Salmo 112 (111)
Alli runa imanö kawanqan
1 ¡Aleluya!
Kushishqami kawan Tayta Diospita mantsapakuq runa.
Tsay runaqa Diospa mandamientunkunata cumplirmi kushikun.
2 Paypita aywaraqkunami Israel nacioncho munayyuq kayanqa.
Paykunaqa bendiciontami chaskiyanqa.
3 Wayincho imaykankunapis manami pishinqatsu.
Paykunaqa pïmaypäpis alli shonqumi kayanqa.
4 Wakin runakuna tsakäpakushqanö kayaptinpis alli runaqa aktsichönömi kaykan.
Payqa alli shonqumi, kuyapäkuqmi y allillata ruraqmi.
5 Alli runaqa mañakuptin pitapis rasmi qaraykun.
Ima rurayninkunatapis shumaq yarpachakuskirmi ruran.
6 Manami imaypis llutanta rurantsu.
Paytaqa pïmaypis yarpaskinmi.
7 Mana alli noticiata wiyarpis manami mantsarintsu.
Ima kaptinpis Tayta Diosllamanmi yärakun.
8 Imaypis añawllami kawan.
Manami imapitapis mantsarintsu.
Chikiqninkuna ushakäyanqantapis rikanmi.
9 Muchuqkunatami imaypis yanapan.
Allillatami imaypis ruran.
Pïmaypis paytaqa respitayanmi.
10 Tsayta rikarmi mana alli runaqa payta chikin.
Ajarninmi kiruntapis uchunrä.
Llutanta rurananpä yarpachakunqanqa manami kamakanqatsu.