Israel y Judá runakunata Tayta Dios juzgananpä ninqan
3
Israel y Judá runakuna, Egiptupita jipimushuqniki Tayta Dios ninqanta wiyayay:2 “Kay patsacho tsaytsika runakuna kayaptinpis qamkunallatami akrashqä kuyanqä runakuna kayänaykipä.†
Tsaymi jutsata rurayanqaykipita castigayäshayki”.
3 Maypapis aywananpä puntataqa piwanpis willanakunrämi.
4 Leonpis munticho qayaran uywata mikunanpä tarirrämi.
León mallwapis machaynincho qayaran mikunanpä tsarirrämi.
5 Pishqukunatapis trampa tsarin ima mikuytapis churapashqarämi.
Ima trampapis brincan uywa yaykuptinrämi.
6 Cornëtatapis tukayan markacho imapis mantsariypä kaptinrämi.
Tsaynöllami markacho ima desgraciapis päsan Tayta Dios castigaptinrä.†
7 Sirviqnin profëtakunata manarä willarqa imatapis mantsariypä kaqkunata Tayta Dios manami rurantsu.†
8 León qayaranqanta wiyar ¿pirä mantsarinmantsu?
Tayta Dios ninqanta wiyar ¿pirä willakunmantsu?†
9 Willakuqkuna, Asdod markaman aywaykur ninqäta palaciuncho reyta willayay.
Egiptumanpis aywaykur ninqäta palaciuncho reyta willayay.
Willar niyanki:
“Samaria markaman y ñöpan jirkankunaman llapaykikuna shayämuy.
Tsaychömi rikayanki markacho llutanta ruraykäyaqta y mana kuyapaypa runakunata ñakaykätsiyanqanta.
10 Paykunaqa alli kaqta rurayta manami yachayantsu.
Suwakuyanqallantami palaciunkunachöpis tsaraykäyan”.
11 Tsaynö kayanqanpitami Samaria runakunata Tayta Dios nin:
“Contraykikuna maytsaypita shamurmi atacayäshunki.
Amparakuyänaykipä shäritsiyanqayki jatusaq murällakunatapis llapantami juchutsiyanqa.
Palaciuykikunacho llapan tariyanqantami apakuyanqa”.
12 Tayta Diosmi nin:
“Üshata leonpa shiminpita qechuptin chakillanpis o rinrillanpis quëdanqannömi Samariacho taq Israel runakunapis wallkaqlla quëdayanqa.
Damascupita rantiyämunqan kuyayllapä sillëtacho jamaraq runakunapis wallkaqllami quëdayanqa”.
13 Llapanta mandaq Tayta Diosmi nin:
“Ninqäta shumaq wiyayay.
Jacobpita aywaraq llapan runakunata willar niyay:
14 ‘Jutsata rurayanqanpita Israel runakunata juzganä junaq Bet-elcho kaykaq altarkunata llapantami ushakätsishä.†
Tsaynö ushakätsiptïmi altarpa esquïnancho kaykaq waqrankunapis pakir patsaman ishkinqa.
15 Usya witsan täyänanpä ruratsiyanqan wayitapis y tamya witsan täyänanpä ruratsiyanqan wayitapis llapantami juchutsishä.
Marfilwan adornashqa wayikunatapis llapantami juchutsishä.
Llapan alli wayikunatami juchutsishä’ ”.
Tayta Diosmi tsaynö nin.