Apóstol tukuqkunata mana chaskiyänanpä ninqan
11
Löcu kanqäta conträ runakuna niyaptinpis mana ajanayllapa wiyayämay. Yapaymi nï: Wiyayämay. 2 Tayta Diosnömi qamkunapä pasaypa llakikü. Jipash tsurinta piwanpis manarä kakushqata runaman entregayta munanqannömi qamkunatapis Jesucristuman entregayta munaykä. 3 Itsanqa llakikü Evata Satanás engañanqannö† qamkunatapis llutan yachatsikuqkuna engañayäshunaykipä kaqtami. Majatsakänanpä parlanqan chölullapä jipash kanqannömi qamkunapis Jesucristullapä kayanki.4 Tsaynö kaykaptinqa ¿imanirtä chaskiykäyanki llutan yachatsikuqkuna “Jesucristuqa manami yachakuyanqaykinötsu kaykan” niyäshuptiki y “Espíritu Santuqa manami yachakuyanqaykinötsu kaykan” niyäshuptiki y “Diospa willakuyninqa manami yachakuyanqaykinötsu kaykan” niyäshuptiki? 5 Tsay llutan yachatsikuqkuna “mas allinnin kaq apostolmi kayä” niyäshuptikipis noqami paykunapita mas rasunpaypa kaq apostolqa kä. 6 Runakunapa ñöpancho shumaq parlayta mana yacharpis musyämi imapita parlanqätapis. Tsaynö karmi Tayta Diospa willakuyninta imaykanöpa qamkunata willashqä.
7 Tayta Diospa willakuyninta grätislla willakur ¿jutsatatsurä rurashqä? Pägayämänaykipa trokinmi gastükunapäqa arupakushqä. Tsaynö arushqä Jesucristupa willakuyninta chaskikur salvakuyänayki raykuqmi. 8 Qamkunata sirvinäpämi wakin wawqikuna panikuna gastükunapä yanapayämashqa. 9 Tsaymi qamkuna kaqcho karpis imä pishiptinpis mañakushqätsu. Tsaypa trokinqa Macedoniapita wawqikunami ministiyanqäpä apayämurqan.†
Gastükunapä mana mañakunqänöllami imaypis mañakuyäshaykitsu. 10 Tayta Dios musyanmi rasun kaqllata nikanqäta. Jesucristupa alli willakuyninta grätislla willakunäpä manami entëru Acaya provinciacho pipis michämanqatsu. 11 Gastükunapä yanapayämänaykita mana munaptï capazchi qamkunata manakaqman churayanqäta yarpäyanki. ¡Manami tsaynötsu! ¡Tayta Dios musyanmi qamkunata kuyanqäta!
12 Kuyarnikipis Tayta Diospa willakuyninta willakur gastükunapä manami imaypis mañakuyäshaykitsu. Tsaynöpami tsay llutan yachatsikuqkuna noqakunanö apóstol kayanqanta yarpäyanqatsu.
13 Paykunaqa manami Jesucristupa apostolnintsu kayan, sinöqa apóstol tukurmi runakunata engañayan. 14 Tsaynö puriyanqan manami mantsaypätsu. Kikin Satanáspis alli ángel tukurmi purin. 15 Alli ángel tukur Satanás purinqannömi paykunapis Satanáspa sirviqninkuna kar Diospa sirviqnin tukullar puriyan. Tsaynö kayanqanpitami Tayta Dios juzgar castiganqa.
Pablo ñakanqankuna
16 Yapaymi nï: Löcu kanqäta ama pipis yarpätsuntsu. Tsaynö kaptinpis löcunö ichiklla alabakunqäta kanan mä wiyayämay. 17 Señor Jesucristo tsaynö mana alabakuptinpis tantiyakuyänaykipämi löcunö alabakushä. 18 Llutan yachatsikuqkuna alabakuykäyaptinqa ¿imanirtä noqapis alabakümantsu?
19 Qamkuna alli yachaq kayanqaykita nikarqa ¿imanirtä llutan yachatsikuqkuna alabakur niyäshunqaykita cäsuyanki? 20 Qamkunaqa upällallami kakuyanki munayanqanta ruratsiyäshuptikipis, qellaynikikunata ushayaptinpis, engañayäshuptikipis, manakaqman churayäshuptikipis y laqyayäshuptikipis. 21 Tsaynöpis nikäyan paykunanö mana kar munayniynaqlla kanqätami. ¡Achyä, paykunanö mana karqa penqaküchi!
Paykuna alabakuyanqannöllami noqapis alabaküman. Paykunanö alabakurqa löcunömi parläman. 22 Paykuna hebreo casta kayanqannöllami noqapis hebreo casta kä. Paykuna Israel runa kayanqannöllami noqapis Israel runa kä. Paykuna Abrahampa castan kayanqannöllami noqapis Abrahampa castan kä. 23 Paykuna Jesucristupa sirviqnin kayanqanta niyaptinpis noqaqa masrämi Jesucristuta sirvï. (Kaynö parlarmi löcunö parlaykä.) Maytsaychömi paykunapita mas willakushqä. Willakunqäpitami carcelcho atska kuti wichqarashqä.† Autoridäkunapis kutin kutinmi castigayämashqa. Atska kutimi conträkunapis wanutsimayta munayashqa.
24 Israel runakunapa autoridäninkunami pitsqa kuti kimsa chunka isqun (39) kuti castigayämashqa.† 25 Kimsa kutimi Roma soldädukuna pasaypa wiruyämashqa.† Juk kutimi runakuna saqmar ichikllapa wanutsiyämashqa.† Kimsa viäjimi aywaykäyanqä büquipis jundikarqan. Juk paqas juk junaqmi qerullä makallakushqa lamarcho aynarqä. 26 Diospa willakuyninta willakurmi maytsaypapis purishqä. Atska kutimi mayupis ichikpa apamashqa. Suwakunapa makinpitapis qeshpishqämi. Israel runakunapis† y mana Israel runakunapis wanutsiytami munayämashqa.† Markachöpis, tsunyaqchöpis y lamarchöpis ichikllapami wanushqä. Jesucristuman janan shonqulla yärakuqkunapis wanutsiytami munayämashqa.
27 Mayman charpis aja aruykunachömi arushqä. Atska kutimi yarpachakur punuytapis tarishqätsu. Mallaqar yakunarmi purishqä. Latsapä llapshalla kaptinmi alatsikushqä. 28 Tsay jananmanpis qoyay qoyaymi maytsaycho kaykaq wawqikunapä panikunapä yarpachakü. 29 Juk wawqi o juk pani ñakaptinqa pasaypami llakikü. Pitapis jutsata ruratsiptinqa ruratsiq runapä pasaypami ajanä.
30 Alabakunäta munayaptikiqa munayniynaq kanqäpitami alabakushä. 31 Señor Jesucristupa Taytan Diosmi musyan rasun kaqta parlanqäta. Pay imaypis alabashqa kaykullätsun. 32 Damascuchömi rey Aretaspa gobernadornin soldädukunata churarqan marka punkupa yarquptï prësu tsariyämänanpä. 33 Tsaymi wawqikuna canastaman wiñarkamar marka murälla jananpa urätsiyämarqan. Tsaynöpami qeshpinäpä Tayta Dios yanapamarqan.†