Revelacionkunata Pablo rikanqan
12
Alabakunqäwan imata mana jipirpis kanan willayäshayki Señor Jesucristo revelacionkunata rikatsimanqanta. 2 Chunka chusku watanami päsashqa Jesucristuman yärakuq reqinqä runataa kimsa kaq ciëlumanb Tayta Dios apanqan. Itsanqa manami musyätsu cuerpuntin aywanqanta o almallan aywanqanta. Tsaytaqa Tayta Diosllami musyan. 3 Cuerpuntin aywanqanta o almallan aywanqanta Tayta Dioslla musyaptinpis 4 paraísuman† apanqantami musyä. Tsaychömi pipis mana wiyanqankunata wiyarqan. Tsay wiyanqankunataqa imanö tantiyatsiytapis manami kamäpakuntsu.5 Tsay runa ciëluman chanqanpitami alabäman. Kikïmi itsanqa alabakushätsu, sinöqa munayniynaq kanqätami willayäshayki. 6 Alabakuyta munarqa rasun kaqtami alabaküman. Tsaynö kaptinpis santuna kanqäta runakuna yarpäyänanta mana munarmi alabakütsu. Manami alabakunqäta wiyartsu pipis alli runa kanqäta yarpanman, sinöqa imanö kawanqätapis rikar y imata parlanqätapis wiyarmi.
7 Ciëlucho rikanqäkunapita mana alabakunäpämi pasaypa ñakanäpä Tayta Dios kamakätsishqa. Tsay ñakayqa cuerpücho kasha jatiraykaqnömi. Kikin Satanás kachamunqan ñakaynörämi pasaypa ñakatsiman. 8 Tsay ñakaypita jipimänanpämi Señornintsikta kimsa kuti mañakurqä. 9 Mañakuptïmi nimarqan: “Kuyanqalläwan contentakuy. Tsaynö ñakar kallpaynaq kaptikirämi munaynïwan yanapashayki”.
Tsaynö nimaptinmi tsay ñakaywan ñakar kallpaynaq karpis kushikü. Kallpaynaq kaptïrämi Jesucristo yanapaykäman. 10 Tsaymi Jesucristuta sirvir llakikütsu qeshyarpis, ashlliyämaptinpis, pishïpakurpis, chikiyämaptinpis y imanö ñakarpis. Kallpaynaq karpis kallpayuqmi rikakü.c
Corintucho kaykaq wawqikunapä panikunapä Pablo llakikunqan
11 Löcunö alabakur parlanäpäqa kikikikunami ashipäyämashqayki. Alabakunäpa trokinqa qamkunami alabayämankiman karqan. Kikilläpita imatapis rurayta mana kamäpakurpis tsay apóstol tukuqkunapitaqa mas allirämi kä. 12 Apóstol kanqäta tantiyakuyänaykipämi qamkuna kaqcho ñakarpis almiraypä milagrukunata y señalkunatapis rurarqä. 13 Itsanqa wakin markakunacho gastükunapä wawqikunata panikunata mañakunqänöqa qamkunata manami mañakushqätsu. ¿Imanirtä tsaypita qallayashqa kayanki? ¿Mana mañakunqätsurä jutsä kashqa?
14 Kamarikushqanami kaykä qamkuna kaqman yapay shamunäpä. Kananwanqa kimsa kutinami shamushä. Manami kikïpä imatapis ashirtsu qamkunaman shamushä, sinöqa qamkunata kuyapar yanapanäpämi. Musyanqantsiknöpis manami pï taytapis wamrankunata mañakuntsu, sinöqa yanapanmi. 15 Tsaynöllami noqapis qamkunata mañakunäpa trokinqa imäkunatapis ushashä y qamkuna raykuq wanunäpäpis listu kaykä. Llapan shonqüwan qamkunata kuyapar yanapaykaptï ¿imanirtä noqapita qallayashqa kaykäyanki?
16 Musyayanqaykinöpis yanapayämänaykipä manami mayqaykitapis mañakushqätsu. Tsaynö kaptinpis wakinnikishi nikäyanki muchuqkunapä niq tumpalla kikïkunapä qellayta qoritsiyanqäta. 17 ¿Imanirtä tsaynö yarpäyanki? Tantiyakuyay. ¿Imayllaqa qamkunaman kachamunqä wawqikuna mayqallanpis engañayäshurqaykiku? 18 Juk wawqitawan Tituta qamkuna kaqman kachamuptï† manami imatapis engañayäshushqaykitsu. Tito mana engañakuq kanqannömi noqapis engañakütsu. Paywanqa tsay yarpayllami kayä.
19 Kay cartata apatsiyämunqäta liyir capaz yarpäyanki favornïkunallapä qellqayämunqäta. Kuyay wawqikuna panikuna, manami favornïkunallapätsu qellqaykämü, sinöqa tantiyakur Tayta Dios munanqannö kawayänaykipämi. Jesucristuta sirviq karmi Tayta Diospa ñöpancho qamkunata yätsiykä. 20 Qamkuna kaqman shamur llutanta ruraykäyaqta tarinäpä kaqtami llakikü. Tsaynöpis llakikü tsaynö kaykaqta tarir ollqutupänäpä kanqantami. Capazchi qamkunata tarïman rimanakuykaqta, chikinakuykaqta, ajätsinakuykaqta, jukpa wasanta rimaykaqta, manakaqman churanakuykaqta, runa tukuykaqta y mana allikunata ruraykaqta. 21 Capazchi melanaypä kaqkunata, fornicación jutsata y jukwan jukwan puriyanqaykita kachariyashqaykitsu. Jutsata ruraykaqta tarir qamkunapita Tayta Diospa ñöpancho penqakunäpä kanqanpitami llakikü.