Salmo 132 (131)
Davidta awninqanta cumplinanpä Tayta Diosta mañakunqan
Kay salmuqa Jerusalénman aywaqkuna cantayänanpämi.
1 Tayta Dios, David imanö ñakanqantapis yarpaykullay.
2 Jacob yärakunqan Tayta Dios, David awnishunqaykita yarpaykullay.
3 Awnirmi nishurqayki:
“Wayïchöpis manami täshätsu,
punuytapis manami tarishätsu,
4 manami yanqallatapis punushätsu,
manami ichikllatapis qemtsishätsu
5 munayyuq Tayta Diospä sitiuta manarä tarirqa
y pay täkunanpä wayita manarä rurarqa”.
6 Efratacho kaykarmi wiyayarqä Pactu Babulpita parlaqta.
Jaar pampachömi tariyarqä.
7 Tsaymi willanakur niyarqä:
“¡Tayta Diospa wayinman aywashun!
¡Ñöpanman qonqurikushun!”
8 Tayta Dios, täkunaykipä kaqman shamuykullay.
Munayyuq babulniki kanqancho taykullay.
9 Sirvishuqniki sacerdötikunapis llapan voluntäninwan sirviykuyälläshuy.
Munanqaykinö kawaqkunapis kushishqa alabaykuyälläshuy.
10 Sirvishuqniki David raykuq akranqayki reyta yanapaykullay.†
11 Davidta awninqaykitami imaypis cumplinki.
Awnirmi nirqayki:
“Qampita aywaraqkunallami imaypis trönuykicho rey kayanqa.†
12 Tsaynö kayanqa willakuynïta y pactu ruranqäta cumpliyaptinmi.
Tsaynöpami qampita aywaraqkuna trönuykicho imaypis rey kayanqa”.
13 Tayta Diosmi Sión jirkanta akrashqa.
Tsaycho tänanpämi akrashqa.
14 Tsaymi nirqan:
“Kaychömi imaypis täkushä.
Kaycho trönü kananpämi akrashqä.
15 Kaycho mikuy atska kananpämi bendicionnïta churashä.
Muchuqkunapis pacha juntami mikuyanqa.
16 Sacerdötikunapis respitashqami kayanqa.
Wiyamaqkunaqa kushishqami alabayämanqa.
17 Kaychömi Davidpita aywaraqkunata rey kayänanpä churashä.
Akranqä kayaptinmi munayyuq kayänanpä yanapashä.
18 Chikiqninkunataqa penqakuymanmi churashä.
Reyqa chipipiykaq corönan jatishqami kanqa”.