Salmo 10 (9b)
Mana alli runakunata castigananpä Tayta Diosta mañakunqan
1 Tayta Dios, ¿imanirtä karucho kaykanki?
¿Imanirtä llakikuycho kaykaptï pakakunki?
2 Jutsa ruraq runakunaqa orgullösu karmi munayanqanta muchuqkunata ruratsiyan.
Paykunaqa jukpä trampata churayanqanmanmi kikinkuna jeqayanqa.
3 Mana alli runakunaqa llutan yarpayninkunapitami alabakuyan.
Ayrajashqa runakunawan kuyanakurmi Tayta Diostapis manakaqman churayan.
4 Runa tukuq karmi Diosta ashiyantsu.
Dios kanqantaqa manami yarpayllapis yarpäyantsu.†
5 Paykuna yarpäyanqannömi llapan rurayanqankunapis kaykan.
Tayta Dios juzgananpä kanqantaqa manami tantiyayantsu.
Contrankunataqa pasaypa manakaqmanmi churayan.
6 Imaypis desgraciaman mana chäyänanpä kanqantami yarpäyan.
Imaypis kushishqalla kawayänanpä kanqantami yarpäyan.
7 Runa mayinta llutallami maldicionayan, llullapäyan y ashlliyan.†
Alli shimillanpa parlaparmi engañayänanpä yarpachakuyan.
8 Jäkuqninman pakakuykurmi runa mayinta asaltayan.
Nänipa aywaykaqta shuyaykurmi illaqpita wanutsiyan.
Pïninpis mana kaptinmi atacayänanpä rikapaykäyan.
9 Machaynincho pakakuykur león shuyaqnömi muchuqkunata shuyaräyan.
Mällawan tsariqnömi mana alli yarpayninkunawan engañayan.
10 Lätakaykur león imatapis tsariqnömi atska runakunata tsariyan.
11 Tsaynö rurayan Dios mana juzgananpä kanqanta yarparmi.
Imatapis mana rikanqantami criyiyan.
12 Tayta Dios, mana alli runakunataqa juklla juzgaykullay.
Ñakatsiyanqan runakunataqa ama qonqaykullaytsu.
13 ¿Imanirtä mana alli runakuna manakaqman churayäshunki?
¿Imanirtä yarpäyan mana juzganaykipä kanqanta?
14 Qamqa rikaykankimi pasaypa mana allikunata rurayanqanta.
Jutsata imanö rurayanqanman tupu paykunata castigaykullay.
Pïninpis mana kaqkunaqa qammanmi yärakayämun.
Waktsakunapa yanapaqnin qamllami kaykanki.
15 Jutsata rurar kawaqkunapataqa rikrantapis pakiskillay.
Llapan jutsata rurayanqanpita juzgaykullay.
Tsay niraq runakunataqa llapanta ushakaykatsillay.
16 Tayta Diosllami imaypis rey kaykan.
Payta mana cäsukuq runakunaqa ushakanqami.
17 Tayta Dios, cäsukushuqniki runakuna mañakayämunqantaqa imaypis wiyankimi.
Paykunataqa shakyätsinkimi y kuyapankimi.
18 Waktsakunata y ñakaycho kaykaq runakunatami yanapanki.
Allpallapita kamanqayki runaqa runa mayinta amana ñakatsiyätsunnatsu.