Llutan yachatsikuqkuna yuriyämunanpä ninqan
4
Espíritu Santumi tantiyatsimantsik shamuq watakunacho wakin runakuna Jesucristuman yärakuyanqanta kachariskir supaykuna munayanqannö llutanta yachatsiyänanpä kanqanta. 2 Yachaq tukuq karmi llutankunata llullakurnin yachatsirpis penqakuyanqatsu.3 Tsay llutan yachatsikuqkunami majatsakay mana alli kanqanta niyanqa. Tsaynöpis wakin mikuykunata mana mikunantsikpä kanqantami niyanqa. Mana alli kanqanta niyaptinpis Jesucristuman yärakuqkuna agradëcikur mikuyänanpämi Tayta Dios kamarqan. 4 Tayta Dios kamanqankunaqa llapanpis allimi.† Majayuq kaypis Tayta Diospitami kaykan. Tsaynö kaykaptinqa payta agradëcikurnin mikuytapis y majatsakaytapis manakaqman ama churashuntsu. 5 Tayta Diospa palabranta tantiyakur y payta mañakur agradëcikushqaqa mikuypis† y majayuq kaypis† allimi.
Jesucristupa alli sirviqnin kananpä yachatsinqan
6 Kay cartacho qellqanqäkunata wawqikunata panikunata shumaq yachatsirqa Jesucristupa alli sirviqninmi kanki. Tayta Diospa willakuyninta yachakurqa y pay munanqannö kawarqa alli alimentakushqanömi kanki.
7 Llutanta yachatsiyanqankunata ama chaskipaytsu. Pukllaqkuna fïsicata rurayanqannö qampis Tayta Dios munanqannö kawanaykipä yachakuy. 8 Física rurayqa kay patsacho kawanqantsikyaqllami alli kaykan. Tayta Dios munanqannö kawaymi itsanqa kay patsacho y gloriachöpis alli kawanantsikpä kaykan.
9 Kay ninqäqa rasun kaqmi. Llapan runakuna chaskikuyänanpäpis allimi. 10 Tsayta tantiyarmi imayyaqpis kawaq Tayta Diosman yärakur imanö ñakarpis willakuyninta willakuykantsik. Paymi Jesucristuman yärakuq kaqtaqa pïmaytapis salvan.
11 Kay cartacho qellqamunqäkunata cäsukuyänanpä yachatsiy. 12 “Chölullarä kaykar ¿imanöpatä Timoteo yachatsimäshun?” niyaptinpis ama cäsupaytsu. Tsaypa trokinqa wawqikuna panikuna rikayänanpä alli shimillaykipa pïmaytapis parlapay, jutsata mana rurarnin kaway, runa mayikita kuyapay, Tayta Diosman imaypis yärakuy y pay munanqannö kaway.
13 Chämunqäyaq Tayta Diospa palabranta wawqikunata panikunata liyipanki, yachatsinki y parlapanki.
14 Jesucristuta sirvinaykipä Espíritu Santu churaykäshuptikiqa llapan shonquykiwan imaypis sirviy. Tsaynö churashushqayki profëtakuna qampä willakuyaptin y mayor wawqikuna umaykiman makinta churaykur Tayta Diosta mañakuyaptinmi.
15 Kay yätsinqäkunata mana qonqaypa imaypis ruray. Alli kawanqaykita rikayäshurnikimi tantiyayanqa Tayta Dios munanqannö kawanqaykita. 16 Paqtä jutsa rurayman ishkinkiman. Tsaynöpis paqtä llutankunata yachatsinkiman. Rasun kaqllata yachatsir Tayta Dios munanqannö imaypis kaway. Tsaynö kawarmi kikikipis salvakunki y yachatsinqaykita wiyaqkunapis salvakuyanqa.