Tayta Diosta mañakunantsikpä yätsinqan
2
Timoteo, wawqikunata panikunata parlapay Tayta Diosta agradëcikur llapan runakunapä imaypis mañakuyänanpä. 2 Tsaynöpis Tayta Diosta mañakuyätsun reykunapä y wakin autoridäkunapäpis. Alli mandayänanpä Tayta Dios yanapaptinmi noqantsikpis Tayta Dios munanqannö añaw kawashun. 3 Llapan runakunapä mañakurqa salvamaqnintsik Tayta Dios munanqannömi mañakuykantsik. 4 Payqa munan llapan runakuna alli willakuyninman criyir salvashqa kayänantami.5 Jukllayllami Tayta Diosqa.
Tayta Dioswan alli kawanantsikpä juk runallami amistatsimantsik.
Tsay runaqa Jesucristumi.
6 Paymi wanushqa llapan runakunata salvananpä.
Tsaynö salvakuq kanqantaqa tiempu chämuptinmi Tayta Dios musyatsimashqantsik.†
7 Tsay alli willakuyta mana Israel runakunata willar apostolnin kanäpämi Tayta Dios churamashqa. Tsaymi yachaykätsï Diospa alli willakuyninta chaskir Jesucristuman yärakuyänanpä.† Mana llullakuypami [Jesucristupa jutincho] rasun kaqta nï.
8 Noqa munä maycho qorikarpis mana rimanakuypa mana chikinakuypa wawqikuna makinkunata joqarkur Tayta Diosta mañakuyänantami.
Warmikunapä ninqan
9 Warmikunapis shumaq jatikuyätsun. Penqakuypä latsapakunataqa ama jatikuyätsuntsu. Ama yarpachakuyätsuntsu aqtsanta alläpa allitsakuyänanpä ni qoriwanpis ni perlaswanpis adornakuyänanpä. Alläpa chanin latsapakunatapis ama jatikuyätsuntsu.† 10 Tsaypa trokinqa Tayta Dios munanqannö kawaq warmikunanö allikunata rurar kawayätsun.
11 Qorikäyanqaykicho yachatsiyanqankunata warmikuna upällalla yachakuyätsun. 12 Noqa manami munätsu warmikuna ollqukunata yachatsiyänanta ni mandayänanta. Tsaypa trokinqa upällalla kakuyätsun. 13 Tsaynö nï Adánta kamaskirrä† Evata kamashqa kaptinmi.† 14 Manami Adántatsu Satanásqa engañarqan, sinöqa Evatami.† Engañaptinmi jutsa rurayman ishkirqan.
15 Tsaynö kaptinpis warmikuna salvakuyanqa wamrankunata shumaq wätar, Tayta Diosman yärakur, pïmaytapis kuyar, shumaq tantiyakur y Tayta Dios munanqannö kawarmi.†