Salmo 110 (109)
Mandaq reyta Tayta Dios yanapanqan
(1a) David qellqanqan salmu.
1 (1b) Mandamaqnïtami Tayta Dios nirqan:
“Derëchäman jamakamuy llapan chikishuqnikikunata munaynikiman churanqäyaq”.†
2 Siónpita patsa mandaq kanaykipämi Tayta Dios yanapaykäshunki.
Mandaq kaykarqa chikishuqnikikunata munaynikichöna tsararay.
3 Guërraman aywanaykipä willakatsiptiki soldäduykikuna rasmi qorikäyanqa.
Jirkakunacho shullya qoyay qoyay yurinqannömi qampis warayllanta warayllanta mas chölu rikakunki.
4 Tayta Diosmi jurarnin awnishurqayki:
“Qammi imayyaqpis Melquisedecnö sacerdöti kanki”.
Tsay awnishunqaykitaqa imaypis cumplinqami.†
5 Tayta Diosqa derëchaykichömi yanapashunaykipä imaypis kaykan.
Ajanqan junaqmi contrayki shäriq reykunatapis wanutsinqa.
6 Contrayki shäriq nacionkunataqa maytsaychöpis wanutsirmi ushanqa.
Reykunatapis autoridäkunatapis llapantami ushakätsinqa.
7 Qampami itsanqa kallpayki yurinqa näni kuchuncho yakuta upurkuptiki.