Mayor wawqikuna imanö kayänanpä ninqan
3
Mayor wawqi kayta munaqkunaqa allitami yarpaykäyan. Kay ninqäqa rasun kaqmi. 2 Mayor wawqikunami kayanman pipitapis mana jamurashqa, juk warmiyuqlla, shumaq tantiyakuq, shumaq yarpachakuskir imatapis ruraq, pïmaypitapis respitashqa, patsatsikuq y shumaq yachatsikuq. 3 Tsaynöpis kayanman mana upyaq, pitapis mana wajupaq, kuyapäkuq, qellayllapä mana ayrajashqa 4 y warmintawan tsurinkunatapis shumaq wätaq. Tsaynöpis tsurinkunata yachatsiyanman cäsukuq y respitakuq kayänanpä. 5 Wayincho taqkunata shumaq mana yachatsirqa ¿imanörä Tayta Diosman yärakuqkunata yachatsinman?6 Jesucristuman tsayrä yärakuqkunaqa manami mayor wawqi kayanmantsu. Yachaq tukurqa diablu castigashqa kanqannömi paykunapis castigashqa kayanqa.
7 Jesucristuman mana criyikuq runakunapis rikayänanpä mayor wawqikuna alli kawayätsun. Alli kawayaptinqa paykunapa contran manami pipis parlanqatsu y diablupis trampaman manami ishkitsinqatsu.†
Diäcunukuna imanö kayänanpä kanqan
8 Tsaynöpis diäcunukuna kayanman respitashqa, imatapis awninqanta cumpliq, mana upyaq y qellayyuq kayta munar mana sakyapakuq. 9 Jesucristupa willakuyninta yachakuyanqannöllami jutsata mana rurar kawayänan. 10 Diäcunu kananpä manarä churar imanö kawayanqantapis shumaqrämi musyayänan. Alli kawayanqanta musyaykurrämi diäcunu kayänanpä churayänan.
11 Diäcunupa warminpisa kanman respitashqa, pitapis mana tumpaq, shumaq tantiyakuq y awninqanta imaypis cumpliq.
12 Diäcunukunaqa juk warmiyuqllami kayänan. Warminta y tsurinkunatami shumaqmi wätayänan.
13 Diäcunu kayninta shumaq cumplirqa pïmaypitapis alli rikashqami kayanqa. Mana mantsariypami Jesucristuman yärakuyanqanta willakuyanqa.
Pablo imapä cartakunqanpis
14 Timoteo, shamuyta yarparpis puntataqa cartakaykämüllarämi. 15 Juklla mana shamuptïpis kay cartata liyirnami wawqikunata panikunata imanö rikanaykipäpis tantiyanki. Noqantsikqa imayyaqpis kawaq Tayta Diospa iglesian karmi willakuyninta willakuntsik y mana alli yachatsikuqkunata corrigintsik.
16 Tayta Dios musyatsimanqantsik willakuyninqa shumaqmi. Tsay willakuyninmi nin:
Jesucristuqab runanöllami yurirqan.
Wanunqanpitami Espíritu Santu kawatsimurqan.
Angelkunami payta rikayarqan.
Mana Israel runakunatami willakuyninta willakuqkuna willayarqan.
Maytsaychöpis paymanmi criyikuyan.
Gloriaman kutiskirnami Tayta Diospa ñöpanchöna kaykan.