Salmo 111 (110)
Tayta Diosta alabanqan
1 ¡Aleluya!
Llapan shonqüwanmi Tayta Diosta alabashä.
Pay munanqannö kawaq runakunawan qorikaykurmi alabashä.
2 Tayta Dios ruranqankunaqa mantsakaypämi kaykan.
Ruranqankunata musyarmi tantiyakuqkuna pasaypa kushikuyan.
3 Kamanqankunaqa llapanpis kuyayllapämi kaykan.
Payqa imaypis allillatami ruran.
4 Mantsakaypä kaqkunata ruranqantami imaypis yarparäshun.
Tayta Diosqa alli shonqu y kuyapäkuqmi.
5 Paypita mantsapakuqkunataqa mikuytapis kamaripanmi.
Pactu ruranqantaqa imaypis yarparaykanmi.
6 Juk nación runakunata qarquskirmi kuyanqan runakunata herenciata rikatsirqan.
Tsaynöpami munayyuq kanqanta tantiyatsirqan.
7 Tayta Dios ruranqanqa llapanpis allimi kaykan.
Paypa mandamientunkunaqa llapanpis cäsukunantsikpämi.
8 Tsaykunaqa imayyaqpis mana ushakaqmi.
Tsaynöpis allita rurar kawanantsikpämi tantiyatsimantsik.
9 Kuyanqan runakuna libri kayänanpämi Tayta Dios jipimurqan.
Imayyaqpis yanapananpämi paykunawan pactuta rurarqan.
Paypa jutinqa santu y mantsariypämi kaykan.
10 Yachaq kaytaqa qallaykuntsik Tayta Diospita mantsapakurmi.
Mandamientunta cumpliqkunaqa alli yarpayyuqmi kayan.
¡Payqa imayyaqpis alabashqami kanqa!†