Imaypis allita rurayänanpä ninqan
3
Wawqikunata panikunata yachatsinki mandaqkunata y autoridäkunata respitar cäsukuyänanpä y allita imaypis rurayänanpä. 2 Tsaynöpis yachatsinki wasarima mana kayänanpä, pitapis mana wajupäyänanpä, alli shonquyuq kayänanpä y pïmaywanpis alli rikanakur kawayänanpä.3 Jesucristuman manarä criyirqa noqantsikpis wakin runakunanöllami mana tantiyakurnin Tayta Diosta cäsukurqantsiktsu. Jutsa ruraykunatapis manami kachariyta kamäpakurqantsiktsu. Chikinakur rimanakurmi kawarqantsik. 4 Tsaynö kawaykashqami Tayta Dios kuyakuq kar 5 salvamashqantsik. Manami allita ruranqantsikpitatsu salvamashqantsik, tsaypa trokinqa kuyapämarnintsikmi.† Jutsantsikpita mayllamarnintsikmi Espíritu Santuta kachamur mushuq kawayta qaramashqantsik. 6 Espíritu Santuta tsaynö kachamushqa salvamaqnintsik Jesucristo noqantsik raykuq wanushqa kaptinmi. 7 Jutsayuq kashqapis debaldillami perdonamashqantsik herenciantsikta chaskir paypa ñöpancho imayyaqpis kawanantsikpä.
8 Kay ninqäkuna llapanpis rasun kaqlla kaptinmi wawqikunata panikunata mana qelanaypa yachatsinki. Tsaynö yachatsiptikimi Tayta Dios munanqannö imaypis allikunata rurayänanpä tantiyakuyanqa. Tsay yachatsinqäkunaqa llapan runakunapäpis allimi kaykan.
9 Wakin runakunaqa unay castankuna pï kanqanpita y Israel runakunapa costumbrinkunapitami rimanakuyan. Tsaykunapita piwanpis ama rimanakuyaytsu. Tsaynö rimanakuyanqaykiqa manakaqllapämi kanqa.
10 Tsay rimanakuqkunataqa ishkay kutilla tantiyatsinki. Tsaynö tantiyatsiptikipis mana cäsuyäshuptikiqa qarqurinki.† 11 Musyanqaykinöpis tsay runakunaqa jutsa rurayllacho kawarmi Tayta Diosta cäsukuyantsu. Tsaynö kayanqanpitami Tayta Dios castiganqa.
Carta ushanan
12 Noqa yarpaykä wawqintsik Artemasta karpis o Tíquicuta† karpis qam kaqman kachamuytami. Mayqanpis chämuptinqa Nicópolisman juklla shamunki tsaycho tinkunantsikpä. Tamya killa päsanqanyaq tsaycho täkuytami yarpaykä. 13 Abogädu Zenaswan Apolos† viäjipa yarquyänanpä kamarikuyaptin ima ministiyanqantapis llapaykikuna kamaripäyanki. 14 Tsaynö yanaparmi wawqikuna panikuna yachakuyanqa wakin kaqtapis yanapayänanpä. Tsaynö rurarqa Tayta Dios munanqannömi kawayanqa.
15 Kaycho kaykaq wawqikuna panikunami winchikayämushunki. Tsaynölla noqapa winchikuynïtapis wawqikunata panikunata qoykuyällanki. Llapaykipis alli kawayänaykipä Tayta Dios kuyapäyäshurniki yanapaykuyälläshuy. [Amén.]