3 Chakwankunatapis yachatsinki Tayta Dios munanqannö shumaq kawayänanpä, pitapis mana tumpayänanpä y upyallaman mana churakashqa kayänanpä. Tsaypa trokinqa wakintapis alli kawayänanpä yachatsiyätsun. 4 Tsaynöpis jipash kaq warmikunata yachatsiyätsun runanta y wamrankunata kuyayänanpä. 5 Tsaynöpis yachatsiyätsun shumaq yarpachakuskir imatapis rurayänanpä, runankunata jukwan mana qanratayänanpä, wayincho rurayninkunata shumaq rurayänanpä, kuyapäkuq kayänanpä y runanta cäsukuyänanpäpis. Tsaynö alli kawaqta rikarmi Tayta Diospa palabranta pipis mankaqman churanqatsu.

6 Tsaynölla chölukunatapis tantiyatsinki shumaq yarpachakuskir allillata rurayänanpä. 7 Rikayäshunaykipä kikikipis alli kaway. Pitapis yachatsirqa Tayta Diospa willakuynin ninqallanta yachatsiyanki. 8 Pipis mana rimashunaykipä rasun kaqllata yachatsinki. Tsaynö alli yachatsiptikiqa contrantsik kaqkuna penqakur manami wasantsikta rimayanqatsu.

9 Wätaykunatapis yachatsinki patronninta cäsukuyänanpä y mandanqantapis kushishqa rurayänanpä. Tsaynöpis yachatsinki shimisapa mana kayänanpä 10 y patronninpa imantapis mana suwapuyänanpä. Tsaypa trokinqa patronnin yärakunanpä allillata rurayätsun. Jesucristuman criyikuq wataykuna alli kawaqta rikarmi runakuna tantiyayanqa salvamaqnintsik Tayta Diospa willakuynin alli kanqanta.

11 Llapan runakunata salvananpämi Tayta Dios kuyamarnintsik Jesucristuta kachamurqan. 12 Paymi yachatsimantsik kikintsik munanqantsiknö kawanantsikpa trokin jutsa ruraykunata kacharir pay munanqannö allita rurar kawanantsikpä. 13 Tsaynö kawarmi salvamaqnintsik Jesucristo kutimunqanyaq kamarikushqa shuyaraykäshun. Paymi llapanpä munayyuq Diosnintsik kar llapan runakuna rikaykäyaptin chipipirrä kutimunqa.^† 14 Jutsa ruraypita jipimänantsikpämi wanurqan.^† Perdonamarnintsikmi qorikamashqantsik kuyanqan runakuna kanantsikpä y llapan shonquntsikwan imatapis allillata ruranantsikpä.^†

15 Wawqi Tito, kay yachatsinqäkunata pitapis mana mantsariypa yachatsinki, shakyätsinki y tantiyatsinki. Manakaqman pipis mana churashunaykipä shumaq kawanki.