3 Castaynaq viüdakunata imallawanpis yanapayay. 4 Mayqan viüdapapis wamrankuna o willkankuna karqa paykuna yanapayätsun. Kuyar wätanqanta ama qonqäyätsuntsu. Tsaynö yanapaptinmi Tayta Dios kushikun.

5 Castaynaq viüdakunaqa Tayta Diosman yärakurmi paqaspa junaqpapis mañakuyan. 6 Jutsa rurayman churakashqa viüdakunami itsanqa imayka wanushqanö kaykäyan.

7 Castankuna viüda kaptinqa yanapayänanpä wawqikunata panikunata yachatsiy. Yanapayaptinqa manami pipis jamuranqatsu. 8 Mamanta, awilanta y wayincho taqkunata imallatapis mana kamaripaptinqa Tayta Diosman yärakunqanpis manakaqllapämi kaykan. Tayta Diosta mana cäsukuq runapitapis peormi kaykan.

9 Viüdakunapa jutinkunata soqta chunka (60) watayuq kayaptinrä listaman churay. Tsaynöpis kayanman juk runallawan tashqa, 10 allita rurayanqanpita shumaq respitashqa, wamrankunata shumaq wätashqa, wayinman chaqkunata patsatsiq, Tayta Diosman yärakuqkunata alli shonqunwan yanapaq, muchuqkunata kuyapaq y allita ruraq.

11 Manarä soqta chunka (60) watayuq viüdakunataqa listaman manami churankimantsu. Paykunaqa mana runäkuypa Jesucristuta sirviyänanpä awnirkurpis runayuq kaytami yapay munayan. 12 Yapay runäkurmi Jesucristuta awniyanqantapis mana cumplir jutsayuq kaykäyan. 13 Qelayarmi wayin wayin puriyan. Tsaynöpis runapa wasanta rimar y imaykamanpis jatikarmi manakaqkunata parlar puriyan.

14 Tsaynö mana kayänanpä jipashllarä viüdakunaqa runawan yapay majatsakäyätsun, wamrankunata wätayätsun y wayincho rurayninkunata rurayätsun. Tsaynö kawayaptinqa contrantsik kaqkuna manami jamurämäshuntsu. 15 Wakin viüdakunaqa Jesucristuman yärakuykäyanqanta kacharirmi Satanás munanqannöna kawayan.

16 Mayqan [wawqipapis o] mayqan panipapis castancho viüda kaptinqa paykuna wätayätsun. Tsaynöpami wawqikuna panikuna qoriyanqan aypanqa castaynaq viüdakunata yanapayänanpä.

17 Mayor wawqikuna Diospa willakuyninta willakuyaptin y yachatsiyaptin shumaq respitar alli pägayätsun. Tsaynölla llapanpis mayor wawqikunata alli mandayaptin respitar pägayätsun. 18 Tayta Diospa palabranpis kaynömi nin: “Ëracho trïguta trillar töruta ama shenqawayankitsu”.^† Tsaynöpis kaynömi nin: “Arupakuq runata ama debaldillaqa arutsinkitsu”.^†

19 Mayor wawqi jutsata ruranqanta ishkaq o kimsaq nishuptikirä cäsunki. Juk runalla niptinqa ama cäsunkitsu.^† 20 Jutsa rurayninta mana kachariptinqa llapanpa ñöpancho payta rimanki. Tsaynö rimaptikimi wakinpis mantsapakur jutsata mana rurayänanpä tantiyakuyanqa. 21 Tayta Diospa, Señor Jesucristupa y payta sirviq angelkunapa ñöpanchömi qamta nï: Pipapis janan mana shäriypa kay ninqäkunata cumplinki.

22 Mayor wawqi kananpä pipa umanmanpis makikita ama llutallaqa churankitsu. Jutsa ruraqta churarqa qampis jutsayuqmi rikakunki. Kikikipis Tayta Dios munanqannö kaway.

23 Pacha nanaywan tsaynölla qeshyarqa yakullata upunaykipa trokin vïnuta ichik upurkunki.

24 Wakin runakuna jutsata rurayanqanqa manarä tapuptikimi jinan höra musyakan. Wakin runakuna jutsata rurayanqanmi itsanqa nirkurrä musyakan. 25 Tsaynöllami wakin runakuna allita rurayanqanpis jinan höra musyakan. Wakin kaqpami itsanqa nirkurrä musyakan.