3 Macedonia provinciaman aywakur qamtami Éfeso markacho jaqimurqä llutan yachatsikuqkunata michänaykipä. 4 Tsay llutan yachatsikuqkunaqa yarpayllankunapita yachatsirmi unay tiempu imanö kanqanta y unay castankuna pï kayanqanta yachatsiyan. Tsaykunata yachatsiyaptinmi Tayta Diosman yärakuyänanpa trokin manakaqkunapita rimanakullar kawaykäyan.

5 Wawqikuna panikuna rimanakuyänanpa trokin kuyanakuyänanpämi tsay llutan yachatsikuqkunata michänaykipä nikä. Tsaynö kuyanakuyänanpäqa jutsata ama rurayätsuntsu, allita rurar kawayätsun y llapan shonqunkunawan Tayta Diosman yärakuyätsun.

6 Tsay llutan yachatsikuqkunaqa kuyanakuyänanpa trokinmi manakaqkunapita rimanakullar kawayan. 7 Tayta Diospa leyninkunata pasaypa yachaq kayanqanta nirpis imata yachatsiyanqantapis manami musyayantsu.

8 Musyantsikmi Tayta Dios munanqannö kawayänanpä yachatsishqa leyninkuna alli kanqanta. 9 Manami jutsaynaq runakunapätsu leyninkunata Tayta Dios kamariparqan, tsaypa trokinqa jutsa ruraqkunapämi. Tsaymi leyninkuna kaykan mana cäsukuqkunapä, mana alli runakunapä, jutsasapakunapä, Tayta Diosta manakaqman churaqkunapä, mamanta y taytanta maqaqkunapä y runa mayinta wanutsiqkunapä. 10 Tsaynöpis kaykan majanta qanrataqkunapä, ollqupura kakuqkunapä, warmipura kakuqkunapä, runa mayinta rantikuqkunapä, llullakuqkunapä, manakaqta tumpar runa mayinpa contran shäriqkunapä y alli yachatsikuyta mana cäsukur jutsata ruraqkunapämi. 11 Tsaytami alabashqa Tayta Diospa alli willakuynincho nin. Tsay willakuyninta willakunäpämi Tayta Dios kachamashqa.

12 Señornintsik Jesucristutami agradëcikü willakuyninta willakunäpä yanapamanqanpita. Tsaynöllami agradëcikü noqaman yärakamar willakuyninta willakur purinäpä churamanqanpita. 13 Ñöpataqa Jesucristuta manakaqmanmi churarqä. Payman yärakuqkunatapis ashi ashiykurmi carcelman wichqatsirqä.^† Mana musyaynïpa tsaynö rurashqa kaptïpis kuyamarmi Tayta Dios perdonamashqa. 14 Perdonamarmi tantiyatsimashqa Jesucristuman yärakur pïmaytapis kuyanäpä.

15 Jutsasapa runakunata salvananpämi kay patsaman Jesucristo shamushqa. Tsaytaqa pïmaypis criyiyätsun. Noqatapis llapan runakunapita mas jutsayuq kaykaptïmi 16 kuyapämar salvamashqa. Tsaynö salvamarqan Jesucristo perdonakuq kanqanta wakin runakunapis tantiyakur payman yärakuyänanpä y mana ushakaq kawayta tariyänanpämi. 17 ¡Tayta Diosmi imayyaqpis munayyuq rey, imayyaqpis kawaq y mana rikakaq! Payllami Dios kaykan. [Manami pipis paynö yachaq kantsu.] ¡Imayyaqpis alabashqa kaykullätsun! ¡Amén!

18 Kuyay Timoteo, tsurï japuy kaptikimi Tayta Diospa jutincho wawqikuna niyäshunqallaykita noqapis qamta nï: Alli soldädu mana mantsariypa pelyanqannö qampis mana mantsariypa Jesucristupa willakuyninta willakuy. 19 Tsaynö willakurnin Jesucristuman yärakur Tayta Dios munanqannö imaypis kaway.

Wakin runakunaqa Tayta Dios munanqannö mana kawarmi Jesucristuman yärakuyantsu. 20 Alejandruwan Himeneo mana yärakuyanqanpitami Satanáspa munayninman entregashqä. Tsaynöpa capazchi tantiyakur llutanta yachaykätsiyanqanta kacharir Jesucristuman yapay yärakuyanmanpis.