Patronninta wataykuna respitayänanpä ninqan
6
Wataykuna patronninta shumaq respitayätsun. Tsaynöpami Tayta Diospä willakuyninpä ni pipis llutanta parlanqatsu. 2 Patronnin yärakuq mayin kaptinpis ama yarpäyätsuntsu mana respitayänanpä kanqanta, tsaypa trokinqa yärakuq mayin kaptin masrä respitayätsun. Wataykuna tsaynö kayänanpä shumaq yachatsiy.Imantsikpis kanqallanwan kushishqa kawanantsikpä ninqan
3 Pipis Señornintsik Jesucristupa alli willakuyninta yachatsinanpa trokin y Tayta Dios munanqannö kawanantsikpä yachatsinanpa trokin llutanta yachatsirqa 4 yachaq tukunmi. Tsay runakunaqa imatapis mana musyarmi llutan yachatsikuykunapita rimanakuyan. Tsaykunata chaskirmi runakuna chikinakur, rimanakur, qayapänakur y qallayätsinakur kawayan. 5 Llutan yachatsikuqkunaqa kikinpurami manakaqkunapita rimanakuyan. Llutan yarpaykunaman uman churakashqa karmi Jesucristupa willakuynin ima kanqantapis tantiyayantsu. Tsaynöpis Tayta Diosta sirvir rïcuyäyänanpä kanqantami yarpäyan. [Paykunawanqa ama takukäyaytsu.]
6 Imantsikpis kanqallanwan contentakur y Tayta Dios munanqannö kawarmi imaykayuq runapitapis mas alli kawantsik. 7 Jinayllami yurishqantsik. Wanukurpis jinayllami aywakushun.† 8 Tsaynö kaykaptinqa mikunantsikpä y jatikunantsikpä kanqallanwan kushishqa kawashun.
9 Imaykayuq kayta munaqkunaqa trampaman jeqaqnömi imayka llutan ruraykunaman jatikar yarquytapis kamäpakuyannatsu. Tsaynö karmi pasaypa ñakayan. 10 Qellaypä ayrajashqa kaqkunaqa imaykaläya jutsatami rurayan.† Wakin wawqikuna panikunapis imaykayuq kayllapä yarpachakurmi Jesucristuman yärakuyannatsu. Tsaymi imayka tuksikushqanörä pasaypa ñakaykäyan.
Tayta Dios munanqannö kawananpä yätsinqan
11 Timoteo, Tayta Diosta sirviq kaykarqa ama qellaypä ayrajashqa kaytsu. Tsaypa trokinqa Tayta Dios munanqannö imaypis kaway, payman yärakuy, runa mayikita kuyay, pacienciakuy y pitapis alli shimillaykipa parlapay.
12 Guërracho soldädukuna mana ajayaypa pelyayanqannö qampis mana ajayaypa Jesucristuman yärakuy. Mana ushakaq kawayta chaskinaykipä qayaykäshuptikiqa imaykanöpapis pay munanqannö kaway. Tsayta tantiyakurmi Jesucristuman yärakunqaykita wawqikunapa panikunapa ñöpancho willakushqayki.
13 Musyankimi Poncio Pilatupa ñöpancho Jesucristo mana mantsariypa willakunqanta.† Tsaymi Jesucristupa jutincho y llapantapis kamaq Tayta Diospa jutincho qamta nï: 14 Señornintsik Jesucristo kutimunqanyaq kay cartacho ninqäkunata llapantapis mana qonqaypa cumpliy. 15 Tiempu chämuptinnami Jesucristuta kay patsaman Tayta Dios kachamunqa. Tayta Diosqa llapan reykunapa y mandaqkunapa mandaqninmi. 16 Payllami imayyaqpis kawaq kaykan y pasaypa chipipiykaqchömi kaykanpis.† Paytaqa manami pipis rikashqatsu ni rikaytapis kamäpakuntsu. ¡Llapan runakuna imayyaqpis payta alabaykuyällätsun! ¡Paypa munaynincho llapan runakuna imayyaqpis kaykuyällätsun! Amén.
17 Imaykayuq wawqikunata panikunata niy mana runa tukuyänanpä y riquëzankunaman mana yärakuyänanpä. Riquëzakunaqa ushakaqllami. Riquëzankunaman yärakuyänanpa trokin [imayyaqpis kawaq] Tayta Diosllaman yärakuyätsun. Paymi kushishqa kawanantsikpä imaykatapis kamaripämantsik.
18 Tsaynöpis imaykayuqkunata yachatsiy allikunata imaypis rurayänanpä y wakin runakunata riquëzankunawan yanapayänanpä. 19 Tayta Diosman yärakur allikunata rurarqa mana ushakaq kawaytami tariyanqa. Tsaynöparämi rasunpaypa alli kawayta tariyanqa.
Cartapa ushanan
20 Timoteo, Tayta Dios willakuyninta willakunaykipä churaykäshuptikiqa llapan ninqäkunata shumaq cumpliy. Llutan yachatsikuqkunataqa ama cäsupaytsu. Tsay runakunaqa yachaq kayanqanta yarparmi llutan yachatsikuykunata yachaykätsiyan. 21 Wakinqa llutan yachatsikuqkunata cäsuparmi Tayta Diosman criyikuykäyanqanpita witikuyashqa.
Qamta y qamwan kaykaqkunata Tayta Dios imaypis yanapaykuyälläshuy. [Amén.]