Tayta Dios munanqannö kawayänanpä Pablo yätsinqan
13
Kananwanqa kimsa kutinami qamkunaman watukaq shamushä. Tayta Diospa palabrancho ninqanta yarpäyay: “Ishkay o kimsa testïgukuna shimpiyaptinrämi pipis jutsayuq kanqan musyakanqa”.†2 Qamkuna kaqman shamur jutsa ruraqkuna jutsankunata kachariyänanpä unaynami nirqä. Kananpis ñöpaykikunacho kaykaqnömi llapaykita yapay nï: Kanan kutimur tsaynölla jutsa ruraykaqta tarirqa manami kuyapäyäshaykitsu. 3 Tsayrämi musyayanki qamkunata ninqäkuna Jesucristo munanqannö kanqanta.
Jesucristupis manami mayqaykitapis jutsaykikunapita tsapäyäshunkitsu, sinöqa jutsa rurayta mana kachariyanqaykipitami munayninwan corrigiyäshunki. 4 Munayniynaq runanö cruzcho wanuptinpis Tayta Diosmi munayninwan kawatsimushqa. Tsaynöllami noqakunapis Jesucristuman yärakur kikilläkunapitaqa munayniynaq karpis Tayta Diospa munayninwan qamkunata corrigiyäshayki.
5 Jesucristuman rasunpaypa yärakuyanqaykita o mana yärakuyanqaykitapis kikikikuna tantiyakuyay. ¿Manaku tantiyayanki Jesucristo qamkunawan kaykanqanta? Payman mana yärakuyaptikiqa manami qamkunawantsu kaykan. 6 Rasunpaypa payman yärakurqa Jesucristo kachamanqanta tantiyayankimanmi.
7 Tayta Diostami mañakuyä ninqäkunata chaskir jutsaykikunata kachariyänaykipä. Manami munayyuq kayanqäta tantiyayänaykipätsu mañakuyä, sinöqa munayniynaq kayanqäta yarparpis Tayta Dios munanqannö kawayänaykipämi. 8 Tsaynö niyä Tayta Diospa alli willakuyninpä ima tsapapis mana kananpämi. Paypa willakuynintaqa pïmaypis chaskiyänantami munayä.
9 Tsaymi Tayta Diosta mañakuyä llapanchöpis pay munanqannö kawayänaykipä. Pay munanqannö kawayaptikiqa munayniynaq kayanqäta runakuna yarpäyaptinpis kushikuyämi. 10 Kay qellqamunqäkunata cäsukuyaptiki qamkuna kaqman chämur imatapis mananami niyäshaykinatsu. Manami llakikatsinäpätsu apóstol kanäpä Tayta Dios churamashqa, sinöqa shakyätsir yanapanäpämi.
Carta ushanan
11 Wawqikuna panikuna, imaypis kushikuyay. Tayta Dios munanqannö kawayänaykipä jukniki juknikipis shakyätsinakuyay. Mana chikinakuypa juk shonqulla kawayay. Tsaynö kawayaptikimi kuyapäkuq y alli kawayta qaramaqnintsik Tayta Dios imaypis yanapayäshunki. 12 Jukniki juknikipis qaqllaykikunacho mutsanakur winchinakur kayay. 13 Kaycho kaykaq llapan wawqikuna panikunami winchikayämushunki.
14 Señor Jesucristo, Tayta Dios y Espíritu Santu imaypis kuyapaykuyälläshuy. [Amén.]