Tito
Tituman apóstol Pablo cartakunqan
Apóstol Pablo winchikunqan
1
Noqa Pablumi, Tayta Diospa sirviqnin y Jesucristupa apostolnin kar, Tayta Dios akranqan kaqkunata willakuyninta yachaykätsï Jesucristuman yärakur pay munanqannö kawayänanpä. 2 Tayta Dios kay patsata manarä kamar awninqannöllami pay akranqan kaqkuna gloriacho imayyaqpis kawayanqa. Tayta Diosqa manami llullakuntsu, tsaypa trokinqa awninqanta imaypis cumplinmi. 3 Tiempu chämuptinnami willakuyninta willakuyaptin salvamaqnintsik Tayta Dios awninqanta cumplin. Tsaynö cumplirmi noqatapis willakunäpä churamashqa.4 Tito,† noqa yärakunqänö Jesucristuman yärakurmi kuyay tsurïnö kaykanki. Yayantsik Tayta Dios y salvamaqnintsik Jesucristo kuyapäshurniki alli kawanaykipä yanapaykulläshuy.
Jesucristupa willakuqninkuna imanö kawayänanpä ninqan
5 Creta islapita shakamurmi qamta nirqä problëmakunata arreglanaykipä y markan markan aywar wawqikuna panikuna qorikäyanqancho mayor wawqikunata churanaykipä. 6 Mayor wawqi kananpäqa pïmaypitapis respitashqa y juk warmiyuqllami kayänan. Tayta Diosman yärakurmi tsurinkunapis allillata rurar taytantawan mamanta cäsukuyänan. 7 Tayta Diosta sirviq kaykarqa y wawqikunata panikunata rikaq kaykarqa mayor wawqikuna kayätsun pïmaypitapis mana jamurashqa, mana runa tukuq, imallapitapis mana ajanaq, mana upyaq, mana pelyaq y imatapis mana chaskipakuq. 8 Tsaypa trokinqa kayätsun patsatsikuq, allillata ruraq, alli yarpayyuq, Tayta Dios munanqannö kawaq y llutankunata mana ruraq. 9 Jesucristupa willakuyninta yachakuyanqannölla alli yachatsiq kayätsun. Tsaynöpami Tayta Dios munanqannö kawayänanpä wawqikunata panikunata shakyätsiyanqa y llutan yachatsikuqkunatapis llutankunata mana yachatsiyänanpä shumaq tantiyatsiyanqa.†
Llutan yachatsikuqkunata mana chaskipäyänanpä ninqan
10 Atskaqmi llutan yachatsikuqkuna wawqikunata panikunata engañar puriykäyan. Paykunaqa mana tantiyakurmi Israel runakunanö cuerpunta señalakuyänanpä yachaykätsiyan. 11 Wakin wawqikunata panikunata llapan castankunatawanmi engañayashqa. Paykunaqa imatapis sakyayänan raykuqmi llutankunata yachaykätsiyan. Tsaynö llutanta yachatsiyänanta ama munayaytsu.
12 Juk Creta runami marka mayinkunapä qellqar nirqan: “Creta runakunaqa llulla, yaqa uywanö, mallaqashqa y qelami kayan”. 13 Rasun kaqtami tsay runa qellqarqan. Tsaymi yachatsikuqkunata shumaq tantiyatsinki Tayta Dios munanqannö kawayänanpä.
14 Tsaynölla tantiyatsinki Israel runakuna llutan yachatsiyanqankunata mana chaskipäyänanpä. Llutan yachatsikuqkunaqa Tayta Diospa palabranta mana cäsukurmi yarpayllankunapita yachaykätsiyan. 15 Llutan yarpaq y mana cäsukuq karmi imapis mana alli kanqanta yarpäyan. Jesucristupa willakuyninman yärakuqkunami itsanqa Tayta Dios kamanqankuna llapanpis alli kanqanta tantiyakuyan.
16 Tsay llutan yachatsikuqkunami niyan: “Noqakunaqa Tayta Dios munanqannömi kawayä”. Tsaynö niyaptinpis llutankunata rurar kawayanqanta rikarmi runakuna tantiyayan Tayta Diosta mana cäsukuyanqanta. Paykunaqa Tayta Diosta mana cäsukurmi runa mayinta chikirnin imatapis allitaqa rurayantsu.