M
maná Manáqa karqan culantrupa murunnö y jachapa weqin niraq qarwashmi. Tsay mikuytami tsunyaq tsaki jirkacho Israel runakunata Tayta Dios kamariparqan. Tsaytami ankaypapis machkaypapis y tantata ruraykurpis mikuyarqan. Israel runakunaqa chusku chunka (40) watami tsay mikuyta mikuyarqan (Éxo. 16; Núm. 11.4-9; Juan 6.31).
mana ushakaq kaway Mana ushakaq kawayqa Tayta Diospa ñöpancho imayyaqpis kawanantsikpämi kaykan. Tsay kawayta tarirqa Tayta Diostami reqintsik (Juan 17.3). Mana ushakaq kawayqa kay patsachömi qallaykun (Juan 5.24). Tsay kawayta tarintsik Jesucristuman yärakurmi (Juan 3.16, 36; 6.40, 47; 14.6; 20.31).
mandakuynin, Tayta Diospa mandakuynin Tayta Diospa mandakuynin ninqanqa Tayta Dios shamur mana alli runakunata ushakätsinanpä y alli kawayta apamunanpä kanqantami nikan (Isa. 13.9-10; 65.17-25; Joel 1.14-16; Zac. 14.9). Tayta Diospa mandakuynintami Israel runakuna atska wata shuyäyarqan (Mar. 15.43).
Jesucristo shamurnami Tayta Diospa mandakuynin chämunqantana willakurqan (Mat. 4.17; Luc. 7.22; 10.23-24; 17.20-21). Tsaynöpis willakurqan Tayta Diospa mandakuynin nirkurrä kananpä kanqantami (Mar. 9.47; 14.25; Luc. 13.28). Tsaymi tantiyantsik Jesucristuta chaskikur Tayta Diospa mandakuynincho kawaykanqantsik qallaykunallanrä kanqanta.
mantsapakuy, Diospita mantsapakuy Tayta Diospita mantsapakurqa tantiyantsik kuyakuq y perdonakuq karpis jutsa rurayta mana kachariqkunata castiganqanta (Éxo. 34.6; Heb. 10.31). Tayta Dios munayyuq kanqanta rikar Israel runakunapis paypita mantsapakuyarqanmi (Éxo. 14.31; Jos. 4.24; 1Sam. 12.18). Tsaymi Tayta Diospita mantsapakur payta adorar cäsukuntsik (Deut. 5.29; 10.12-13; Jos. 24.14) y runa mayintsikwan alli kawantsik (Lev. 25.17, 36, 43). Tayta Diosqa paypita mantsapakuqkunapa amïgunmi (Sal. 25.14).
Tayta Diospita mantsapakunantsikpä yachakuntsikmi (Deut. 4.10; 14.23; 17.19; Sal. 34.11). Tayta Diospita mantsapakuq runaqa yachaq y tantiyakuqmi kaykan (Job 28.28; Sal. 111.10; Prov. 1.7).
Mushuq Testamentuchöpis Tayta Diospita mantsapakunantsikpä kanqanpitami parlan. Tsaychömi nikan paypita mantsapakuqkunata Tayta Dios kuyapanqanta (Luc. 1.50; Hech. 10.35) y Tayta Diospita mantsapakur pay munanqannö kawanqantsikta (2Cor. 7.1; 1Ped. 1.17; 2.17). Tsaynöpis nikan Tayta Diospita mantsapakuqkuna premiuta chaskiyänanpä kanqanta (Apoc. 11.18).
Itsanqa Jesucristuman yärakur jutsata ruranqantsikpita perdonashqami kantsik (Rom. 3.23-25; 1Juan 1.9.) Tsaymi musyantsik Tayta Dios manana castigamänantsikpä kanqanta (1Juan 4.18) y payta mana mantsariypa mañakunantsikpä kanqanta (Rom. 8.15; Efe. 3.12).
marfil Marfilqa elefantipa curmïllunmi kaykan (1Rey. 10.18; 22.39; Sal. 45.8; Cant. 5.14; 7.4; Amós 3.15; 6.4; Apoc. 18.12).
mayor wawqi Mayor wawqikunaqa iglesiacho yachatsiqkunami kaykäyan (1Tim. 3.2). Bernabéwan apóstol Pablumi mushuq iglesiakunacho mayor wawqikunata churayarqan (Hech. 14.23). Apóstol Pedrumi willamantsik wawqikunata panikunata imanö rikayänanpä kanqantapis (1Ped. 5.1-4). Wawqikunata panikunata imanö rikayanqanpitami mayor wawqikuna Tayta Diosta cuentata qoyanqa (Heb. 13.17). Mayor wawqikuna imanö kawayänanpä kanqantapis Bibliachömi willamantsik (1Tim. 3.2-7; Tito 1.5-9). Mayor wawqi kananpä pitapis manarä churar imanö kawanqantapis shumaq musyashun (1Tim. 5.22).
Moisés qellqanqan leykuna Moisés qellqanqan leykunaqa kaykan Sinaí jirkacho Tayta Dios entreganqan mandamientukuna y tantiyatsinqan leykunami. Tsay leykunatami Moisés qellqarqan Éxodo, Levítico, Números y Deuteronomio librukunacho.