqanpitapis masrämi qamqa kushikatsimanki.
8 (9) Noqaqa añawllami punuküpis.
Llapan mana allikunapitapis tsapämaptikimi kushishqa kawä.†