4
Samaria warmikuna, shumaq wiyakuyay.Qamkunaqa imaykayuq karmi Basán particho kaykaq wera wäkakunanö chipikyäyankirä.
Muchuqkunatami ñakaykätsiyanki.
Imaynaqkunatapis maqarmi ushaykäyanki.
Upyaman churakashqa karmi runaykikunatapis vïnuta apapäyämushunaykipä nikäyanki.
2 Santu Tayta Diosmi jurar niyäshunki:
“Höra chämunqanami imayka pescädutanö qamkunata y wamraykikunatapis shimikikunapita anzuëluwan shequrkur prësu apayäshunaykipä.
3 Marka murälla uchkukunapa jipiskirmi prësu apayäshunki.
Nirkurmi Hermón jirkaläpa qarquyäshunki”.
Tayta Diosmi tsaynö nin.
Tayta Dios ollqutupanqan
4 “Ïdulukunata adorayta munarqa ¡Bet-elman y Gilgalman† aywaykur adorayay!
¡Jutsa kanqanta musyaykar tsaynö adorarqa mas jutsata rurayay!
¡Cada tuta sacrificiuta rupatsiyay!
¡Cada kimsa junaqchöpis diezmuykikunata apayay!
5 ¡Agradëcikur levadürayuq tantakunatapis rupatsiyay!
Qamkunataqa ofrendakunata churayanqaykipitapis alabakuymi gustayäshunki”.
Tsaynö kayanqaykitami munayyuq Tayta Dios nin.
6 Tayta Diosmi nin:
“Muchuycho kayänaykipä y may markachöpis mikuy mana kananpä kamakätsiptïpis manami perdonta mañakayämashqaykitsu.
7 Tsaynöpis mikuykuna poqunanpä kimsa killa pishiykaptinmi usya kananpä kamakätsirqä.
Wakin markacho tamya kananpä y wakin markacho usya kananpäpis noqami kamakätsirqä.
Tsaymi juk partiman tamya chaptinpis juk partichöqa mikuykuna tsakiyarqan.
8 Yakuynaq markakunacho taq runakunami yakuyuq markakunaman aywayarqan yakuta mañakuyänanpä.
Tsaycho yakuta upurpis manami jimayarqantsu.
Tsaynö castigaykaptïpis manami perdonta mañakayämashqaykitsu”.
Tayta Diosmi tsaynö nin.
9 “Noqami qamkunata castigarqä ranchawan y mikuyta ushaq kurukunawanpis.
Chakraykikunacho hïgusta y üvatapis chukllushkunawanmi ushatsirqä.
Tsaynö castigaykaptïpis manami perdonta mañakayämashqaykitsu”.†
Tayta Diosmi tsaynö nin.
10 “Egipto nacionta castiganqä plägakunawanmi qamkunatapis castigarqä.†
Chölukunata guërracho contraykikuna wanutsiyänanpä y cawalluykikunata apakuyänanpä noqami kamakätsirqä.
Contraykikuna vinciyäshuptiki wanuq runakuna ismushqa jitaräyänanpäpis noqami kamakätsirqä.
Tsaynö castigaykaptïpis manami perdonta mañakayämashqaykitsu”.
Tayta Diosmi tsaynö nin.
11 “Sodomata y Gomorrata† ushakätsinqänömi wakin markaykikunatapis ushakätsirqä.
Tsaymi qamkunaqa ninapita sobraq mitsuynöllana quëdayarqayki.
Tsaynö castigaykaptïpis manami perdonta mañakayämashqaykitsu”.
Tayta Diosmi tsaynö nin.
12 “Tsaynölla mana cäsuyämaptikiqa masrämi castigayäshayki.
¡Shamur castiganäpä kamarikushqa shuyäyämay!”
13 Noqami jirkakunatapis y wayratapis kamashqä.
Noqami imata yarpanqätapis runakunata musyatsï.
Junaqtapis paqasmanmi tikratsï.
Jirkakunapapis purï.
Jutïpis llapanpä munayyuq Yahwehmi.