Salmo 109 (108)
Chikiqninkunata Tayta Diosta juzgananpä mañakunqan
(1) Cantaqkunapa mandaqninpämi. David qellqanqan salmu.
1 (1b) Tayta Dios, qamtami alabä.
Mañakamunqäta wiyaykallämay.
2 Llulla runakunami y mana alli runakunami conträ parlaykäyan.
Mana parlanqätami tumpayäman.
3 Nanaq shiminpami imatapis niyäman.
Imatapis mana nikaptïmi atacayäman.
4 Kuyaykaptïmi chikiyäman.
Tsaymi qamta imaypis mañakamü.
5 Allita ruranqäpitami mana alliwan kutitsiyämashqa.
Kuyaykaptïmi chikiykäyäman.
6 Chikimaqnïta juzgananpä mana alli runata churaykullay.
Kikinpa abogädullan tikrapätsun.
7 Demandakuptinpis kikin jutsayuq kanqanta niyätsun.
Shimillan payta condenatsun.
8 Manaräpis unayta wanutsun.
Pay rurananpä kaqta jukna ruratsun.†
9 Tsurinkunapis waktsa rikakuyätsun.
Warminpis viüda rikakutsun.
10 Tsurinkuna mañapakullar puriyätsun.
Juchutsishqa wayinkunapita karuparä mikuyta ashiyänanpä aywayätsun.
11 Prestaqninkuna imaykantapis prenda apakuyätsun.
Ñakarrä arur tarinqantapis jäpa runakuna qechur apakuyätsun.
12 Paytapis waktsa quëdaq tsurinkunatapis pipis ama kuyapätsuntsu.
13 Paypita aywaraqkunapis llapan ushakäyätsun.
Tsay apellïduqa chipyaq ushakätsun.
14 Taytan mana allita ruranqanta Tayta Dios ama perdonatsuntsu.
Maman jutsata ruranqantapis ama perdonatsuntsu.
15 Jutsankunata Tayta Dios imaypis ama qonqätsuntsu.
Kay patsachöqa jutintapis amana yarpäyätsunnatsu.
16 Tsay runaqa imaypis kuyapäkuyta manami yachashqatsu.
Muchuqkunata, ñakaqkunata y llakikuycho kaqkunatapis wanutsinqanyaqmi qatikachashqa.
17 Maldicionakuq kanqanpita kikinman maldición chätsun.
Runa mayinpä bendición kananta mana munanqanpita kikinpäpis bendición ama katsuntsu.
18 Llapan ruranqanpis maldicionashqa katsun.
Maldicionqa pachanmanpis yakunö yaykutsun.
Tullunmanpis aceitinö chätsun.
19 Maldicionashqa imaypis kawatsun.
Alläpa chachak watashqa wachukunö imaypis ñakatsitsun.
20 Conträkunatawan wasä rimaqkunata Tayta Dios tsaynö castigatsun.
21 Tayta Dios, kuyakuq kanqaykita pïmaypis tantiyananpä yanapaykallämay.
Kuyapäkuq kaynikiwan salvaykallämay.
22 Noqaqa llakishqa karmi ima ruraytapis kamäpakütsu.
Llakikuypitami shonqüpis pasaypa nanaykan.
23 Llantuy illakaqnömi kallpäpis illakaykan.
Imayka chukllushta wayra apakunqannömi kaykä.†
24 Mana mikuptïmi qonqurnïpis tsuktsukyaykan.
Custilläkunapis yupanakuykäyanmi.
25 Pïmaypis asipäyämanmi.
Rikaskamarpis kushipämarninmi umankunata awikuyan.†
26 Tayta Diosllä, yanapaykallämay.
Kuyapäkuq kaynikiwan salvaykallämay.
27 Pïmaypis tantiyatsun kikiki salvamanqaykita.
28 Runakuna maldicionayämaptinpis bendicionnikita noqaman churaykallämuy.
Chikimaqnï runakuna pasaypa penqakuyätsun.
Noqaqa sirviqniki karmi pasaypa kushikushä.
29 Chikimaqnïkunataqa pïmaypis penqakatsiyätsun.
Pasaypa penqakuyaptin qaqllankunapis pukayätsun.
30 Tayta Dios, qamtami imaypis agradëcikushayki.
Atska runakunawan qorikaskirmi alabashayki.
31 Qammi muchuqkunapa janan kanki.
Chikiqninkunapitapis qammi salvanki.