2 Tsaynöllashi wakinniki nikäyanki Diosta mana cäsukuq runanölla kanqäta. Tsaymi conträ mana parlayänaykipä rugä. Tsaynölla conträ parlayaptikiqa shamurmi ollqutupäyäshayki.

3 Runalla karpis manami runakunanötsu guërrata rurayä.^b 4 Noqakunapa armäkunaqa manami runakuna manijayanqan armakunatsu, sinöqa Tayta Dios kamaripäyämanqan armakunami.^c Tsay armakunawanmi contrankunata ushakätsiq soldädunö kaykä. 5 Tsaynöpami runakuna yachaq tukur Tayta Diospa willakuyninta mana cäsukuyänaykipä ima tsapata churapäyäshuptikipis tantiyatsiyä Jesucristuta cäsukuyänaykipä y yarpäyanqaykikunapis pay munanqannö kananpä. 6 Tsaymi favornï kayaptiki noqa shamur qamkunacho kaykaq conträ parlaqkunata ollqutupäshä.

7 Imanö kayanqaykitapis shumaq tantiyakuyay. Mayqaykipis Jesucristupa willakuqnin rasunpaypa kayanqaykita yarparqa tantiyakuyankimanmi noqakunapis paypa willakuqnin kayanqäta. 8 Willakuqnin kanäpä Tayta Dios churamaptinmi^† qamkunata corriginäpä munayyuq kaykä. Corrigirpis manami manakaqman churanäpätsu corrigï, sinöqa qamkunata shakyätsir alli yachatsiyänäpämi. Munayyuq kanqäpita alläpa alabakunqäta wakinkuna niyaptinpis manami penqakushätsu.

9 Tsaymi yarpäyankimantsu mantsakätsiyta munar cartakamunqäta. 10 Wakinkunashi conträ shärir niyan: “Pabluqa cartallachömi mantsariypä ollqutupämantsik. Kikin kaycho karqa manami shumaq parlaytapis kamäpakuntsu”.

11 Tsaynö niqkuna shumaq tantiyakuyätsun: Cartäkunacho ninqänöllami qamkuna kaqman chaykamurpis ollqutupäyäshayki.

12 Tsay alli tukur alabakuqkunanöqa kayämanräku. Paykunaqa kikinkunapa favornin parlarmi upanö kaykäyan. 13 Tsaynöllami alabakuyan Tayta Dios mana kachanqan kaqman chaykur willakuyanqanpita. Noqakunaqa manami paykunanötsu kayä, sinöqa Tayta Dios kachayämanqan kaqllachömi willakuyä. Tsaykunallacho willakurmi qamkuna kaqmanpis chaykamur willakuyashqä.^†

14 Musyayanqaykinöpis wakinkunapita mas puntatami qamkunata Jesucristupa willakuyninta willayashqä. Qamkunaman puntata mana chämushqa karqa qamkunata corrigiyänäpä manami munayyuqtsu kayäman. 15 Juk runa willakunqancho willakuyanqäpita alabakuyänäpa trokinqa juk markaman aywar wakin mana Israel runakunatami willayta munaykäyä. Tsaynö munarpis Tayta Diosman shumaq yärakuyänaykipä tantiyatsinqäta chaskikuyaptikirämi juklächöpis willakuyäshä.

16 Tsaymi juk markakunamanpis aywar pipis manarä willakuyanqancho willakuyäshä. Tsaynöpami juk willakunqankunamanqa jatikarnin alabakur niyäshätsu: “Noqakunami paykunata alli willakuyta willayashqä” nir.

17 Tayta Diospa palabranchömi nin: “Pipis alabakunanpa trokinqa Tayta Diosta alabatsun”.^†

18 Alabakuqkunataqa manami pipis alli rikantsu, tsaypa trokinqa Tayta Dios alli rikanqan kaqtami alli rikayan.